Depite Rubagumya Furaha yatorewe kuyobora Komisiyo ya Politiki mu Nteko

Yanditswe na Umwali Zhuri
Kuya 9 Gicurasi 2019 saa 04:49
Yasuwe :
0 0

Depite Rubagumya Furaha Emma yatorewe kuyobora Komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu asimbuye Kanyamashuli Janvier uherutse kwegura ku mwanya w’Ubudepite mu Nteko Ishinga Amategeko.

Rubagumya w’imyaka 52 y’amavuko ni manda ya mbere ari mu Nteko Ishinga Amategeko kuko yayinjiyemo mu 2018.

Rubagumya yari ahatanye kuri uyu mwanya na Ndoriyobijya Emmanuel.

Kuva mu 1997 yakoze mu nzego za leta cyane izifitanye isano n’uburezi kuko nko muri uwo mwaka yari Umukozi wa Minisiteri y’Uburezi ushinzwe ibijyanye n’amahugurwa y’abarimu.

Nyuma yaho yashinzwe uburezi bw’amashuri yisumbuye aho yakoze mu gihe cy’imyaka itandatu uhereye mu 2000. Yanakoze muri Kaminuza y’u Rwanda mu 2015 kugeza mu 2017.

Afite impamyabumenyi y’icyiciro cya gatatu cya Kaminuza mu bijyanye n’imicungire y’amashuri yakuye muri Kaminuza ya Leicester mu Bwongereza.

Kanyamashuli Kabeya Janvier wasimbuwe na Rubagumya ku buyobozi bwa komisiyo, yabaye Umudepite wa Mbere weguye mu bari mu Nteko Ishinga Amategeko muri manda ya 2018 izarangira mu 2023.

Mu ibaruwa ye yo ku wa 12 Werurwe 2019, yandikiye Perezida w’Umutwe w’Abadepite avuga ko “kubera impamvu zanjye bwite, neguye ku murimo w’ubudepite mu Nteko Ishinga Amategeko y’u Rwanda”.

Depite Rubagumya Furaha Emma yatorewe kuyobora Komisiyo ya Politiki, Uburinganire n'Ubwuzuzanye bw'Abagabo n'Abagore mu Iterambere ry'Igihugu
Depite Ndoriyobijya Emmanuel wari uhatanye na Rubagumya Furaha Emma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza