Kwamamaza

Byagendekeye gute Wendy Murphy nyuma yo guhabwa umukoro na Perezida Kagame?

Yanditswe kuya 6-11-2016 saa 14:58' na Philbert Girinema


Kuwa 20 Ukwakira 2016, Umunya-Pologne Wendy Murphy Skorupski yandikiye Perezida Kagame kuri twitter amubaza uko afata abamuvugaho ko ayoboza igitugu. Nyuma y’amasaha make yaramusubije amubwira kwibariza Abanyarwanda icyo batekereza, nyuma akabona igisubizo.

Icyo gihe Wendy n’Umuryango we bari baje mu Rwanda mu biruhuko no gufasha umukobwa wabo kumenya amateka ya Jenoside; gusa ibihe byabo byaje kuzamo umukoro wababereye isomo rikomeye mu buzima n’inkuru bazabarira abandi.

Nyuma yo kubijyaho inama n’umugabo we, uyu mugore ufite inkomoko mu Bwongereza na Pologne yandikiye Perezida Kagame amubaza ati “Paul Kagame twanyuzwe cyane n’igihugu cyanyu. Ni iki mubwira abantu batekereza ko imiyoborere yanyu ari iy’abanyagitugu?’’ Ni ikibazo bagize biturutse ku byo bari basanzwe basoma ku Rwanda mu binyamakuru bitandukanye n’ibyo bari biboneye n’amaso yabo.

Nyuma y’amasaha ane n’iminota 15, Perezida Kagame nawe yahise amusubiza ati “Ntutinye kuzenguruka mu gihugu hose ugenda ubaza… ubundi ufate umwanzuro ku gikwiye kwizerwa! Utekereza iki ku bavuga ibinyuranye nabyo?’’

Mu nyandiko Wendy yasangije IGIHE ivuga ku rugendo rwe mu Rwanda, yavuze ko nyuma kubaza iki kibazo; abantu benshi bamwandikiye ‘bagaragaza ko bashyigikiye Perezida wabo banadusaba kuzagaragaza ubwiza bw’igihugu cyabo ubwo tuzaba dutashye’.

Ati “Banadusabye guhangana n’ibyandikwa n’abanyamakuru bo mu Burengerazuba bw’Isi batumva neza ibitangaza Kagame yashoboye gukora mu gusubiranya igihugu cyari cyacitsemo ibice nyuma ya Jenoside yo mu 1994.”

Nyuma nibwo babonanye n’abayobozi babiri barimo Depite Gatabazi Jean Marie Vianney na Merard Mpabwanamaguru ushinzwe iterambere ry’Umujyi wa Kigali, babagaragariza byimbitse intambwe u Rwanda rumaze gutera nyuma y’imyaka 22 ishize banashishikariza abandi batazi u Rwanda kuza kwihera amaso.

Babonanye n’ingeri zose z’Abanyarwanda

Wendy avuga ko mu minsi 10 bamaze mu Rwanda babonanye n’ingeri zose kuva ku bashoferi ba taxis kugera ku no ku bagenzi bihitiraga mu Mujyi wa Kigali.

Ati “Twaganiriye n’Abanyarwanda b’ingeri zose barimo umushoferi watunze urutoki ku nyubako zigezweho zari hafi aho, agaragaza ko ari bimwe mu byo Kagame agezeho mu kongera kubaka igihugu; Umucuruzi w’amabahasha warokotse Jenoside yihishe mu gisenge utazibagirwa imiborogo y’umuryango we ubwo yicwaga; umugenzi wihitiraga ku muhanda akinjira mu kiganiro cyacu wanavuze ko Perezida Kagame ariwe muntu wenyine ukwiye gukomeza kurangaza u Rwanda imbere.”

Wendy yakomeje avuga ko kuri ubu u Rwanda ari kimwe mu bihugu bitekanye umuntu akwiriye gusura muri Afurika ndetse bitewe n’ubukungu bwacyo buri kuzamuka cyane ‘ni igihugu kibereye ishoramari muri Afurika’.

Ati “ Ni igihugu cyiza cyuje imisozi migufi n’imiremire, ibirunga, icyayi n’insina, ibiyaga birebire bisa n’inyanja ndetse kikagira n’abantu bagira urugwiro. Gusa nta na kimwe cyari gushoboka hatabayeho ubumenyi n’umuhate by’uwari Umujenerali w’Ingabo za RPF, wamenesheje agatsiko k’intagondwa z’Abahutu zarimo abasirikare bakuru n’abanyapolitiki bari mu cyiswe ‘Hutu Power, agahagarika Jenoside ndetse akaza kuba Perezida.”

Igisubizo ku mukoro wa Perezida Kagame

Wendy yasubije ibyo Perezida Kagame yari yamusabye agira ati “Abanyarwanda twahuye mu minsi yose twahamaze, bahamya neza ko gahunda zawe zerekana ko n’ibyo abantu bafata nk’ibidashoboka, byagerwaho.”

Kuwa 28 Ukwakira nibwo Wendy Skorupski yuriye rutemikirere asubira iwabo, anyura Amsterdam mu Buholandi aho yafatiye indege imukomezanya mu Mujyi wa Krakow muri Pologne.

Muri Pologne Wendy n’umugabo we bahashinze amashuri abiri yigisha mu buryo bw’Abongereza, British International School.

Wendy n'Umuryango we bari kumwe na Mpabwanamaguru
Wendy yavanye mu Rwanda inkuru azabarira bagenzi be
Wendy n'Umuryango we, Mpabwanamaguru na Depie Gatabazi mu biganiro kuwa 25 Ukwakira 2016

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved