Christian University of Rwanda na Harambee binjiye mu bufatanye buzongerera ubushobozi abanyeshuri

Yanditswe na Habimana James
Kuya 3 Ukuboza 2019 saa 10:22
Yasuwe :
0 0

Ikigo kigamije kurwanya ubushomeri mu rubyiruko binyuze mu kurwubakira ubushobozi, Harambee Rwanda cyinjiye mu bufatanye na Christian University of Rwanda, bugamije guha abanyeshuri ubumenyi bakeneye ngo bongere ubushobozi bwabo ku isoko ry’umurimo.

Ni igikorwa cyitabiriwe na Perezida wa Christian University of Rwanda, Prof. Dr. Pierre Damien Habumuremyi n’umuyobozi wa Kaminuza, Dr. Aloys Ruzibiza.

Biciye muri ubu bufatanye, abanyeshuri b’iyi Kaminuza bazaba bashobora kwitabira gahunda ya Harambee yo kubaka ubushobozi yiswe ‘Work-Seeker Support Programme’, ifasha abanyeshuri kwiyungura ubumenyi bubafasha guhatana ku isoko ry’umurimo ndetse no kumenya uko babona akazi.

Ubu buryo buha umunyeshuri ubumenyi bw’uko yagira ubunararibonye mu kazi binyuze mu kwimenyereza umwuga, ubukorerabushake n’ibindi.

Bibafasha kandi umunyeshuri kumenya uko bandika urwandiko rugaragaza umwirondoro (CV) ndetse n’uburyo ibizamini by’ibiganiro (interview) bikorwamo.

Hari kandi igice gisesengura ubumenyi bw’umunyeshuri mu kuvuga Icyongereza no kucyumva, bikamufasha kwihuza n’amahirwe y’umurimo ahari ku isoko.

Gutangiza ubu bufatanye byanahuriranye n’irangiza ry’abanyeshuri 100 ba Christian University of Rwanda mu mahugurwa y’uko bakora CV zabo n’amabwiriza yo kwitegura ibazwa ry’ibiganiro.

Prof. Dr. Habumuremyi yashimiye Harambee Rwanda uburyo ifasha urubyiruko kubona akazi, no kuba yaremeye gufatanya na n’iyi Kaminuza.

Ati “Ndashaka gushimira Harambee uburyo ifasha abakiri bato mu kubongerera ubumenyi ndetse nshishikariza abanyeshuri bacu kubyaza umusaruro ushoboka aya mahirwe. Nishimiye ubu bufatanye kandi nejejwe n’uko umuyobozi mushya wa Kaminuza aziicyo bisobanuye ku banyeshuri bacu n’urubyiruko rw’u Rwanda”.

Umuyobozi mushya wa Christian University of Rwanda, Dr. Aloys Ruzibiza, yagize ati “Iki ni igikorwa cyiza, abanyeshuri bacu bafite amahirwe yo gukorana n’abo muri Harambee, ndabashishikariza kwigira kuri izi gahunda za Harambee kandi mugashyira mu bikorwa ibyo muba mwize mu bihe biri imbere ubwo muzaba mushaka akazi”.

Umuyobozi wa Harambee Rwanda, Erica Mbanda, yagize ati “Twishimiye gufatanya na Christian University of Rwanda, abanyeshuri bazabona ubumenyi buhagije biciye muri iyi gahunda bibafashe kubona imirimo, twishimiye kongera ubufatanye no mu gihe kiri imbere hagamijwe guha urubyiruko rw’u Rwanda imirimo.”

Harambee ni ikigo gikorana na guverinoma y’u Rwanda, abikorera n’abakiri bato, intego ari uguha ubushobozi urubyiruko burufasha mu kubona imirimo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza