Kwamamaza

Bimwe mu bicuruzwa bicishwa ku mupaka w’u Rwanda na Congo byakuriweho umusoro

Yanditswe kuya 20-10-2016 saa 12:37' na Mukaneza M.Ange


Ubwoko 168 bw’ibicuruzwa binyuzwa ku mupaka bijya cyangwa biva muri Repubulika Iharanira Demukarasi ya Congo, byakuriweho amahoro(umusoro) mu rwego rwo guteza imbere ubucuruzi bwambukiranya imipaka bukorwa hagati y’ibihugu byombi.

Ibi ni ibikubiye mu masezerano agamije koroshya ubucuruzi buciriritse bwambukiranya imipaka, yashyizweho umukono hagati y’u Rwanda na Congo kuri uyu wa kane tariki 20 Ukwakira 2016 mu Karere ka Rubavu. Yasinywe na Minisitiri w’Ubucuruzi n’Inganda n’Umuryango w’Ibihugu bya Afurika y’u Burasirazuba, Kanimba François na Minisitiri w’ubucuruzi muri Congo, Nefertiti Ngundianza Kisura.

Aya masezerano avuga ko ubwoko 168 bw’ibicuruzwa byiganjemo ibikomoka ku buhinzi n’ubworozi byakorerwe mu bihugu byibumbiye mu muryango wa COMESA biherekejwe n’icyangombwa cy’aho byakorewe (certificat d’origine) bitarengeje agaciro k’amadorali 2,000, bizajya binyuzwa ku mupaka uhuza ibi bihugu bitishyujwe amahoro nkuko byari bisanzwe bikorwa.

Mu Rwanda habarizwa amakoperative akora ubucuruzi buciriritse bwambukiranya imipaka agera kuri 28 mu gihe muri Repubulika Iharanira Demukarasi ya Congo habarizwa amashyirahamwe (association) akora ubu bucuruzi agera kuri 12 ndetse n’abandi bantu 5,000 babukora ku giti cyabo batari muri ayo mashyirahamwe.

Mujawimana Assinah uhagarariye abakora ubucuruzi buciriritse bwambukiranya imipaka mu Karere ka Rubavu, avuga ko iki ari igikorwa kibashimishije cyane bitewe n’uko ngo bajyaga basoreshwa amafaranga nk’ay’abandi bacuruzi bafite ibicuruzwa byinshi kandi bo nta bushobozi bafite.

Ati "Nk’abacuruzi bato baciriritse, turumva ari igisubizo cyaje. Twishimiye ko ibyo twasabye kenshi bigiye gushyirwa mu bikorwa. Turasaba abacuruzi bagenzi bacu bo muri Congo ko icyemezo cy’aho igicuruzwa cyaturutse (Certificat d’origine) cyubahirizwa."

Icyakora aba bacuruzi basabye abayobozi ku ruhande rwa Congo gukurirwaho amafaranga bacibwa iyo bageze muri Congo yitwa ay’umusoro ariko adafite inyemezabwishyu.

Guverineri w’Intara y’u Burengerazuba, Munyantwari Alphonse, yasabye abakora ubu bucuruzi biganjemo igitsina gore kubyaza umusaruro aya masezerano, dore ko bari bamaze igihe bayategereje.

Minisitiri w’Ubucuruzi n’Inganda n’Umuryango w’Ibihugu bya Afurika y’u Burasirazuba, Kanimba François, yavuze ko aya masezerano ari ingenzi cyane kuko azakuraho icyabangamira ubucuruzi bwisanzuye hagati y’ibihugu byombi.

Yagize "Ubucuruzi n’ubundi busanzweho, mu by’ukuri kandi iyo urebye ubona butera imbere ariko igice kinini cyabwo cyajyaga gikorwa ku buryo usanga butanoze. Birakuraho igihe kinini cyane abantu bajyaga bakora batazi neza amategeko agenga ubwo bucuruzi, ugasanga abacuruzi baharenganira."

Yakomeje avuga ko bitarenze ibyumweru bibiri hazashyirwaho komite ihuriweho n’ibihugu byombi kugira ngo ikurikirane iyubahirizwa ry’aya masezerano.

Ubusanzwe u Rwanda na Congo ni ibihugu bisanzwe bihahirana, aho ku mupaka muto (Petite Barrière) uhuza ibi bihugu, hanyura abantu hagati y’ibihumbi 40 na 45 buri munsi.

Ibicuruzwa byanyuze kuri uyu mupaka mu 2015, bifite agaciro ka miliyoni 164.5 z’amadolari.

Minisitiri Kanimba na Nefertiti Ngundianza Kisura ni bo basinye amasezerano yo koroshya ubucuruzi hagati y’u Rwanda na Congo
Impande zombi zemeye gukuraho imbogamizi zose zari mu bucuruzi bwambukiranya imipaka
Mujawimana Assinah uhagarariye abakora ubucuruzi buciriritse bwambukiranya imipaka mu Karere ka Rubavu avuga ko amasezerano yashyizweho umukono n'impande zombi azabafasha kunoza imikorere yabo
Umuyobozi w'Akarere ka Rubavu, Sinamenye Jérémie yitabiriye isinywa ry'amasezerano hagati y'impande zombi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved