Depite Uwumuremyi yasabye ko urubyiruko rubwizwa ukuri ku mateka yaranze u Rwanda

Yanditswe na Evariste Nsengimana
Kuya 10 Kamena 2019 saa 07:45
Yasuwe :
0 0

Depite Uwumuremyi Marie Claire, yahumurije abarokotse Jenoside yakorewe Abatutsi, ababwira ko ibyo u Rwanda rwagezeho mu myaka 25 ishize ari ikimenyetso cy’uko hari byinshi byiza bizagerwaho bigizweho uruhare runini n’urubyiruko.

Yabivugiye mu Karere ka Nyanza, Umurenge wa Mukingo ku wa 9 Kamera 2019, ubwo hibukwaga ku nshuro ya 25, Jenoside yakorewe Abatutsi, by’umwihariko abiciwe mu Nkomero, mu yahoze ari komine Murama.

Iki gikorwa cyateguwe n’umuryango Zirikana uhuza abaharokokeye, cyahuriranye no gushyingura mu cyubahiro, imibiri 18 y’abazize Jenoside yakorewe Abatutsi.

Umwe mu barokokeye mu Nkomero, Mporanyenayo Gérald, yatanze ubuhamya bw’uko Abatutsi batotejwe na mbere ya Jenoside, bigeze mu 1994 birenga ukwemera.

Yavuze ko Jenoside itangiye, Abatutsi benshi bahungiye mu yahoze ari Komine Murama bafite icyizere ko bazarindwa n’ubuyobozi ariko bikarangira butabarinze.

Abatutsi bari bahahungiye babonye nta cyizere cyo kubarinda batangiza uburyo bwo kwirwanaho bakoresheje amabuye ariko biba iby’ubusa baricwa.

Depite Uwumuremyi wari umushyitsi mukuru, yihanganishije ababuriye ababo muri Jenoside yakorewe Abatutsi, by’umwihariko abiciwe mu Nkomero, ababwira ko ibyakozwe nyuma yayo bitanga icyizere cy’ahazaza heza.

Ati “Imyaka 25 ishize irerekana urugendo rwakozwe, aheza tugeze ariko n’aheza kurushaho twifuza kugera. Tuzahagezwa nuko dukomeje kwakira inyigisho za Leta y’ubumwe zidusaba kubana neza, kubaho dutekereza ko kuba umunyarwanda biruta ibindi byose.”

Depite Uwumuremyi yavuze ko abanyarwanda bafite byinshi bibahuza birimo ururimi, umuco n’ibindi kuruta ibibatanya, asaba ko urubyiruko rubwizwa ukuri ku mateka yaranze u Rwanda kandi rugatozwa kugira uruhare mu iterambere.

Ati “Birasaba ko urubyiruko rwigishwa amateka ntihabeho kuyagoreka no kuyavuga buri wese ku nyungu ze cyangwa ku byo yibeshya ko ari inyungu ze, ahubwo tukigisha abana bacu ubuzima twanyuzemo, ndetse tukabereka aho turi n’umurongo twafashe n’aho tubasaba ko igihugu kizagera.”

Umuyobozi w’Umuryango Zirikana uhuza abarokotse Jenoside yakorewe Abatutsi bo mu yahoze ari Komine Murama, Gashayija Justin, yashimiye abaje kwifatanya nabo mu kwibuka, barimo Ambasaderi wa Israel mu Rwanda, Ron Adam n’abandi.

Yavuze ko abarokotse Jenoside yakorewe Abatutsi ‘Ibyatubayeho twarabyemeye ariko hari ibyo tutarumva, uwabasha kubidusobanuririra yazatubwira’.

Ati “Ntabwo turasobanukirwa ukuntu abantu bica abaturanyi babo batigeze babahemukira, ntabwo twumva ukuntu abantu bafite ubwonko bica abana, abakecuru [...] Ntabwo bijya byinjira neza mu bitekerezo byacu ngo tubyumve neza ubwo bugome n’inabi bingana gutyo aho byavuye.”

Yavuze ko ikibabaje ari ukuntu abantu barenga kuri ayo mateka, bagahakana ndetse bakanapfobya Jenoside yakorewe Abatutsi.

Ati “Dushima ibitangaza Imana yakoze kuko no muri Israel ngira ngo ntibyahabaye. Muri iki gihugu niho umuntu wiciye undi abana ku musozi n’uwo yiciye, basabana. Ntabwo twakekaga ko byari kubaho iyo hataba Imana n’ubuyobozi bwiza yaduhaye.”

Ambasaderi Adam yashimiye abarokotse Jenoside yakorewe Abatutsi bo mu Nkomero kuba baramutumiye ngo aze kwifatanya nabo guha icyubahiro abayizize, avuga ko isa n’iyakorewe Abayahudi nawe ikamugiraho ingaruka.

Ati “Abantu bacu bose, abayahudi n’abanyarwanda basangiye amateka amwe y’ububabare ya Jenoside ariko twabashije kurenga urwo rugendo twubaka ibihugu byacu.”

Umuyobozi w’Akarere ka Nyanza, Ntazinda Erasme, yavuze ko ‘Kwibuka Jenoside yakorewe Abatutsi ari umwanya mwiza wo kureba aho abantu bavuye n’aho bagana’.

Urwibutso rwa Nkomero rwashyinguwemo imibiri 18, ruruhukiyemo isaga 6700 y’abatutsi biciwe mu yahoze ari Komine Murama.

Abayobozi bageze mu Nkomero, aho umuhango wo kwibuka wabereye
Babanje gufata umunota wo kwibuka
Bamwe mu bari bitabiriye umuhango wo kwibuka abatutsi bo mu Nkomero bazize Jenoside
Amb Adam(ibumoso) amaz gushyira indabo ku rwibutso rwa Nkomero
Depite Uwumuremyi amaze gushyira indabo ku rwibutso
Umuyobozi w'Akarere ka Nyanza, Ntazinda Erasme (iburyo) amaze gushyira indabo ku rwibutso rwa Nkomero
Imibiri 18 yashyinguwe mu rwibutso rwa Nkomero
Uhereye iburyo, Depite Uwumuremyi, Amb Adam mu muhango wo kwibuka
Umuhanzi Munyenshoza Dieudonne mu babafashije mu ndirimbo zo kwibuka
Depite Uwumuremyi Marie Claire ari gutanga ikiganiro
Amb Ron Adam ari gutanga ubuhamya
Umuyobozi wa Ibuka mu Karere ka Nyanza, Kabagamba Canisius ari gutanga ikiganiro
Umuyobozi w'Akarere ka Nyanza, Ntazinda ari gutanga ikaze
Umuyobozi w'Umuryango Zirikana w'Abarokotse Jenoside yakorewe Abatutsi bo mu cyahoze ari Komine Murama, Gashayija Justin, yashimiye abaje kwifatanya nabo mu Kwibuka

[email protected]

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza