Banki y’Isi yahaye u Rwanda inkunga izubaka imihanda y’imigenderano mu turere

Yanditswe na Ferdinand Maniraguha
Kuya 7 Ukuboza 2017 saa 06:09
Yasuwe :
0 0

Banki y’isi yahaye u Rwanda inkunga ya miliyoni 68 z’amadolari (agera kuri miliyari 58 Frw) azifashishwa mu gukora imihanda y’imigenderano mu turere dutandatu.

Aya mafaranga yavuye mu kigega cy’iyi banki gitera inkunga gahunda zitandukanye, akaba yaratanzwe na Leta Zunze Ubumwe za Amerika n’u Buholandi.

Muri gahunda ya Guverinoma y’imyaka irindwi, hateganyijwe kubakwa imihanda y’imigenderano y’ibirometero 3000.

Inkunga yatanzwe izubakishwa imihanda y’imigenderano y’ibirometero 450 mu turere twa Gatsibo, Nyagatare, Nyabihu, Rutsiro, Nyaruguru na Gakenke.

Minisitiri w’imari n’igenamigambi, Amb. Gatete Claver, yavuze ko iyo nkunga ije yunganira gahunda ya Leta yiswe ‘FRDP’ yari yaratangiye yo kubaka imihanda y’imigenderano haherewe mu turere icumi, ku ikubitiro hakaba hari kubakwa iy’ibirometero 270 mu turere tune.

Amb. Gatete yavuze ko bashyize ingufu mu mihanda y’imigenderano kugira ngo babashe guteza imbere icyaro n’abagituye.

Yagize ati “Ibi bifite akamaro kanini cyane, ni ukugira ngo imihanda yo mu cyaro ishobore kuba yakorwa ifashe abaturage bacu kugeza umusaruro ku masoko, no kugira ngo babone serivisi zitandukanye ari izo kwa muganga, izo ku mashuri…byose bizadufasha guteza imbere icyaro.”

Gahunda ya FRDP yahereye ku gukorana imihanda y’imigenderano mu turere twa Rwamagana, Karongi, Nyamagabe na Gisagara, aho hashowemo miliyoni 45 z’amadolari yatanzwe na Banki y’Isi nk’inguzanyo, hakazongerwa n’utwo turere dutandatu.

Uhagarariye Banki y’Isi mu Rwanda, Yasser El Gammal, yashimangiye ko iyo mu cyaro hakozwe imihanda, bihindura ubuzima bwabo byihuse.

Yagize ati “Iyo ugiye mu baturage nibwo ubona ko ubuzima buhinduka. Ejo hashize twasuye kamwe mu duce tw’i Rwamagana batubwira inkuru nyinshi ariko iyadukoze ku mutima ni uburyo hari abagore bagize ibibazo babyara kubera ko kugera kwa muganga bigoye , batubwiye abagore batatu abana babo bapfuye babyarwa .Nubwo ikigambiriwe cyane ari ugufasha abahinzi kugeza umusaruro ku isoko, hari ibindi bizagirira abaturage akamaro, nk’abana bazabasha kujya ku ishuri biboroheye n’ibindi.”

Umunyamabanga wa Leta muri Minisiteri y’ibikorwaremezo ushinzwe gutwara abantu n’ibintu, Uwihanganye Jean de Dieu, yavuze ko iyi mihanda y’imigenderano igiye kubakwa ariyo ya mbere muri gahunda ya Guverinoma y’imyaka irindwi.

Yavuze ko hasigaye indi mihanda y’ibirometero bigera kuri 2500, icyakora ngo barifuza kuba bamaze kubaka ibirometero bigera kuri 700 mu myaka itatu iri imbere.

Iyi mihanda igiye gukorwa biteganyijwe ko izarangira muri 2020, igafasha abaturage bagera kuri miliyoni kandi igatanga n’akazi ku bagera ku bihumbi bitanu.

Umuyobozi wa Banki y’Isi, Ishami ry’u Rwanda, Yasser El Gammal
Umunyamabanga wa Leta muri Minisiteri y’ibikorwa remezo ushinzwe gutwara abantu n’ibintu, Uwihanganye Jean de Dieu, yavuze ko iyi mihanda y’imigenderano igiye kubakwa ariyo ya mbere muri gahunda ya Guverinoma y’imyaka irindwi
Banki y’Isi yahaye u Rwanda inkunga ya miliyoni 68 z’amadolari
Gammal yavuze ko iyo ugeze mu cyaro ukabona uburyo imihanda ihindura ubuzima bw'abaturage ari bwo umenya akamaro kayo
Ambasaderi w'u Buholandi mu Rwanda, Frédérique de Man, yari muri uyu muhango
Umwe mu bari bitabiriye umuhango w'isinywa ry'amasezerano y'iyi nkunga

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza