Bamwe mu bahoze muri FDLR barangije ingando i Mutobo bagiye gukurikiranwaho uruhare muri Jenoside

Yanditswe na Emma-Marie Umurerwa
Kuya 29 Gicurasi 2019 saa 12:15
Yasuwe :
0 0

Mu bantu 569 bahoze mu mutwe wa FDLR barangije ingando i Mutobo mu Karere ka Musanze, muri bo 46 bagiye gukurikiranwaho uruhare bakekwaho muri Jenoside yakorewe Abatutsi muri Mata 1994.

Nyuma y’amezi asaga atanu abo bahoze mu mutwe wa FDLR bagororerwa mu Kigo cya Mutobo , basubijwe mu buzima busanzwe kuri uyu wa Kabiri.

Mu basoje ingando, 46 bari barahamijwe n’Inkiko Gacaca kugira uruhare muri Jenoside yakorewe Abatutsi. Abo baraguma mu Kigo cya Mutobo mu gihe bagikurikiranwa n’Inkiko.

Byatangajwe n’Umuyobozi wa Komisiyo ishinzwe gusezerera no gusubiza mu buzima busanzwe ingabo zavuye ku rugerero, Seraphine Mukantabana, kuri uyu wa 28 Gicurasi 2019.

Yagize ati “ Abashobora kuba barakatiwe n’Inkiko Gacaca bafite amadosiye agaragara, abo bazahamagazwa babibazwe aho baba bari hose. Hari n’abatangiye guhamagarwa bari hano mu kigo bakamenyeshwa ko izo dosiye zihari kugira ngo bitegure banyuzwe imbere y’ubucamanza, baburane ubaye umwere arekurwe utabaye umwere afungwe”.

Mukantabana yavuze ko Jenoside ari icyaha kidasaza ariyo mpamvu igihe hari ukekwaho kuba yarayikoze igihe cyose abonekeye akurikiranwa.

Kuri uyu Gatatu tariki ya 29 Gicurasi 2019 nibwo abarangije kugororwa badafite ibyaha bacyekwaho bari bugezwe mu Turere bakomokamo.

Ikigo gishinzwe gusezerera no gusubiza mu buzima busanzwe ingabo zahoze ku rugerero kibaha impamba ya 60 000 Frw, nyuma y’amezi atatu bagahabwa 120 000 Frw abafasha kwinjira mu buzima busanzwe bakihangira imirimo.

Akanyamuneza kari kose ku bahoze muri FDLR barangije kugororwa
Ambasaderi w’u Bubiligi mu Rwanda, Benoit Ryelandt (iburyo) ashimira umwe mu basoje ingando i Mutobo
Umunyamabanga wa Leta muri Minaloc, ushinzwe imibereho myiza y'abaturage, Dr Mukabaramba Alvera ashyikiriza Major Ntuyahaga icyemezo cy'uko arangije kugororwa
Major Ntiyahaga ashyikirizwa icyemezo n'umunyamabanga wa Leta muri Minaloc, Dr Mukabaramba Alvera cy'uko asubijwe mu buzima busanzwe
Mu bantu 569 bahoze mu mutwe wa FDLR barangije ingando i Mutobo, 46 muri bo bagiye gukurikiranwaho uruhare bakekwaho muri Jenoside

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza