Bwa mbere Zimbabwe igiye gufungura ambasade mu Rwanda

Yanditswe na Ferdinand Maniraguha
Kuya 8 Kamena 2019 saa 02:13
Yasuwe :
0 0

Igihugu cya Zimbabwe bwa mbere kigiye gufungura ambasade yacyo izaba ifite icyicaro i Kigali.

Inama y’abaminisitiri yateranye kuri uyu wa Gatanu, yemeje ko Prof. Charity Manyeruke aba ambasaderi wa Repubulika ya Zimbabwe ufite icyicaro i Kigali.

Ubusanzwe inyungu za Zimbabwe mu Rwanda zakurikiranwaga na ambasade yayo iherereye i Dare es Salaam muri Tanzania.

Umunyamabanga wa Leta muri Minisiteri y’Ububanyi n’Amahanga, Amb. Olivier Nduhungirehe yabwiye IGIHE ko ambasade ya Zimbabwe biteganyijwe ko izafungura imiryango i Kigali mu gihe cya vuba kuko imyiteguro irimbanyije.

Yavuze ko kuba icyo gihugu kigiye kugira ambasade mu Rwanda bigaragaza umubano u Rwanda rukomeje kugirana n’ibihugu bya Afurika.

Yagize ati “Bigaragaza ko umubano n’ibihugu bya Afurika umaze kwiyongera kuko hari ambasade nyinshi zagiye zifungurwa. By’umwihariko muri Afurika y’Amajyepfo tumaze kuhafungura ambasade nyinshi.”

Nduhungirehe yavuze ko kuba Zimbabwe igiye gufungura ambasade mu Rwanda ari n’amahirwe ku bakora ubucuruzi ndetse no ku banyarwanda babayo.

Ati “Ni amahirwe mu kongera ubucuruzi n’ubuhahirane hagati y’u Rwanda na Zimbabwe no gufatanya guteza imbere umuryango nyarwanda uba muri icyo gihugu.”

Mu bihugu byo mu Majyepfo ya Afurika hatuyeyo abanyarwanda benshi barimo abagiye gukorerayo ubucuruzi n’abagiye bajyayo nk’impunzi.

Amb. Nduhungirehe yavuze ko muri ibyo bice hakunze no kugaragara ingengabitekerezo ya Jenoside ku buryo kugirana umubano n’ibyo bihugu bizafasha mu kuyihashya.

Umwaka ushize u Rwanda narwo bwa mbere rwafunguye ambasade yarwo muri Zimbabwe ndetse muri Mutarama uyu mwaka Ambasaderi James Musoni yashyikirije Perezida Emmerson Dambudzo Mnangagwa impapuro zimwerera guhagarira u Rwanda muri icyo gihugu.

Muri Mata 2017, Sosiyete Nyarwanda ikora ubwikorezi bwo mu kirere, RwandAir, yatangije ingendo zijya i Harare muri Zimbabwe.

Rwandair ikora ingendo enye mu cyumweru, aho indege ihaguruka i Kigali ikagwa Lusaka muri Zambia, ikabona gukomeza Harare.

Perezida Paul Kagame (ibumoso) na Perezida Emmerson Mnangagwa wa Zimbabwe bafitanye umubano mwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza