Bimwe mu bigo bya Leta byatunzwe agatoki ku burangare mu gukurikirana ibigenerwa abaturage

Yanditswe na Habimana James
Kuya 17 Gicurasi 2019 saa 06:06
Yasuwe :
0 0

Umugenzuzi Mukuru w’Imari ya Leta Obadiah Biraro yabwiye abasenateri ko mu bugenzuzi bakoze basanze ibigo byinshi bya leta bidakurikirana ngo birebe niba ibyagenewe abaturage byarabagezeho uko bikwiye.

Yabitangaje kuri uyu wa Gatanu ubwo yaganiraga n’abasenateri bagize Komisiyo y’Iterambere ry’Ubukungu n’Imari kuri raporo y’ubugenzuzi y’umwaka wa 2017-2018.

Biraro yavuze ko hakiri amafaranga asohoka mu bigo bya Leta ariko wajya kureba ugasanga nta mpamvu ayo mafaranga yasohotse.

Raporo ya 207-2018 yagaragaje ko mu mishinga 86 ifite agaciro ka miliyari 143, yagaragayeho kuba yaradindiye, imwe igakererezwa cyangwa se ntikomeze gukorwa.

Senateri Bizimana Evariste yavuze ko hari ibigo bya Leta birimo Minisiteri y’imari n’igenamigambi (Minecofin), Ikigo cy’Igihugu cy’Uburezi (REB), Ikigo cy’Ubuhinzi (RAB) n’ibindi usanga bitanga amafaranga ariko ntibikurikirane uko ayo mafaranga yakoreshejwe.

Yagize ati “Minecofin niyo itanga amafaranga yagombye kujya ikurikirana amafaranga yatanzwe. Ubundi uko biba bimeze ni uko buri muntu watsindiye isoko mu kigo runaka mbere y’uko ahabwa ayo mafaranga, bakwiye gukurikirana uko ayo mafaranga rero yakoreshejwe.”

Yanagarutse kandi ku kigo cy’Igihugu gishinzwe Uburezi (REB) usanga cyohereza amafaranga mu bigo by’amashuri ngo akoreshwe mu kugura ibiryo by’abanyeshuri, nyamara ibyo biryo ntibigurwe kuko ya mafaranga anyerezwa cyangwa akahagera akererewe.

Ati “REB yohereza amafaranga ariko ntikurikirana ibyo yatanze, ikwiye gusobanura impamvu idakurikirana ayo mafaranga kuko niba yatanze miliyari 12 kugira ngo abana biga barye bareke gusinzira, kuki idakurikirana ngo imenye uko ayo mafaranga yagezeyo cyangwa yakoreshejwe ?”

Ubwo yagarukaga ku kigo cy’Igihugu cy’Ubuhinzi n’Ubworozi (RAB), yatanze urugero avuga ko ubwo Perezida Paul Kagame yasuraga ibice bitandukanye by’igihugu, wasangaga abaturage bamubaza ko batabona imbuto, nyamara Minisiteri y’Ubuhinzi n’Ubworozi yo ikagaragaza ko imbuto zaheze mu baturage.

Yavuze ko bibabaje kuba umugenzuzi mukuru w’imari ya leta yarasanze icyo amafaranga yari yaragenewe usanga ataricyo yakoze, akaba abona bizatuma iterambere ry’umuturage ritagerwaho uko bikwiye.

Umugenzuzi Mukuru Obadiah Biraro yavuze ko ikibazo gihari ari uko usanga abayobozi batagera ahari ikibazo kugira ngo bakurikirane bamenye n’uko icyo kibazo cyakemuka.

Yabwiye abasenateri ko niba umuyobozi ahabwa imodoka nziza na buri kintu cyose gikenerwa, binakwiye ko ajya ahari ikibazo akakimenya kigakemuka.

Yagize ati “Nk’ubu hari umwana wiga atariye kandi leta yarashyizeho ingengo y’imari ariko ntibikorwa kuko usanga amafaranga ageze ku ishuri mu cyumweru cya nyuma cy’igihembwe abana bagiye gutaha. N’iyo umwana yahomba ibintu ibyumweru bibiri gusa, aba azagira ikibazo mu myaka 60 yose iri imbere.”

Yavuze ko ireme ry’uburezi ari ikintu gikwiye guhabwa agaciro gakomeye kandi kikitabwaho.

Raporo y’umugenzuzi mukuru w’imari ya Leta y’umwaka warangiye muri Kamena 2018, igaragaza ko amafaranga yasohotse nta nyandiko ziyasobanura ari 524 138 983.

Amafaranga yasohotse inyandiko zayo zidahagije mu 2018 ni 2 616 803 323 Frw naho amafaranga yasohotse nta burenganzira angana na 196 299 154 Frw mu gihe amafaranga yanyerejwe cyangwa yasohotse mu buriganya ari 136 307 930 Frw.

Umugenzuzi Mukuru Obadiah Biraro yavuze ko ikibazo gihari ari uko usanga abayobozi batagera ahari ikibazo kugira ngo bakurikirane bamenye n’uko cyakemuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza