Champions League: Arsenal yandagajwe, Wenger asabirwa kwirukanwa

Yanditswe na Manzi Rema Jules
Kuya 16 Gashyantare 2017 saa 07:15
Yasuwe : XX
0

Si inkuru nshya kumva ko abafana ba Arsenal bazanye ibyapa ku bibuga bisabira umutoza Arsene Wenger kwirukanwa, gusa kuri uyu wa Gatatu nyuma y’uko iyi kipe yandagajwe na Bayern Munich ikayitsinda ibitego bitanu kuri kimwe, abafana bayo hirya no hino ku mbuga nkoranyambaga bongeye gusaba ko hashakwa umutoza mushya.

Arsenal yari yasuye Bayern Munich ku kibuga Allianz Arena n’ubundi si benshi bayihaga amahirwe yo kuhavana intsinzi gusa ku basesenguzi benshi, iyi kipe yasabwaga nibura kunganyiriza hanze kugira ngo mu mukino wo kwishyura izakira imbere y’abafana bayo izabashe gusezerera iyi kipe y’Abadage.

Nubwo Arsenal yinjijwe igitego hakiri kare ku munota wa 11 cya Arjen Robben, abafana bayo batangiye kurota ko bashobora kwikura kuri iki kibuga neza ku munota wa 30 Alexis Sanchez acyishyuye, igice cya mbere kirangira ari kimwe kuri kimwe.

Mu gice cya kabiri nibwo Arsenal yayahawe isomo rya ruhago ubwo yari imaze no gutakaza kapiteni wayo Laurent Koscielny wavunitse agasimburwa na Gabriel Paulista ku munota wa 49.

Ku munota wa 53 yahise itsindwa igitego cya kabiri cya Robert Lewandowski nyuma y’iminota ine Thiago Alcantara ashyiramo icya gatatu, nyuma y’indi itatu uyu musore ashyiramo icya kane naho Thomas Mueller nawe winjiye ku munota wa 86 asimbuye nyuma y’iminota ibiri mu kibuga atsinda icya gatanu ari nacyo cyasoje ibirori byo kuri Allianz Arena.

Nyuma y’uyu mukino, abafana ba Arsenal bifashishije Hashtag bise #Wengerout kuri Twitter, bayobowe n’umwe mu bazwi cyane ku Isi, Piers Morgan bibukije ko igihe kibaye kirekire babwirwa ko ikipe irimo kubakwa imyaka igashira indi igataha ubu umutoza Wenger akaba akwiye gusohoka hagashakwa undi.

Ikinyamakuru Mirror cyo cyahise gikora urutonde rw’abatoza bane bashobora kuvamo usimbura Arsene Wenger uyu mwaka barimo Max Allegri utoza Juventus, Leonardo Jardim wa AC Monaco, Roger Schmidt utoza Bayer Leverkusen na Thomas Tuchel wa Borussia Dortmund.

Mu wundi mukino wabereye muri Espagne, Real Madrid yabanje kwinjizwa igitego hakiri kare ku munota wa munani ariko ku wa 18 Karim Benzema aracyishyura, ku wa 49 Toni Kroos ashyiramo icya kabiri naho Casemiro ashimangira intsinzi ku munota wa 54 abasore ba Zinedine Zidane batahana amanota atatu imbere ya Napoli yo mu Butaliyani.

Robben na Mats Hummels bishimira igitego cya mbere cya Bayern cyabonetse ku munota wa 11 w'umukino
Sanchez yishimira igitego rukumbi cya Arsenal cyabonetse kuri penaliti
Coquelin, Sanchez na Xhaka mu byishimo by'igitego cya mbere cya Arsenal
Koscielny yavuye mu kibuga avunitse
Nyuma yo kunyagirwa bitanu kuri kimwe, Wenger yongeye gusabirwa kwirukanwa
Olivier Giroud, Shkodran Mustafi, Alexis Sanchez na Gabriel nyuma y'umukino wabereye i Allianz Arena mu Mujyi wa Munich
Abakinnyi ba Bayern bashimira abafana nyuma y'umukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza