Kwamamaza

U Rwanda rusanga raporo y’Inteko ya EU kuri Ingabire Victoire ari agasuzuguro

Yanditswe kuya 12-10-2016 saa 09:31' na Philbert Hagengimana


Minisitiri w’Ubutabera akaba n’Intumwa Nkuru ya Leta, Johnston Busingye, yamaganye imyanzuro yasohowe n’Inteko Ishinga Amategeko y’Umuryango w’Ubumwe bw’u Burayi (EU), yanenze urwego rw’Ubutabera bw’u Rwanda ishingiye ku kibazo cya Ingabire Victoire, ikanasaba ko urubanza rwe rwasubirwamo.

Ku wa 5 Ukwakira ni bwo iyi Nteko Ishinga Amategeko y’Umuryango w’Ubumwe bw’u Burayi (EU) yasohoye imyanzuro ku Rwanda no ku kibazo cya Ingabire Victoire, nyuma y’urugendo itsinda ry’abadepite umunani bayo bagiriye mu Rwanda hagati ya tariki 19-22 Nzeri.

Ubwo itsinda ry’Abadepite bagize Komisiyo y’Uburenganzira bw’Abagore n’Uburinganire mu Nteko Ishinga Amategeko y’Umuryango w’Ubumwe bw’u Burayi bari bakubutse mu Rwanda, basohoye raporo ikubiyemo imyanzuro ku bwisanzure bw’itangazamakuru, imiyoborere y’u Rwanda, imiterere y’amategeko, urubanza rwa Ingabire Victoire n’amatora ya Perezida ategerejwe mu 2017.

Ku by’urubanza rwa Ingabire Victoire, abo badepite bavugaga ko rutaciwe mu mucyo, bagasaba ko rwaseswa maze rugasubirwamo bundi bushya.

Ubwo hari hasojwe umuhango w’ihererekanyabubasha hagati y’iyari Minisiteri y’Umutekano na Minisiteri y’Ubutabera, Minisitiri Busingye yamaganye ibyo iyo Nteko Ishinga Amategeko y’Umuryango w’Ubumwe bw’u Burayi, avuga ko ari n’agasuzuguro, dore ko ibyo iyo raporo isaba nta tegeko na rimwe bikurikiza mu yo u Rwanda rugenderaho.

Minisitiri Busingye yagize ati “Biriya ni agasuzuguro. Ntabwo iyo nzira tuyizi mu nzira z’ubujurire, Inteko ya EU ntabwo ari inzira y’ubujurire. Inkiko zacu zikorera ku mategeko y’u Rwanda atorwa n’Inteko Ishinga Amategeko. Ntabwo umunyarwanda yaba yihitira hariya mu muhanda ngo avuge ati ‘ariko ndashaka ko uru rubanza ruburanishwa hanyuma ngo inkiko zihite zitangira kuburanisha urwo rubanza, ibyo ni ibintu by’agasuzuguro’."

“Ni ibintu dutekereza ko Inteko Ishinga Amategeko yacu yabonye umwanya uhagije wo kubisubiza, ibyo ni ibintu byo kuvanga politiki mu bucamanza, kandi ibyo ntibishoboka, biriya wabishingiraho ute wowe? Ni inzira yitwa iyihe? Ni ubujurire, ni avoka, ni ubusabe…byitwa iki biriya?”

“Wagasoma ibintu mu kinyamakuru ngo ngaho subirishamo urubanza noneho urukiko…uruhe se? Niba umuntu yaraburanye agahetura inkiko zose z’u Rwanda akagera mu rw’Ikirenga, nta kindi kirego cye nzi cyicaye ahantu aho ari ho hose, undi muntu runaka wihitira mu muhanda w’inshuti ye cyangwa umukunda… ubwo busabe bwitwa iki?”

Urubanza rwa Ingabire Victoire rwatangiye kuburanishwa mu mwaka wa 2010, Urukiko rukuru rumuhanisha igifungo cy’imyaka 8 nyuma yo kumuhamya ibyaha byo kugambanira igihugu agamije kukivutsa umudendezo no kurema umutwe w’abagizi ba nabi ndetse no gupfobya Jenoside yakorewe Abatutsi.

Mu ntangiriro za 2013, Ingabire kimwe n’Ubushinjacyaha, bajuririye Urukiko rw’Ikirenga ku bihano yari yahawe, ubujurire bwe buza guteshwa agaciro ndetse igihano yari yahawe kiyongeraho imyaka irindwi y’igifungo.

Nta cyuho kiri mu butabera bw’u Rwanda

Nyuma y’aho Abadepite mu Nteko Ishinga Amategeko y’Umuryango w’Ubumwe bw’u Burayi bashushe nk’abakemanga cyangwa bajora ubutabera bw’u Rwanda, Minisitiri Busingye yunze mu ry’Inteko Ishinga Amategeko y’u Rwanda (imitwe yombi), maze abyamaganira kure.

Ati “Abo bantu barabeshya, nta cyuho kiri mu butabera bw’u Rwanda, iyo kiza kubamo ntabwo u Rwanda ruba rwizewe n’imiryango mpuzamahanga myinshi n’ibindi bihugu byinshi. Abo babivuga nta gihugu nzi bahagarariye, ahubwo ibihugu tuzi dukorana na byo ku mugabane w’u Burayi, Amerika, Canada, n’inkiko mpuzamahanga, zose ni inzego zifitiye icyizere ubutabera bw’u Rwanda, kuko iyo batakibugirira ntimwajyaga kubona abantu bohereza umusubirizo ngo baze kuhaburanira imanza zitandukanye.”

Mu biganiro nyunguranabitekerezo kuri iyo myanzuro y’abadepite ba EU, byahuje abadepite n’abasenateri kuwa Mbere tariki 10 Ukwakira, bahurije ku kuvuga ko iyo raporo ntaho ihuriye n’ibyari byabazanye mu Rwanda, ahubwo ko ari imyanzuro baje bafite neza.

Depite Mukabagwiza yavuze ko bibabaje kubona imyanzuro ivuga ko “ubucamanza bwacu budakora neza, cyane cyane nk’Urukiko rw’Ikirenga, bakarengera bakavuga ko butagaragaje ubushobozi mu guca imanza z’abanyapolitiki bafite amazina akomeye, ahanini bigaragara ko bavuga urubanza rwa Ingabire Victoire.”

Ati “Njye ndavuga ko Ingabire Victoire ndetse n’abandi banyapolitiki bari muri urwo rubanza ntabafata nk’abari ku rwego rwo hejuru, kuko abanyapolitiki bo kuri urwo rwego bafite uko bagaragara, ari mu myitwarire, ari mu mvugo, ari no mu mikorere ya Politiki.”

Yavuze ko abo badepite banyuranije n’imyanzuro y’urukiko rw’ibihugu by’i Burayi rushinzwe uburenganzira bwa muntu, mu Ukwakira 2011 rwizeye ubucamanza bwo mu Rwanda rukemera ko Umunyarwanda Sylvere Ahorukomeye wari muri Suède, akurikiranyweho Jenoside, yoherezwa mu Rwanda.

Inteko Ishinga Amategeko y’u Rwanda imitwe yombi yahise itora umwanzuro uvuga ko “yamaganye umwanzuro w’Inteko ya EU ku Rwanda inasaba iyo nteko kwisubiraho kuko imyanzuro yayo idashingiye ku kuri.”

Minisitiri w'Ubutabera akaba n'Intumwa Nkuru ya Leta, Johnston Busingye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved