Col Ruhunga yaburiye abakobwa batwarwa n’ikoranabuhanga bakizezwa akazi keza mu mahanga

Yanditswe na HABIMANA James
Kuya 6 Kamena 2019 saa 06:44
Yasuwe :
0 0

Umunyamabanga Mukuru w’Urwego rw’Igihugu rushinzwe Ubugenzacyaha (RIB), Col. Ruhunga Jeannot yasabye abana b’abakobwa by’umwihariko kujya bagira amakenga igihe bakoresha ikoranabuhanga, kuko hari abasigaye baryifashisha bagamije kubareshya ngo babacuruze.

Yabitangaje kuri uyu wa Kane ubwo habaga inama yahuje abagenzacyaha n’abashinzwe gushyira amategeko mu bikorwa bo muri Polisi Mpuzamahanga (Interpol), mu bihugu byo muri Afurika yo hagati n’iyo mu Burazirazuba, baganira uko bafatanya ngo ikibazo cy’icuruzwa ry’abantu kirandurwe.

Urwego rw’Ubugenzacyaha (RIB) rwatangaje ko mu myaka itanu ishize mu Rwanda hagaragaye ibyaha 189 byo gucuruza abantu, byagizwemo uruhare n’abantu 378.
Nk’umwaka ushize gusa, ibyaha nk’ibyo byagaragaye ni 49, byarimo abantu 80.

Umunyamabanga Mukuru wa RIB, Col. Ruhunga Jeannot, yavuze ko icyaha cyo gucuruza abantu ari icyaha kiri mu byaha by’inzaduka.

Yavuze ko mubo bagiye batabara bari bagiye gucuruzwa, abenshi ari ab’igitsinagore bashutswe hifashishijwe ikoranabuhanga.

Yavuze ko u Rwanda rwiyemeje kurwanya icyo cyaha kuko kigira ingaruka ku mibereho myiza y’abaturage n’umutekano w’igihugu.

Yagize ati “Ibitera iki cyaha akenshi usanga ari iterambere aho abantu kubera ko bajya kuri za mudasobwa bakareba ibikorerwa hanze, n’abagizi ba nabi bagakoresha iterambere kugira ngo babareshye. Hari igihe urubyiruko cyane cyane abana b’abakobwa babyitabira bazi ko bagiye gushaka akazi nyamara bagiye gukorerwa icyaha cyo gucuruzwa no gukoreshwa akazi k’uburetwa.”

Yakomeje agira ati “Abagaragara cyane ni abakobwa b’inkumi bashukishwa kubabwira ko bazabaha akazi keza, bagera iyo bagiye bagasanga barimo kubakoresha akazi k’uburetwa cyangwa bakaba babakoresha akazi ko kwicuruza.”

Gedion M.Kimilu uhagarariye Polisi Mpuzamahanga muri Afurika y’i Burazirazuba, yavuze ko iki ari ikibazo gikomeye muri aka karere kandi ko abajyanwa muri ibi bikorwa akenshi bajya mu bihugu by’i Burayi na Aziya.

Ku birebana n’impamvu ab’igitsina gore aribo bagaragara cyane muri ibi bikorwa, Kimuli yagize ati “Abagore nibo bajyana cyane kuko ari abanyantege nke kandi nibo bahura n’ibibazo byinshi birimo n’amakimbirane yo mu karere. No mu bihugu bidafite ibibazo usanga abakobwa bahura n’ibibazo by’ubukene bigatuma bajya gushaka imibereho.”

Yavuze ko abantu bajya kubacuruza usanga bafite akarimi ko kareshya, bakanababwira ko imirimo bafite ikeneye abakobwa cyangwa abagore gusa.

Muri uyu mwaka gusa, RIB ivuga ko imaze kugarura abantu 20 ari bo bamaze kugarurwa bari bajyanywe gucuruzwa mu mahanga.

Umunyamabanga Mukuru wa RIB, Col. Ruhunga Jeannot, yavuze ko icyaha cyo gucuruza abantu ari icyaha kiri mu byaha by’inzaduka.
Bamwe mu bitabiriye inama yiga ku icuruzwa ry'abantu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza