Kwamamaza

Byaba ari ikosa rikomeye kugereranya demokarasi n’amatora – Perezida Kagame

Yanditswe kuya 28-11-2016 saa 09:29' na Philbert Girinema


Ni kenshi ibihugu by’amahanga byagiye bigaragaza ko ibindi byayoboka umurongo wa demokarasi bigenderaho, ibintu Perezida Paul Kagame atahwemye kwamaganira kure avuga ko imikorere y’igihugu kimwe bitavuga ko ariyo ibereye ikindi.

Perezida Kagame avuga ko ‘atakwigisha’ ibi bihugu byo mu Burengerazuba bw’Isi uko byitwara cyangwa ngo ibihugu byatereranye u Rwanda mu 1994 abe aribyo bishaka kurwigisha uko rugomba kubaho, ahubwo ibihugu bikwiye kugira ubwisanzure bwo gukora ibibereye abaturage babyo.

Mu gihe hashize umwaka Abanyarwanda bemeje ivugururwa ry’Itegeko Nshinga riha uburenganzira Perezida Kagame w’imyaka 59 kuba yakwiyamamariza indi manda y’Umukuru w’Igihugu mu 2017, uyu mwanzuro ntiwashimishije amahanga nk’aho Leta Zunze Ubumwe za Amerika zavuze ko ‘itunguwe bikomeye’.

Mbere gato y’uko miliyoni zisaga 60 z’Abanyamerika zitoreye Donald Trump kuyobora Leta Zunze Ubumwe za Amerika, Perezida Paul Kagame yaganiriye n’ikinyamakuru City Press ku ngingo zitandukanye zirimo na demokarasi, avuga ko ibihugu byo mu Burengerazuba bw’Isi bisobanura demokarasi bijyanishije n’uko byo bibayeho.

Ku mubare wa manda

Perezida Kagame yavuze ko byaba ari ‘ikosa rikomeye cyangwa kwitiranya ibintu kunganyisha demokarasi n’amatora’

Ibyo yabisobanuye agira ati “Muri politiki, umuntu utsinze ashobora kuba atari we ufite ubushobozi kurusha abandi. Hari ibintu byinshi bishobora kugenderwaho kugira ngo umuntu atsinde. Ni cyo gituma igomba [demokarasi] kwitonderwa– uzabona abantu bafite uko bavuga ibintu nubwo baba atariko babyemera, ariko bakabikora ngo batsinde.’’

Muri ibyo bikorwa, ngo haba hagiyeho umuntu ushobora guteza ikibazo ku baturage. Mu matora ngo nubwo yakorwa muri demokarasi, ashobora gutanga umuntu w’intwari ku baturage cyangwa umunyagitugu, nk’uko bishoboka ku guhindura umubare wa manda z’Umukuru w’Iguhugu.

Ati " Kimwe n’uko amatora aciye mu nzira za demokarasi ashobora kuganisha ku gutanga umuyobozi w’intwari cyangwa undi w’umunyagitugu; kongera umubare wa manda nabyo bishobora kugeza aheza cyangwa bigakurura ibibazo.”

Muri icyo kiganiro n’Umunyamakuru Waldimar Pelser, Perezida Kagame yakomeje agira ati “Mwabonye ukuntu mu bihugu bimwe na bimwe bya Afurika, bagiye bagerageza gushaka gukuraho umubare wa manda, hakavuka imvururu. Ariko mu bindi, harimo n’igihugu cyanjye, hari kuba ikibazo ahubwo iyo hadakurikizwa ibyo basabaga ko manda zihindurwa.’’

Nubwo iyi miryango iharanira uburenganzira bwa muntu n’ibihugu bikomeye byavuze byinshi ubwo Itegeko Nshinga ry’u Rwanda ryavugururwaga rikemerera Perezida Kagame kuba yakongera kwiyamamaza, ntacyo bavuze ubwo Chancellier w’u Budage, Angela Merkel yatangazaga ko agiye kwiyamamariza manda ya kane mu 2017, umwanzuro wanashyigikiwe n’Abadage benshi.

Umubare wa manda ntukwiye kugereranywa na demokarasi

Perezida Kagame yagize ati “Hari ibyiza byo kugira umubare ntarengwa wa manda, ariko ntabwo ari intangiriro n’iherezo bya demokarasi. Ibyakunze aha ntabwo bishobora gukunda hariya. Muri Amerika ntabwo batangiranye n’umubare wa manda, ndetse n’igihe babishyizeho, byaje kuvaho. Nyuma baje kongera babigarukaho.’’

“Ibintu byahindutse kubera impamvu, amateka n’igisobanuro. Kuki bashaka ko ubwo buryo bukora mu bihugu byose bya Afurika? Nkaho twese turi bamwe kandi tubayeho kimwe.”

Perezida Kagame yavuze ko ku gihugu nk’u Rwanda gikeneye kubaka inzego zacyo zizakibashisha gutera imbere. Ati “Muduhe igihe cyo kubaka inzego zacu, ahari umwe azavuga ngo imyaka 16 ntabwo ihagije, turashaka indi 10.”

Urugendo rwo kwiyubaka

Nyuma ya Jenoside yakorewe abatutsi mu 1994 yanatijwe umurindi n’amashyaka menshi abo mu Burengerazuba bw’Isi bavuga ko aranga demokarasi, u Rwanda rwahisemo inzira yo kongera kwiyubaka ndetse rushyira imbere gushimangira Ubunyarwanda, rwita ku kunga ubumwe aho guha umwanya ibiruca intege.

Nk’umusaruro wa gahunda zinyuranye, ubukungu bw’igihugu bwatangiye kuzamuka ku 8% mu myaka 14 ishize, mu 2006 hakaba haratangijwe na gahunda ya Girinka yitaga ku koroza imiryango itishoboye, ubu ikaba imaze gutangwamo inka 250 000.

Perezida Kagame ati “Uha umuryango inka. Igakura, ikororoka hanyuma igatanga amata. Reka tuvuge litiro 15. Litiro eshanu muri izo cyangwa kimwe cya kabiri cy’izo litiro ziranyobwa mu rugo. Izisigaye zikajyanwa ku isoko.’’

“Imiryango ibona amafaranga avuyemo kandi bananyoye amata bakabona intungamubiri. Inyana ya mbere ihabwa umuturanyi, bisobanuye ko hari umubano uhita wubakwa mu baturage. Iyo gahunda yatangiye no gufasha mu bijyanye n’ubwiyunge.’’

Ku hazaza h’u Rwanda…

Nyuma y’amahano yagwiriye u Rwanda mu 1994, u Rwanda rwakoze ibishoboka mu kongera kwiyubaka, rukumira ingengabitekerezo ya jenoside n’ibindi byashoboraga guhembera amacakubiri, birimo amoko yagaragaraga mu ndangamuntu.

Gusa Perezida Kagame avuga ko afite icyizere ko u Rwanda ruri kugana aheza. Ati “ Mfite ibyiyumviro ko ahazaza ari heza ndetse turi kurenga ibijyanye n’amacakubiri. Hazakomeza kubaho ibibazo mu muryango. Ntabwo abantu bakorewe mu nganda, ntabwo ushobora kubaha guhuza ibintu byose.”

“Ariko muri rusange ubona ko igihugu kiri kwisubiranya, kandi hari andi masano yubatswe mu mibanire atuma igihugu cyunga ubumwe. Navuga ko turi imbere y’ibindi bihugu bitanagize amateka nk’ayacu.’’

Perezida Kagame ati "Mfite ibyiyumviro ko ahazaza ari heza ndetse turi kurenga ibijyanye n’amacakubiri"

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved