Radio Izuba igiye kubyara Televiziyo

Yanditswe na IGIHE, Uwishyaka Jean Louis
Kuya 8 Mutarama 2017 saa 06:50
Yasuwe :
0 0

Ubuyobozi bushya bw’umuryango ADECCO washinze Radio Izuba ikorera mu karere ka Ngoma, mu Ntara y’u Burasirazuba, bwatangaje ko mu mpera z’uyu mwaka iyi radio izatangiza Televiziyo (Izuba TV), izatangira gukora itwaye akayabo ka miliyoni 120 z’amanyarwanda.

Ibi byatangarijwe Nama y’Inteko rusange y’uyu muryango yateranye ku wa Gatandatu, tariki 7 Mutarama, hagamijwe kugaragaza ibyagezweho muri manda ishize y’abawuyoboraga, hanatorwa abagomba kubasimbura.

Radio Izuba ni yo Radio y’abaturage ya mbere yabayeho mu Rwanda, muri 2004. Yashinzwe n’umuryango nyarwanda utegamiye kuri Leta ADECCO, ufite intego yo kwimakaza imiyoborere myiza no guteza imbere abaturage biciye mu itangazamakuru.

Guverineri w’Intara y’u Burasirazuba, Judith Kazayire wari muri iyi Nteko rusange, yavuze ko Radio Izuba ifite uruhare mu guteza imbere abaturage b’iyi ntara, haba mu myumvire n’ibindi.

Ati "Radio Izuba ifite uruhare rukomeye mu kuzamura imyumvire y’abaturage b’iyi Ntara. Iyo ijwi ry’umuturage ryumvikana kuri Radio Izuba, rigahura n’iry’umuyobozi we, bakaganira, bagahanahana amakuru, byihutisha iterambere.”

Emmanuel Munyandinda watorewe kuba umuyobozi wa ADECCO, yavuze ko we na komite bagiye gufatanya kuyobora manda y’imyaka itatu,bazakoresha imbaraga zose mu guteza imbere abagize intara biciye mu itangazamakuru.

Yakomeje agaragaza bimwe mu bikorwa bateganya muri iyi manda nshya batorewe harimo kunoza imikoranire n’abafatanyabikorwa batandukanye kugira ngo hahurizwe hamwe imbaraga bityo iterambere ry’Intara y’u Burasirazuba rikomeze kugerwaho. Yongeyeho ko mu mpera z’uyu mwaka hazatangizwa umushinga wa Televiziyo Izuba izaba yunganira radio imaze imyaka 12 itangiye imirimo yayo.

Radio Izuba ikorera mu Murenge wa Kibungo, mu Karere ka Ngoma, ikaba ivugira ku murongo wa 100Mhz, aho inafite ishami mu Karere ka Rwamagana.

Mu 2016, yahawe igihembo n’Ikigo cy’Imiyoborere, RGB cyo kuba Radio y’abaturage ya mbere yakunzwe muri uwo mwaka.

Radiyo Izuba igiye kunguka Televiziyo bitarenze uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244