CHUB: Abarwayi bakorewe ibirori bahabwa n’impano ku munsi wabagenewe

Yanditswe na Prudence Kwizera
Kuya 13 Gashyantare 2018 saa 03:25
Yasuwe :
0 0

Ibitaro Bikuru bya Kaminuza y’u Rwanda, CHUB, byazirikanye umunsi mpuzamahanga wahariwe kwita ku barwayi bibakorera ibirori, bagenerwa n’impano ndetse bahabwa n’ubutumwa bubahumuriza.

Uyu munsi mpuzamahanga wizihijwe kuri iki Cyumweru, tariki ya 11 Gashyantare 2018, aho abarwayi nabo bahawe umwanya wo gutanga ibitekerezo bavuga icyo bifuza cyabafasha kurushaho guhabwa serivise nziza.

Ni umunsi watangijwe n’igitambo cya Misa aho abarwayi bahumurijwe babwirwa amagambo abaremamo icyizere, basabirwa ku Mana ndetse basigwa n’amavuta.

Umuyobozi Mukuru wa CHUB, Dr Augustin Sendegeya, yavuze ko uyu munsi bawizihiza bagamije guhumuriza abarwayi no kurushaho kubegera, ariko by’umwihariko nk’abatanga serivise z’ubuvuzi bibafasha gusubiza amaso inyuma no kwisuzuma bagamije kunoza ibyo bakora.

Dr Sendegeya ati “Natwe abavuzi ni umunsi udusaba kwitekerezaho no kwisuzuma tureba niba ibyo dukora tubikora neza, twasanze muri rusange bigenda neza hano muri CHUB ariko naho byaba bitagenda neza tukisuzuma tukavuga tuti ‘umwaka utaha tuzagaruka hano twarabikosoye’.”

Bamwe mu barwayi bavuze ko uyu munsi ari ingirakamaro kuri bo kuko wababereye mwiza, bishimira ko bakorewe ibirori bahabwa n’umwanya wo gutanga ibitekerezo.

Ndayisaba Claude ufite uburwayi kubera impanuka yakoze yavuze ko nubwo nta bwisungane mu kwivuza yari afite, yageze ku bitaro bya CHUB ahabwa ubufasha yivuza neza.

Ati “Uyu munsi wadushimishije cyane nk’abantu barwariye hano kubera ibirori n’ubusabane mwadukoreye; by’umwihariko njye ibi bitaro byaramfashije kuko nkimara gukora impanuka naje ndembye cyane kuko nta na Mituweli nagiraga, ariko hano bampaye inkunga baramvuza kugeza igihe mboneye Mituweli, nizeye ko nzakira ngataha meze neza”.

Buri murwayi wo kuri CHUB yagenewe impano irimo ibikoresho byiganjemo iby’isuku; bamwe mu bahawe impano babwiye IGIHE ko bishimye kandi bafite icyizere cyo gukira neza.

Ibitaro bya CHUB byakira abarwayi baturuka mu bitaro 15 by’Uturere two mu Ntara y’Amajyepfo n’iy’u Burengerazuba; ubuyobozi bwabyo buvuga ko mu kwezi kumwe byakira abarwayi basaga ibihumbi 70.

Ubuyobozi bwa CHUB, butangaza ko mu rwego rwo gufasha abarwayi badafite ubushobozi bwo kwivuza no kubona amafunguro hashyizweho agaseke k’abakozi ko kugoboka bene abo bantu. Bityo ngo undi wese washaka gufasha abarawayi akaba adahejwe.

Umunsi mpuzamahanga wo kuzirikana abarwayi, washyizweho na Papa yohani Pawulo wa II mu 1992, wizihizwa ku rwego rw’Isi buri mwaka tariki ya 11 Gashyantare.

Abarwariye bo muri CHUB bavuga ko bishimiye uburyo bakorewe ibirori bahabwa n'impano
Abarwriye kuri CHUB basizwe amavuta babwirwa n'amagambo meza abahumuriza
Umunsi wahariwe kuzirikana abarwayi muri CHUB watangijwe n’igitambo cya Misa aho abarwayi bahumurijwe babwirwa amagambo abaremamo icyizere
Umuyobozi Mukuru wa CHUB, Dr Augustin Sendegeya, yavuze ko uyu munsi bawizihiza bagamije guhumuriza abarwayi no kurushaho kubegera
Abarwariye bo muri CHUB bavuga ko bishimiye uburyo bakorewe ibirori bahabwa n'impano
Abatanga serivise z'ubuvuzi muri CHUB mu gikorwa cyo kwizihiza umunsi mpuzamahanga wahariwe kuzirikana abarwayi
Wari umunsi w'ibirori byo gususurutsa abarwayi no kubahumuriza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza