Kwamamaza

Crystal Telecom yabonye Umuyobozi Mukuru mushya

Yanditswe kuya 22-11-2016 saa 04:35' na IGIHE


Ikigo Crystal Telecom Ltd kigizwe n’abanyamigabane bafite 20% muri MTN Rwanda Cell Ltd, cyabonye Umuyobozi Mukuru mushya, Iza Irame, wari usanzwe mu bayobozi bakuru mu kigo gikomatanya ibigo bitandukanye bikora ubucuruzi, Crystal Ventures.

Nk’uko itangazo ryshyizwe ahagaragara na Crystal Telecom ribivuga, Iza wari "Chief Corporate Officer" muri Crystal Ventures, yagizwe Umuyobozi Mukuru wa Crystal Telecom asimbuye Vincent Gatete uheruka kugirwa Umuyobozi Ushinzwe ubucuruzi muri Banki ya Kigali.

Iza Irame yari kuri uwo mwanya muri Crystal Ventures Ltd guhera muri Gicurasi 2016, mbere akaba yari Umuyobozi Mukuru wa African Alliance Rwanda mu gihe cy’imyaka ine. Nk’umuyobozi, yakoze byinshi mu bijyanye n’imari ndetse agira uruhare mu iterambere ry’Isoko ry’Imari n’Imigabane, aho yanayoboye ihuriro ry’abafasha abagana iryo soko.

Afite impamyabumenyi ya Kaminuza mu bijyanye n’imiyoborere mu bucuruzi yakuye mu ryahoze ari Ishuri Rikuru Ry’Ubumenyi, Ikoranabuhanga n’Icungamutungo rya Kigali (KIST), ndetse yahawe n’amasomo y’icungamari ry’Umwuga ya ACCA (Association of Chartered certified Accountant, ACCA).

Iza Irame kandi afite imyaka 10 mu buyobozi bukuru bw’ibigo birimo ibya leta n’ibyigenga, aho yabaye umuyobozi ushinzwe imari muri Horizon Group ndetse ari no mu nama z’ubutegetsi z’ibigo bitandukanye birimo Ikigo Cy’Isoko ry’Imari n’Imigabane, African Alliance Rwanda, Zigama CSS n’Ibitaro bikuru bya Kaminuza mu Rwanda.

Umuyobozi w’Icyubahiro wa Crystal Telecom, James Gatera, yavuze ko Crystal Telecom yabimburiye ibindi bigo mu byigenga mu kubyaza umusaruro isoko ry’imari n’imigabane, ndetse abaguze imigabane yayo bamaze kubona inyungu inshuro ebyiri mu mezi 12 gusa ishyizwe ku isoko.

Yakomeje agira ati “Turashimira Vincent ku bw’akazi keza yakoze mu gihe yari amaze muri Crystal Telecom. Turanaha ikaze Iza uzakomeza gukorera ikigo atizigamye ashingiye no ku bunararibonye bukomeye afite,’’

Crystal Telecom Ltd yabayeho kuva muri Nzeli 2013, yandikwa ku isoko ry’imari n’Imigabane muri Nyakanga 2015.

Muri Kanama 2016 yatangaje ko abanyamigabane bayo bagiye kugabana miliyoni 800 Frw nk’inyungu, ikaba yari inshuro ya gatatu bagiye kuyihabwa, ndetse Raporo iheruka gushyikirizwa Ikigo cy’Igihugu gishinzwe Isoko ry’Imari n’Imigabane, ivuga ko ayo mafaranga azishyurwa hagati mu Ukuboza 2016.

Umuyobozi Mukuru mushya wa Crystal Telecom Ltd, Iza Irame

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved