Kwamamaza

CLADHO yagaragaje icyuho mu ngengo y’imari y’ubuhinzi

Yanditswe kuya 29-10-2016 saa 12:41' na Emma-Marie Umurerwa


Impuzamiryango y’amashyirahamwe yita ku burenganzira bwa muntu (CLADHO), ivuga ko ingengo y’imari Leta ishyira mu buhinzi igenda igabanuka kandi ko n’uruhare umuturage agira mu kugena ibyo izakoreshwa, kumenyeshwa ibyemejwe ndetse no gukurikirana uko bishyirwa mu bikorwa rukiri hasi.

Umuyobozi ushinzwe igenamigambi muri CLADHO, Nkurunziza Alexis avuga ko ubushakashatsi bakoze bwagaragaje ko ingengo y’imari ishyirwa mu buhinzi igabanuka ndetse n’uruhare rw’umuturage mu kugena uko izakoreshwa rusubira hasi.

Ubu bushakashatsi bwakozwe na CLADHO ku nkunga ya Actionaid bugaragaza ko abaturage 88% batagira uruhare mu bibakorerwa.

Ibi yabitangarije mu nama nyunguranabitekerezo yahuje impuzamiryango CLADHO, inzego za Leta ndetse n’imiryango y’abaterankunga tariki ya 27 Ukwakira 2016.

Nkurunziza yagize ati "Ingengo y’imari Leta ishyira mu buhinzi igenda igabanuka buri mwaka, kabone n’iyo ingengo y’imari muri rusange yaba yiyongereye."

Yakomeje avuga ko Sosiyete Sivile ifite impungenge z’uko ishoramari Leta ishyira mu buhinzi binyuze mu ngengo y’imari na ryo rigenda rigabanuka.

Umuyobozi ushinzwe igenamigambi muri Minisiteri y’Ubuhinzi n’Ubworozi (Minagri), Dr Semwaga Octave, yavuze ko hari inyigo iri gukorwa izagaragaza niba koko amafaranga Leta ishyira mu buhinzi yaragabanutse.

Yagize ati "Ubu turimo gukora inyigo kugira ngo tumenye neza amafaranga ajya mu buhinzi, iyo nyigo nirangira nibwo tuzamenya niba amafaranga ashyirwamo azamuka cyangwa agabanuka."

Yakomeje avuga ko nubwo ubuhinzi buri mu nshingano za Minisiteri y’Ubuhinzi n’Ubworozi, igice kinini cy’ingengo y’imari y’ubuhinzi kinyura mu zindi minisiteri bitewe n’ibizakorwa muri ibyo bice.

U Rwanda ni kimwe mu bihugu byashyize umukono ku masezerano ya Maputo ku bijyanye n’Iterambere ry’Ubuhinzi n’Umutekano w’Ibiribwa muri Afurika, avuga ko ibihugu bigize uyu mugabane bizajya bishyira mu buhinzi amafaranga angana 10% by’ingengo y’imari yabyo.

Aya masezerano yashyizweho umukono n’abakuru b’ibihugu na za Guverinoma muri Nyakanga 2003, nyuma y’Inteko Rusange y’Umuryango wa Afurika Yunze Ubumwe.

Urwego rw’ubuhinzi rutanga 33% by’umusaruro mbumbe w’igihugu, mu ngengo y’imari y’umwaka wa 2016-2017, rwahariwe amafaranga angana na 4% by’ingengo y’imari.

Bamwe mu bitabiriye inama nyunguranabitekerezo ya Cladho
Umunyamabanga Nshingwabikorwa wa CLADHO ku rwego rw’igihugu, Me Safari Emmanuel

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved