Byinshi kuri Supermarketings yasize amarira no kubunza imitima ku bayiyobotse

Yanditswe na HABIMANA James
Kuya 4 Kamena 2019 saa 01:10
Yasuwe :
0 0

Amezi atandatu yari ashize abatari bake biganjemo urubyiruko, bayobotse ikigo kizwi nka Supermarketings Global Ltd, aho bashoragamo amafaranga yabo na cyo kikabungukira mu buryo bavugaga ko budasanzwe.

Abanyarwanda barenga 6000 bari barayobotse ubu bucuruzi bw’amafaranga butemewe mu Rwanda, aho bari bamaze gushoramo arenga ibihumbi 79 by’amadolari, ni ukuvuga miliyoni zirenga 71 z’amafaranga y’u Rwanda.

Tariki 31 Gicurasi Urwego rw’Igihugu rw’Ubugenzacyaha (RIB), rwataye muri yombi umuyobozi w’iki kigo cya Supermarketings Global Ltd, ikora ubucuruzi bw’amafaranga burimo uburiganya (Cripto-Currency scam).

RIB yavuze ko ubu bucuruzi Supermarketings Global yakoraga butandukanye n’ubwo yasabiye ibyangombwa mu kigo cy’igihugu cy’iterambere (RDB), kuko yagombaga gukora harimo ibikorwa by’ubufasha mu bijyanye n’uburezi.

Urupapuro rwagaragaje iyandikwa ry’iyi kompanyi, rugaragaza ko abanyamigabane bayo ari uwitwa Nsengiyumva Jean Bosco na Uwizeyimana Israel.

RIB yatangaje ibi nyuma y’amasaha make Banki Nkuru y’u Rwanda (BNR) iburiye abanyarwanda n’abaturarwanda kwirinda gukorana n’abantu cyangwa ibigo bitabyemerewe byizeza indonke y’amafaranga abantu babigana hashingiwe ku ngano y’amafaranga yabikijwe, ibicuruzwa cyangwa serivisi byaguzwe n’umubare w’abakiriya babyitabiriye.

Uko Supermarketings Global Ltd yakoraga

Iyo usuye urubuga rwa interinet rw’iki kigo, bakwereka ko mu gihe wifuza gukorana nabo hari amafaranga ugomba kwishyura, ku buryo nabo buri munsi hari ayo bakungukira.

Nk’uko bigaragara, uwashakaga kwinjira muri Supermarketings Global Ltd yishyuraga amafaranga ariko akayishyura hakurikijwe agaciro k’idolari.

Urugero uwatangizaga amadorali 30, iki kigo cyamwungukiraga amadorali 0.75 ku munsi, utanze amadorali 60 akungukirwa amadorali 1.5 ku munsi, utanze amadorali 120 we yungukaga amadorali 3 ku munsi, utanze amadorali 240 akungurwa amadorali 6 ku munsi.

Utanze amadolari 480 akunguka amadorali 12 ku munsi, utanze amadorali 960 akunguka amadorali 28.8 ku munsi, utanze amadolari 1920 akunguka amadolari 57.6, utanze amadolari 3800 akunguka amadorali 114 ku munsi, utanze amadorali 7600 akunguka amadorali 228 ku munsi naho utanze 15200 we yungukaga amadorali 456 ku munsi.

Aya nyuma yo gushora yari amadolari 30 400 akunguka amadolari 912 ku munsi.

Supermarketings Global Ltd kandi yabwiraga babandi bamaze kwinjiramo ko batagomba kwicara ahubwo bagomba gushaka abandi bakiriya, niba bifuza kubona amafaranga menshi.

Uko iki kigo cyatangaga inyungu ni uko mu gihe wazanaga umukiriya, wahabwaga guhera inyungu ihera kuva 2.5% kugeza 10% by’amafaranga uwo mukiriya azanye.

Amarira n’agahinda ku bashoye muri Supermarketings Global Ltd

Banki Nkuru y’u Rwanda iherutse kwibutsa abanyarwanda bose n’abaturarwanda muri rusange ko abashoye amafaranga yabo mu bigo nka Supermarketings Global Ltd, 3 Friends System, Group Ltd, Onecoin cyangwa Kwakoo (OnyxCoin) n’ibindi bafite ingorane zikomeye zo kubura amafaranga yabo bazaba bashoyemo.

Yashimangiye ko nta bufasha ubwo ari bwo bwose izagenera umuntu ushora amafaranga ye mu bikorwa by’iryo shoramari ry’amafaranga ritemewe cyangwa irindi bifitanye isano.

Bamwe mu bashoye imari yabo muri Supermarketings Global, baganiriye na IGIHE, bavuze ko mu gihe bari bamaze batangiye gukorana n’iki kigo ngo bumvaga batandukanye n’ubukene ariko kibasigiye ubundi bukabije.

Umwe muri aba utifuje gutangaza amazina ye “Nyuma yo gukangurirwa na mugenzi wanjye ko haje ikigo gifite ifaranga, nari mfite amafaranga ibihumbi 240 ku mufuka wanjye nta kuzuyaza nayise nyatanga, mu gihe gito nahise mbona undi waje inyuma yanjye, mu cyumweru kimwe ntakubeshye nari maze kubona ibihumbi 100.”

Nubwo avuga ko yari amaze kubona iyi nyungu, icyamubabaje ari uburyo yari amazemo icyumweru kimwe iki kigo kigahita gihagarikwa, bivuze ko yahombye amafaranga agera ku bihumbi 170, akavuga ko byamusigiye igihombo gikomeye mu rugo cyane ko ari yo yari afite gusa.

Undi yagize ati “Nagujije amadorali 480 muri banki, mu by’ukuri numvaga ngiye gukira kandi nkishyura na banki, buri munsi najyaga kujya mbona ibihumbi 12 ariko icyambabaje ni uko bafunze iki kigo mazemo icyumweru kimwe gusa, ubu ngiye kwishyura ideni ry’amafaranga arenga ibihumbi 700 kandi na kintu na kimwe nigeze ndyamo cyangwa ngo nguriremo umugore.”

Amakuru yizewe ni uko hari benshi bari bamaze gushora amafaranga atari make muri Supermarketings ku buryo hari abari barashyizemo miliyoni eshanu, ebyiri gutyo gutyo.

Kuri ubu uwari ufite konti muri Supermarketings iyo ayigiyeho bamubwira ko barimo gushaka igisubizo cy’iki kibazo, bakaba bahagaritse uburyo bwo kwinjira muri konti ariko ikindi gisubizo kizaba cyabonetse kuwa 10 Kamena 2019.

Nyuma yo kubona ibi, abantu batandukanye bagiye batanga ibitekerezo byabo, bamwe bavuga ko cyari gikwiye gufungwa abandi bakavuga ko bitari bikwiye.

Uwitwa Gaga yagize ati “Inzego z’iperereza zidufashe zinjire muri iki kibazo kuko kirimo ruswa ku nyungu za bamwe batangiye kubyigamba mbere y’uko ikigorwa kiba.”

Uwitwa Mirasano we yagize ati “Yewe, byari bikwiye, kuko rwose abantu igihiriri bari bamaze kubiyoboka, kandi nk’uko ubirimo yungukira mu kuzanamo abandi, iyo utemeraga kujyamo kubwo kutabikunda, wabaga ucanye umubano n’uwo ubigusabye. Leta rwose irakoze kureba kure mu gukumira bene ziriya business [ubucuruzi], ni ukuri twishimiye iri tangazo , nirijye mu bikorwa vuba, abanyarwanda turuhuke.”

Inkuru bifitanye isano:BNR yaburiye abishoye mu bucuruzi bw’amafaranga burimo Supermarketings Global


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza