Kwamamaza

Bamwe mu bize uburezi bavuga ko bahawe diplôme z’amayobera

Yanditswe kuya 14-10-2016 saa 10:46' na Emma-Marie Umurerwa


Abarangije amashuri mu bijyanye n’uburezi muri Kaminuza y’u Rwanda , bavuga ko kuba barahawe impamyabumenyi zanditseho ko ari abarimu bo mu mashuri abanza, bituma hari aho batemererwa gupiganira akazi cyane mu mashuri yisumbuye.

Iki kibazo bakigaragaje ubwo hizihizwaga Umunsi Mpuzamahanga wa mwarimu, tariki ya 5 Ukwakira 2016.

Umwe mu barimu yabwiye Minisitiri w’Uburezi ko “Hari abanyeshuri bize ibijyanye n’uburezi mu mashuri yisumbuye, bajya kwiga amashuri makuru mu ishuri ry’uburezi, barangije bahabwa impyamyabumenyi zifite amayobera.”

Yatanze urugero ku bize indimi muri kaminuza. Ati “Bahawe impamyabumenyi zanditseho ‘Primary teacher education’; iyo bigeze rero mu Turere tumwe na tumwe kubera ko bose batabyumva kimwe, ntabwo abo bantu bemererwa gupiganirwa akazi nk’abandi, niba ari ukwigisha indimi ntekereza ko badakwiye gukumirwa.”

Minisitiri w’Uburezi, Musafiri Papias Malimba, yavuze ko kuba bafite impamyabumenyi yo ku rwego runaka bidakuraho ko bafite ubuzobere bwo kwigisha incuke n’andi mashuri, kandi ko byakagombye kubatera ishema kuruta ipfunwe rishingiye ku mushahara.

Yagize ati “Ndagira ngo mbabwire ko abantu ku Isi bahembwa neza mu bihugu byateye imbere, ni abarimu bo mu mashuri y’incuke. Ushobora no gukora ubushakashatsi ukabona n’impamyabumenyi y’ikirenga (PHD) ugakomeza kwita ku bana, ibyo ni byo biba bikenewe mu mwuga. "

Ikibazo gihari gifitwe na benshi, turacyafata ’diplôme’ nk’ikintu cyo gushingiraho umushahara, aha niho hari ikibazo. Nidushobora kumva ko ’diplôme’ atari yo ishingirwaho mu gushyiraho umushahara, ndakubwira n’aho uzaminuza, nta pfunwe bizagutera ahubwo bizagutera ishema kurushaho[...] ariko ibiteganywa bizajya ahagaragara vuba , bizagenda bidufasha gukemura ibyo bibazo buhoro buhoro.”

Yakomeje avuga ko ntacyo Leta idakora ngo imibereho ya mwarimu irusheho kuba myiza, abasaba gushyira imbaraga mu kwihugura kuko ngo kwiga ari uguhozaho.

Abiga uburezi mu mashuri makuru na kaminuza, bakunda kugaragaza imbogamizi zinyuranye bahura na zo iyo bageze mu kazi, nk’aho abakomeje amasomo ya kaminuza bari basanzwe bigisha bavuga ko iyo bayarangije bakomeza guhemberwa impamyabumenyi z’amashuri yisumbuye kandi baramaze kubona izo ku rwego rwa kaminuza.

Ibyo kandi byiyongera ku kibazo bamaze igihe kinini bagaragaza cy’umushahara bavuga ko ari muto, ku buryo utajyanye n’aho imibereho mu Rwanda igeze.

Abize uburezi muri kaminuza bavuga ko bangirwa gupiganira akazi kubera dipolome bahawe bemeza ko zifite amayobera
Minisitiri Musafiri yasabye abarimu guhindura imyumvire bafite ko diplome ari yo ishingirwaho hashyirwaho umushahara

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved