Kwamamaza

Cogebanque yijeje abakiliya inyungu ikomeye nyuma y’ishoramari ry’abanya-Maroc

Yanditswe kuya 27-10-2016 saa 09:47' na IGIHE


Nyuma y’amasezerano y’ubwumvikane hagati ya Cogebanque na Banki ya Attijariwafa yo muri Maroc, iyi banki yo mu Rwanda yamenyesheje abakiliya n’abanyamigabane bayo ko Abanya-Maroc basabye guhabwa hagati ya 51 na 100% by’imigabane yose iyigize.

Ni amasezerano yashyizweho umukono ku wa 19 Ukwakira 2016 imbere ya Perezida Paul Kagame n’Umwami wa Maroc, Mohammed VI, ubwo yari mu ruzinduko mu Rwanda.

Perezida w’Inama y’Ubutegetsi ya Cogebanque, Philbert Afrika, ku mugoroba wo kuri uyu wa Gatatu yabwiye abakiliya n’abanyamigabane bayo ko hari impinduka zitegerejwe muri iyi banki mu gihe kiri imbere, ubwo Attijariwafa izaba imaze kwinjizamo ishoramari ryayo.

Ati “Tumaze igihe tuganira na Attijariwafa Bank, tureba uko yakwinjira mu migabane ya Cogebanque. Ni ikiganiro kimaze iminsi, cyafashe igihe kirekire n’ubu ntikirarangira. Ariko twasinye ibyo tugomba gukurikira kugira ngo icyo kiganiro kizarangire.’’

“Mu minsi ikurikiye Attijariwafa Bank izaza gusura Cogebanque irebe uko ikora, irebe n’uko ihagaze kugira ngo tuzabashe kumvikana ku migabane bashaka kugira ngo binjire muri Cogebanque. Hari imibare ivugwa, ntabwo turayumvikanaho. Ariko icyo bifuzaga ni uko bashobora kwinjiramo hagati ya 51 na 100%.’’

Mu masezerano yatangajwe ubwo Umwami wa Maroc, Mohammed VI, yari mu gihugu, byavugwaga ko Banki ya Attijariwafa izegukana imigabane ingana na 76.19% ihwanye na miliyoni 41 z’amadolari ya Amerika, ariko ngo ntibyumvikanyweho byuzuye.

Biteganyijwe ko amasezerano hagati ya Attijawariffa na Cogebanque agomba kuba yarangijwe mu mezi atanu ari imbere, ariko Cogebanque ikavuga ko bifuza ko uyu mwaka wa 2016 warangirana nabyo.

Hari inyungu zihanzwe amaso

Philbert Afrika yijeje abakiliya ko serivisi babonaga muri Cogebanque bazakomeza kuzibona, ndetse ngo n’iyo byaba ko Abanya-Maroc begukana Cogebanque 100%, izina ryayo ntirizahindurwa.

Yavuze ko Attijariwafa ari banki ya kabiri muri Maroc igakorera mu bihugu 26 ku Isi, ikagira abakiliya miliyoni umunani n’amashami agera ku 4000 kandi imaze imyaka isaga 100 ibayeho, ku buryo kwemera ko yinjira mu migabane ya Cogebanque ari uko bifuza ko izanamo ubundi bushobozi mu mafaranga n’ubunararibonye.

Ati “Nk’ubu Cogebanque hari ibintu idashoramo amafaranga mu Rwanda. Nk’ubu turimo kuvuga amashanyarazi cyangwa imihanda. Iyo ushaka kubaka umuhanda mu Rwanda, ujya gushaka amafaranga muri banki zo hanze.’’

Yakomeje agira ati “Nta banki mu gihugu ifite ubwo bushobozi bwo kubikora. Nk’ubu ushatse miliyari 10 cyangwa 20 muri Cogebanque, twatekereza kabiri mbere yo kuziguha. Ariko umunsi iyi banki yakomeye, yazanye indi migabane ikomeye iturutse hanze, nk’izo miliyari 20 tuzashobora kuzitanga.’’

Biteganyijwe ko mbere y’uko uku kwezi kurangira Abanya-Maroc bazaza mu Rwanda gukomeza ibiganiro na Cogebanque, hakazanaganirwa n’abanyamigabane ku kigero cy’imigabane bemera kurekura harebwe ku yo aba bashoramari basabye.

Munyaneza Felix usanzwe ari umukiliya wa Cogebanque n’umushoramari mu nyubako n’ubuhinzi, yabwiye IGIHE ko izi mpinduka ari ingenzi cyane kuko bizatuma babasha kubona inyungu ihagije muri Cogebanque.

Ati “Nk’abashoramari, twe dukenera banki ishobora guhaza ibyifuzo byacu mu bijyanye n’amafaranga. Ku buryo ukurikije uko ishoramari rihagaze, twari dukeneye umushoramari mpuzamahanga, wadufasha gukomeza kuzamuka tutagize imbogamizi yo kuba banki dufite hari ubushobozi zidafite.’’

Umuyobozi wa Cogebanque, Vivian Igunduura, yavuze ko Cogebanque ihagaze neza, kuko nibura kugeza muri Nzeri yagize inyungu ibarirwa muri miliyari eshatu z’amafaranga y’u Rwanda, ndetse hari icyizere ko umwaka ushobora gushira zigeze kuri enye.

Yashimiye abakiliya batuma ikomeza gutera intambwe, ndetse ubu ikaba iri muri banki enye za mbere mu Rwanda, ndetse ikaba ikomeza kwaguka aho igeze ku mashami 24 n’abayihagarariye basaga 350.

Cogebanque yatangiye muri Kanama 1999; ikomeza kuzamuka ku buryo ku wa 31 Ukuboza 2015 yari ifite umutungo ungana na miliyari 178 z’amafaranga y’u Rwanda.

Umuyobozi wa Cogebanque, Vivian Igunduura, yavuze ko Cogebanque ihagaze neza
Perezida w’Inama y’Ubutegetsi ya Cogebanque, Philbert Afrika ageza ijambo ku bitabiriye uyu muhango

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved