BNR igiye gukusanya amafaranga ari mu mabanki kuri konti zasizwe na bene zo

Yanditswe na Kanamugire Emmanuel
Kuya 8 Mutarama 2017 saa 03:41
Yasuwe :
0 0

Banki Nkuru y’u Rwanda, BNR, yasabye amabanki n’ibigo by’imari bibitse amafaranga kuri konti zasizwe na bene zo, kuyimurira muri Banki Nkuru y’igihugu kugira ngo abashe gucungwa nk’umutungo wasizwe na bene wo nk’uko biteganywa n’itegeko.

Nk’uko The EastAfrican yabitangaje, itangazo BNR iheruka gushyira hanze risaba amabanki, ibigo by’imari n’izindi nzego z’imari kwimurira muri Banki Nkuru y’Igihugu amafaranga yose yasizwe na bene yo ari kuri konti zabo, agashyirwa kuri konti yagenwe na BNR, kandi bagatanga raporo zihoraho kuri konti zasinziriye.

Iryo tangazo rivuga ko ayo mafaranga “agomba kwimurirwa muri Banki Nkuru y’Igihugu mu gihe kitarenze iminsi 30.”

BNR igamije gushyira mu bikorwa itegeko ryo mu 2015 ryerekeye imicungire y’imitungo yasizwe na bene yo, riha inshingano Banki Nkuru zo kumenyesha Minisiteri y’Ubutabera amakuru yose ajyanye n’amafaranga yasizwe na bene yo kuri konti ziri muri banki n’ibigo by’imari.

Ingingo ya gatanu y’iryo tegeko igena ko ‘bisabwe na Minisiteri ifite ubutabera mu nshingano zayo, Banki Nkuru y’Igihugu imenyesha iyo Minisiteri umubare w’amafaranga yasizwe na bene yo ari mu mabanki n’ibindi bigo by’imari.’

‘Bitabangamiye ibiteganywa n’andi mategeko kandi bisabwe n’urwego rubifitiye ububasha, urukiko rubifitiye ububasha rushobora kwemeza ko amafaranga avugwa mu gika cya mbere cy’iyi ngingo yimurirwa kuri konti ntakorwaho ifungurwa muri Banki Nkuru y’Igihugu.’

Iryo bwirizwa ryasohotse mu igazeti ya leta mu Ukuboza 2016, rivuga ko icyo gikorwa kigomba guhita gishyirwa mu bikorwa kigitangazwa mu igazeti ya leta.

Abanyamabanki bavuga ko gutanga raporo kuri konti zasinziriye mu gihe cy’imyaka itanu bisanzwe bikorwa na banki mu Rwanda, ku buryo ibi bizajyana no kwimura amafaranga amaze imyaka itanu cyangwa kuzamura adakurikiranwa.

Umuyobozi wa KCB Rwanda akaba ari nawe ukuriye ihuriro ry’abanyamabanki mu Rwanda, Maurice Toroitich, yabwiye The EastAfrican ko ari gahunda izahita ishyirwa mu bikorwa.

Ati “Banki ziratangira vuba aha kwimura ayo mafaranga atagira gikurikirana ariko birumvikana bazajya babanza gukora ibishoboka byose ngo bavugane na ba nyirazo ku buryo kwimurira ayo mafaranga muri Banki Nkuru y’Igihugu bizajya bibaho nyuma yo kubura nyiri konti.”

Amabwiriza ya BNR asaba banki, ibigo by’imari n’ibitanga serivisi z’imari hifashishijwe ikoranabuhanga kumenyesha ba nyiri konti ko amafaranga yabo ashobora kwimurirwa muri Banki Nkuru, nibura mbere y’umwaka ngo imyaka itanu ibarirwaho yuzure.

Mu gihe hari aho byaba bigaragaye ko banki zitagiye zimura ayo mafaranga, zizajya zihabwa ibihano.

Itegeko rigena ko iyo nyir’umutungo yigaragaje, asubizwa amafaranga ye ava kuri konti ndakorwaho iba muri Banki Nkuru y’igihugu bisabwe na Minisiteri y’ubutabera, akayasubizwa havanyweho 10% ajya mu isanduku ya Leta.

Bisabwe n’Intumwa Nkuru ya Leta, iyo amafaranga yashyizwe kuri konti ndakorwaho atabonye bene yo, yegurirwa Leta hakurikijwe igihe cy’ubuzime giteganywa n’amategeko, byemejwe n’urukiko rubifitiye ububasha.

Imitungo byitwa ko yasizwe na bene yo niba “barapfuye kandi nta muntu uriho wo kubazungura wemewe n’amategeko cyangwa batari mu Rwanda kubera impamvu zinyuranye kandi bakaba ntawe basize wo kuyicunga ubifitiye uburenganzira.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244