Kwamamaza

BRD yatanze miliyoni 22 zo kuzahura ihuriro ry’abohereza ibicuruzwa mu mahanga

Yanditswe kuya 13-11-2016 saa 10:03' na Cyprien Niyomwungeri


Banki Itsura Amajyambere y’u Rwanda, BRD, yasinyanye amasezerano n’urugaga rw’abikorera mu Rwanda, PSF, akubiyemo miliyoni 22 z’amafaranga y’u Rwanda, zizafasha abikorera gushyiraho ihuriro ry’abacuruzi bohereza ibicuruzwa mu mahanga.

Aya masezerano yasinywe kuri uyu wa Gatanu tariki 11 Ugushyingo 2016, azafasha abohereza ibicuruzwa mu mahanga kongera kugira urubuga bajya bahuriramo kugira ngo baganiriremo amahirwe ahari n’ibibazo bahuriramo nabyo, bityo banabishakire ibisubizo.

Nyuma yo gusinya amasezerano, Umuyobozi w’urugaga rw’abikorera mu Rwanda, Benjamin Gasamagera, yavuze ko iri huriro ryigeze kujyaho ariko rikaza kunanirwa gukora kubera ubushobozi buke. Yongeraho ko amasezerano basinye azabafasha kurubyutsa no kugera ku ntego yo kuziba icyuho kiri hagati y’ibyo u Rwanda rutumizayo n’ibyo rwoherezayo.

Yagize ati “Aya masezerano ni ukugira ngo urwo rubuga twongere kurutiza ingufu kuko rwasaga n’urwazimye kubera kubura ubushobozi. Twatangiye dufite ubushobozi twakuraga muri Minisiteri y’ubucuruzi n’inganda, biza gusa n’ibihagarara. Kuba uru rubuga rugiye kongera gutizwa ingufu ni ikintu cyiza cyane, kuko kohereza ibicuruzwa mu mahanga birakenewe cyane.”

Miliyoni 22 BRD yatanze zizifashishwa mu guhemba umukozi uzajya ukora mu buryo buhoraho. Uyu mukozi azajya ahuza amakuru y’ibijyanye n’abohereza ibicuruzwa mu mahanga, ibibazo byagaragaye ku masoko n’ibindi bikenewe kugirango abakora uwo murimo bawukore neza.

Umuyobozi Mukuru wa BRD, Alexis Kanyankole, yavuze ko iryo huriro rizatuma abohereza ibicuruzwa mu mahanga babyaza umusaruro ikigega bashyiriweho, kuko rizabafasha kunonosora ibisabwa, bitume babasha kugera ku mari ikenewe muri ako kazi, kugabanyirizwa inyungu ku nguzanyo no guhabwa ubundi bufasha ku bashaka kwinjira ku isoko rigoranye.

Yagize ati “Tuzarushaho gusangira amakuru, gusuzumira hamwe inzitizi zihari tuzishakira ibisubizo n’umuti wo kubirangiza.”

U Rwanda rwohereza mu mahanga ibicuruzwa birimo icyayi, ikawa, amabuye y’agaciro, imboga, imbuto, indabyo n’ibindi bikomoka ku bworozi nk’inyama n’impu.

Umuyobozi wa PSF n'uwa BRD bahererekanya amasezerano

<img180669

Umuyobozi wa PSF, Benjamin Gasamagera

|center>


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved