Bimwe mu bigize umugati bishobora gutera kanseri

Yanditswe na IGIHE
Kuya 21 Ugushyingo 2017 saa 08:17
Yasuwe :
0 0

Umugati n’ibindi biribwa bikoze mu ifarini bikunzwe na benshi dore ko kubibona byoroshye, gusa kimwe n’ibindi biribwa bikorerwa mu nganda, byongerwamo ibyanyabutabire kugira ngo bituubuke kandi birusheho kuryoha.

Ubushakashatsi buherutse kugaragaza ko ikinyabutabire cyitwa ‘Potassium Bromate’ gishyirwa mu mugati giteye inkeke by’umwihariko.

Cyongerwa mu ifarini y’ingano kugira ngo mu gihe bari kuyiponda ize kurushaho gukweduka no kubyimba. Kinatuma umugati uza ukandika kandi ufite n’ibara ry’imbere ryiza.

Ikigo cy’Ubuziranenge bw’Ibiribwa cy’u Buhinde, FSSAI, kivuga ko 84% by’imigati yakoreweho ubushakashatsi irimo potassium bromate (KBrO3) na potassium iodate (KIO3).

Urubuga Livescience ruvuga ko bisaba ko umugati umazwa igihe kinini mu ifuru mu bushyuhe bwinshi kugira ngo ibyo binyabutabire bidateza umubiri wa muntu ibibazo birimo kanseri.

Mu 1982 abashakashatsi bo mu Buyapani batangaje bwa mbere ko potassium bromate iteza kanseri ya thyroid (igice kiri hepfo gato y’ingoto), impyiko n’ibindi bice mu mbeba, inyamaswa zifite uturemangingo dusa cyane n’utwa muntu.

Ibihugu byinshi nk’u Bwongereza, Umuryango w’Ubumwe bw’u Burayi, u Bushinwa, Canada, Brazil, Australia na New Zealand byahise bibuza ikoreshwa ryayo mu 1990.
Muri Amerika, Leta ya California ibarira potassium bromate mu bitera kanseri ndetse yafashe ingamba zo kuburira abaturage ububi bwayo.

Ibyo bihugu bivuga ko iteza kanseri yo mu mpyiko, iy’amabya na thyroid. Ikinyamakuru Chemico-Biological Interactions kivuga ko potassium bromate idatera kanseri gusa, ahubwo ko inangiza uturemangingo fatizo tw’umuntu.

Ubundi bushakashatsi bwerekanye ko inangiza uturemangingo dufasha guhindura ibiryo mo intungamubiri.

Inganda zikora ibiribwa zakunze kwerekana ko iyo umugati umaze gushya potassium bromate ihinduka potassium bromide ntibe igiteye kanseri ariko abashakashatsi basanze no mu mugati uhiye neza bromate iba ikirimo.

Dr. G.R Neel umwarimu muri kaminuza INES Ruhengeri asanga igihe kigeze ngo hashakwe ubundi buryo bwo gukora imigati budashyira ubuzima bw’abantu mu kaga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza