Charlotte Mukankusi wo muri RNC ashinjwa n’abarokotse Jenoside b’i Rwamagana kubambura ubutaka

Yanditswe na Habimana James
Kuya 18 Nyakanga 2019 saa 09:17
Yasuwe :
0 0

Imiryango 12 y’abarokotse Jenoside ituye mu Murenge wa Muyumbu Akagari ka Kinyambo mu Karere ka Rwamagana, irashinja Charlotte Mukankusi uba muri Canada kubatekera umutwe akabanyaga ubutaka.

Aba baturage bavuze ko uretse kuba yarabashutse kugira ngo abatware ubutaka, hari n’abo yakoreshagaho iterabwoba ry’imbunda kugira ngo abambure imitungo basigiwe n’ababyeyi babo bishwe muri Jenoside yakorewe Abatutsi.

Charlotte Mukankusi urimo gushyirwa mu majwi ubu ashinzwe ibijyanye na dipolomasi mu mutwe w’iterabwoba wa RNC, akaba atuye muri Canada.

Mukankusi yabaye umudipolomate mbere yo gutangira kwifatanya n’abatavuga rumwe na Leta y’u Rwanda. Mu 2004 yari yungirije Kayumba Nyamwasa wari Ambasaderi w’u Rwanda mu Buhinde.

Mukankusi yabaye Umuyobozi Mukuru mu biro bya Minisitiri w’Intebe, aba umudipolomate w’u Rwanda mu Buhinde, yabaye Umunyamabanga Uhoraho muri Minisiteri y’Abakozi ba leta n’umurimo (Mifotra), Umuyobozi Mukuru muri Imprimerie Scolaire mbere y’uko afata inzira y’ubungiro mu 2015.

Uko ikibazo giteye

Mbere ya Jenoside yakorewe Abatutsi, ahari Komini Bicumbi ubu ni mu Karere ka Rwamagana Umurenge wa Muyumbu, ni agace kari gatuwe n’abatutsi benshi nk’uko abahatuye babitangarije IGIHE.

Mu gihe cya Jenoside Abatutsi abari bahatuye barishwe, bituma bamwe mu baharokokeye nyuma ya Jenoside batarifuje gusubira ku ivuko.

Bamwe mu baharokoye bavuze ko hari abamaze imyaka irenga 10 baratinye gusubirayo, bahitamo kujya gushakisha ubuzima mu Mujyi wa Kigali n’ahandi.

Rwagasana Gratien utuye mu Murenge wa Muhima mu Karere ka Nyarugenge, yabwiye IGIHE ko mbere ya Jenoside bari batuye muri Muyumbu mu yahoze ari Komini Bicumbi.

Yavutse mu muryango w’abantu icyenda ariko barokotse ari batatu gusa.

Ati “Jenoside irangiye njye ubwanjye namaze imyaka 10 ntaraza hano nubwo mpavuka kubera uko abacu bahashiriye. Nahise njya gutura mu Mujyi wa Kigali kugira ngo nshake ubuzima, ariko umuryango wacu wahagiraga ubutaka bungana hafi na hegitari 1.8.”

Yakomeje agira ati “Mu 2003 nibwo haje uwitwa Mukankusi Charlotte atubwira ko buriya butaka bwacu dushobora kububyaza umusaruro bukazatugirira inyungu. Yatubwiye ko twahamuha agahingamo ikawa kuko twese izatugirira akamaro, njye nabanje kubyanga ariko nyuma abandi barabinyemeza. Yaratubwiraga ngo Banki Itsura Amajyambere (BRD) irimo gutanga inguzanyo, kubera ko na mbere ababyeyi bacu bahingagamo ikawa, numvise ko uyu mushinga koko uzatugirira umumaro.”

Icyaje kubatungura ni uko ngo Mukankusi yaje guhinga ikawa muri iyi mirima agasarura ariko bo ntibabonemo inyungu. Kubera ko n’ubundi ubu butaka ngo ntacyo bwari bubamariye, bakomeje kuburekera uyu mudamu.

Mu 2014 Rwagasana na bagenzi be baje kujya kwandikisha ubu butaka, batungurwa no gusanga Mukankusi yaramaze kubwiyandikishaho nk’ubwe.

Yagize ati “Mukankusi yaduteye igipindi atwumvisha ko ari iterambere ry’abatuye Muyumbu atuzaniye, ubu turasaba leta ko yaturenganura.”

Uwimana Patricia utuye mu Murenge wa Muyumbu, na we yavuze ko yatuye muri aka gace mbere ya Jenoside.

Igihagarikwa yakomeje kuba kwa Nyirarume wari wararokotse ariko na we yaje gupfa mu 1999, Uwimana ajya kuba ahandi.

Yagize ati “Ndibuka ko umudamu witwa Mukankusi yajyaga akunda kuza kuri mwene wabo twari duturanye, tukajya tubona agenda mu butaka bwacu gusa kuko twari impfubyi ntabwo twari tuzi icyo ashakamo, nyuma yo gupfusha uwanderaga naje kuhava ndagenda.”

Yakomeje agira ati “Nyuma nibwo twaje kumva ko Mukankusi yamaze kwiyandikishaho ubutaka bwacu, tugize ngo tubaze ubuyobozi ntibwadufasha tubura aho tujya, Kugeza ubu tubona ubutaka bwacu buhingwa ntabwo tuzi niba bwaragurishijwe.”

Mukankusi yakoresheje imbaraga zirimo no gukangisha imbunda

Uwimana yavuze ko Mukankusi yitwaje icyo yari cyo muri icyo gihe kuko yari afite ubuyobozi.

Ngo hari umuturage yigeze gusaba kuva muri ubwo butaka, undi abyanze Mukankusi amubwira ko yamurasa.

Ati “Ndibuka ko hari umugabo twari duturanye witwa Rutayisire, Mukankusi yaraje amutera ubwoba ashaka kumurasa amubwira ngo ave muri ubwo butaka abutware.”

Yavuze ko Mukankusi yamubwiye ko ahava agashaka ahandi akahamugurira.

Abajijwe impamvu batakurikiranye iki kibazo mbere, Uwimana yagize ati “Mukankusi kubera ubuyobozi yari afite nta muturage wabaga yabonana na we, mu 2015 nibwo twumvise ngo yarahunze ariko twari twarabuze uko twamugeraho.”

Umwe mu bayobozi bashinzwe ubutaka mu Karere ka Rwamagana, yavuze ko iki kibazo yacyumvise ariko atigeze akinjiramo mu buryo bwimbitse.

Umunyamabanga Nshingwabikorwa w’Umurenge wa Muyumbu Bonny Bahati yabwiye IGIHE ko umwe muri aba baturage koko yamugejejeho iki kibazo ariko ko nta wundi muryango uraza kukimugezaho.

Yavuze ko niba aba baturage bahari bakwiye kuzana ikibazo ku Murenge kigakurikiranwa.

Yavuze ko iyo kubumvikanisha binaniranye bajya mu nkiko ariko ko byaba byiza bibanje gukemurwa n’inzego z’ibanze.

Ubu butaka nubwo Mukankusi yabufashe bugiye guhingwamo ikawa, nyuma y’uko ahunze umurenge warabufashe ngo bubyazwe umusaruro. Ubwo IGIHE yahageraga hari hahinzemo ibigori, amasaka n’ibishyimbo.

Ubutaka abarokotse Jenoside bavuga ko bambuwe bugera kuri hegitari icumi
Imiryango 12 niyo ivuga ko yambuwe ubutaka na Mukankusi
Ahahoze ubutaka bw'abashinja Mukankusi kubambura ubu hahinze ibigori n'ibishyimbo
Rwagasana Gratien mu matongo y'ababyeyi be
Uwimana yavuze ko bazitabaza inzego zose zishoboka kugira ngo basubizwe ibyabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza