Kwamamaza

Bamwe mu bita ku bana bafite ubumuga barifuza kongererwa ubushobozi bwo kubafasha

Yanditswe kuya 29-10-2016 saa 11:26' na Philbert Hagengimana


Nubwo Abadepite batunga agatoki bimwe mu bigo byita ku bana bafite ubumuga cyane ubwo mu mutwe nk’ubwo kudindira mu mikurire y’ubwenge, hari ibindi byugarijwe n’ibibazo uruhuri bituma hari abibaza impamvu bitereranwa hatitawe ku gaciro k’imirimo bakora mu buzima bw’igihugu.

Bamwe mu bana bafite ubumuga bwo mu mutwe, bafatwa nk’abadafite agaciro mu muryango, nyamara bahawe ubuvuzi buboneye, bagafashwa nk’abategurwa kuzagira icyo bimarira, bagirira igihugu akamaro nk’uko bisobanurwa na Murebwayire Epiphanie, Umuyobozi w’Ishyirahamwe ry’Abakora Ubuvuzi bukoresha Ibikorwangiro (Occupational Therapy).

Uwo mwuga watangiye mu 2014 ari na bwo hashyizweho ishami riwigisha muri Kaminuza y’u Rwanda, ndetse ubu ugenda ukura ku buryo n’ibigo byita kuri abo bana buri mwaka bibohereza mu bigo by’amashuri abanza.

Urugero ni Ikigo Heroes Day Care Center giherereye i Gikondo, cyashinzwe mu 2015 n’Ishyirahamwe ry’ababyeyi ryitwa ‘APH’, mu mikoro yacyo cyatanze abana babiri mu mashuri abanza muri uyu mwaka, ndetse cyiteguye kuzatanga undi mu mwaka utaha wa 2017, kuko na we agaragaza ubushobozi bwo kuba yakwigana n’abandi kandi agatsinda.

Niyitegeka Sixtine, Umuyobozi w’icyo kigo, yavuze ko ubushobozi bw’abo babyeyi bubemerera gufasha abana 12 gusa, kuko nta mikoro ahagije bafite ngo bihembere abaganga bakoresha ibikorwangiro, ibyumba by’amashuri byo gufashirizamo abo bana n’ibindi bikoresho by’ibanze bakenera.

Muri ‘Heroes Day Care Center’ abana bahabwa ubuvuzi bwo kubagorora ingingo (physiotherapy), bagafashwa kugira ubushobozi bwo kugira ibyo bikorera mu by’ibanze bakenera, bakanigishwa kuvuga (speech therapy).

Nyiragwiza Annonciata ashima urwego umwana we agezeho akura mu gihe amaze yigishwa anavurirwa muri iryo shuri, dore ko yahageze atabasha no kwicara, ariko ubu akaba adudubiza Icyongereza.

Ati “Amaze imyaka ibiri, yatangiye ntacyo yishoboza, atazi kwicara, atavuga ku buryo twamujyanyeyo abantu batubwira ngo tumurekere mu rugo ntitumujyane ahabona. Ubu amaze kumenya kuvuga bimwe, iyo ashaka kujya ku musarane arabivuga, iyo avuye kwiga umubaza icyo yize akagusubiza, icyo ashaka azi kucyisabira rwose.”

Uwo mwana afite imyaka itanu, azi amagambo amwe n’amwe y’Icyongereza, bituma ababyeyi be bagira icyizere ko azageza igihe akagira ubushobozi bwo kujya mu mashuri abanza akiga cyangwa akazagira ikindi ashobora kwimarira n’ubwo agifite imbogamizi ikomeye yo kuba amaboko ye adafata ikintu ngo agikomeze.

Nyamara aho uwo mwana na bagenzi be bigira ntihaboneye, ibikoresho, uburyo buhagije bwo kubitaho no kubageza kuri iryo shuri na byo ni ibibazo by’ingorabahizi nk’uko bisobanurwa na Niyitegeka Sixtine, umuyobozi w’icyo kigo.

Ati “Imbogamizi ikomeye dufite ni ukutagira ahantu hacu habugenewe dukorera, ikindi nk’abarimu dufite bahoraho ariko abaganga bo ni abakorerabushake kuko nta bushobozi dufite bwo kubihembera. Ibi kandi byiyongeraho ko abana benshi dufite bavuka mu miryango ikennye cyangwa irimo ibibazo, aho usanga umugabo yataye urugo kubera imiterere y’umwana umugore yabyaye, cyangwa indi mpamvu.”

Heroes Day Care Center kimwe na bimwe mu bindi bigo bikora nka yo byugarijwe n’ibyo bibazo mu gihe Komisiyo y’Ubumwe bw’Abanyarwanda, Uburenganzira bwa muntu no kurwanya Jenoside mu Nteko Ishinga Amategeko yabwiye Minisiteri y’Uburinganire n’Iterambere ry’Umuryango ko ibigo by’abafite ubumuga bwo kudindira mu mikurire y’ubwenge bimeze nka butike zicuruza amata na fanta, bitewe n’uko ngo ababishinga baba batagamije gufasha abo bana nyir’izina, ahubwo baba bashyize imbere inyungu zabo bwite.

Ubwo bumuga buterwa n’iki?

Nubwo abanyarwanda bagenda batera imbere ari na ko bahindura imyumvire, hari bamwe bacyumva ko umwana uvukana ubumuga bwo kudindira mu mikurire y’ubwenge, aba yararozwe akiri mu nda.

Nyamara nk’uko byemezwa n’abakora ubuvuzi bukoresha ibikorwangiro, abana bavukana ubwo bumuga benshi babuterwa n’umunaniro bavukana iyo bavutse igihe cyarenze bitewe wenda no kurangaranwa n’abakwiye kubabyaza cyangwa uburangare bw’ababyeyi batinda kujya kwa muganga.

Umuyobozi w’Ishyirahamwe ry’Abakora Ubuvuzi bukoresha ibikorwangiro, Murebwayire Epiphanie agira ati “Ubumuga bw’aba bana bwaje mu gihe cyo kuvuka, kuriya umubyeyi amara umwanya munini atarabyara, ubwonko bw’umwana burananirwa. Iyo bunaniwe n’ibindi bice ntibikura uko byakagombye, ugasanga umwana ageze igihe cyo kwicara atarabasha no kubyuka cyangwa kwihindukiza mu buriri.”

Ubwo buvuzi bukorwa bute?

Ubuvuzi bukoresha ibikorwangiro bukorwa hifashishijwe udukino, ubundi umwana icyo akeneye bakamushyiriraho ibyatuma acyikorera ubwe, yaba atabishoboye bakakimukorera ariko banamutoza kuba yacyikorera.

Ibi ni byo abo bavuzi basaba ababyeyi kujya bihatira gufasha abana mu gihe bavuye ku ishuri bari mu rugo.

Abavurisha ibikorwangiro bahura n’imbogamizi zitoroshye

Ubwo buvuzi kugeza ubu buzitiwe n’imyumvire y’ababyeyi bacyitirira ubwo bumuga amarozi, abagihishahisha abo bana bumva ko ari igisebo kubagaragaza, abajyana kwa muganga ariko ugasanga bifuza ko uwo mwana ahita akira byihuse bityo kwihangana kukaba guke mu gihe babwiwe ko umwana azakira buhoro buhoro.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved