Centrafrique: Abagera kuri 25 baguye mu mvururu

Yanditswe na Philbert Girinema
Kuya 30 Ukwakira 2016 saa 08:38
Yasuwe : XX
0

Ubuyobozi bw’Ingabo z’Umuryango w’Abibumbye ziri mu butumwa bw’amahoro muri Centrafrique (MINUSCA), bwatangaje ko abantu 25 baguye mu mvururu zahuje abahoze bari mu mutwe wa Seleka na Anti-

Itangazo ryashyize ahagaragara na MINUSCA rivuga ko abantu 15 baguye mu mirwano hagati ya Seleka na Anti-Balaka yabaye ku wa Kane mu gihe kuwa Gatanu abandi 10 barimo abapolisi batandatu n’abasivili bane batezwe bakicwa.

BBC ivuga ko imvururu zo ku wa Kane zabereye mu Mujyi wa Bambari uherereye muri birometero 250 uvuye mu Murwa Mukuru Bangui. Ubwicanyi bwo ku wa Gatanu bwo bwabereye ku muhanda uva Bambari werekeza ahitwa Grimari.

Mu 2013 nibwo muri Centrafrique hatangiye imvururu zishingiye ku madini n’ubwoko aho muri Werurwe (2013) abarwanyi b’abayisilamu babarizwa mu mutwe wa Seleka bahiritse ku butegetsi Perezida François Bozize w’umukirisitu.

Seleka ariko nayo yaje gukurwa ku butegetsi, bituma habaho imirwano hagati y’abayisilamu n’abakirisitu babarizwa mu mutwe wa Anti-Balaka.

Ibi byatumye abanya-Centrafrique batari bake bapfa abandi benshi barahunga. Ingabo zisaga ibihumbi 12 nizo ziri mu butumwa bw’amahoro bugamije kugarura amahoro muri Centrafrique.

Ingabo z’Umuryango w’Abibumbye zoherejwe muri iki gihugu kugira ngo zibungabunge amahoro

angel@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza