DHL Express Rwanda yahishuriye abashoramari 80 inyungu zihishe mu gucururiza kuri internet

Yanditswe na Evariste Nsengimana
Kuya 7 Kamena 2019 saa 03:29
Yasuwe :
0 0

Ba rwiyemezamirimo bakiri bato 80 biganjemo abakora ubucuruzi bw’ibikorerwa mu Rwanda, bahishuriwe uko barushaho kubyaza umusaruro amahirwe y’ubucuruzi bwo kuri internet.

Aya mahirwe bayahishuriwe kuri uyu wa 6 Kamena 2019, ubwo bahabwaga amahugurwa n’Ikigo gifasha abantu gutwara ubutumwa n’imizigo, DHL Express Rwanda.

Mu byo aya mahugurwa yateguwe n’iki kigo kizobereye mu bucuruzi bwo kuri internet yibanzeho harimo kubasobanurira uko imbuga zigurishirizwaho ibintu kuri internet zikora, ibyo gukorana n’ibindi bihugu bisaba n’ibindi.

Umuyobozi w’ishami rya DHL rishinzwe ubucuruzi bwifashisha ikoranabuhanga n’abakiliya muri Afurika yo munsi y’Ubutayu bwa Sahara, Venessa Dewing, yababwiye ko icyo kigo gifite intego yo kongera no kunoza ubucuruzi bw’abantu ku giti cyabo n’ubw’igihugu.

Ati “Twiyemeje gutanga ubutumwa bujyanye n’ubucuruzi bwo kuri internet mu kubyaza umusaruro amahirwe aburimo ku rwego mpuzamahanga binyuze mu kugeza ibicuruzwa hirya no hino ku Isi, twibanda ku kumvisha abantu uko buno bucuruzi bwambukiranya imipaka bukorwa.”

Venessa yavuze ko abashoramari mu bucuruzi bakwiye kumenya no gusobanukirwa ko ubwo kuri internet bugezweho, bufite inyungu nyinshi kandi nta kimenyetso na kimwe kigaragaza ko buzahararukwa.

Yababwiye ko inyigo zigaragaza ko inyungu zibuvamo zizagera kuri miliyari ibihumbi 3,4$ mu 2019 naho amafaranga abukoreshwamo hagati y’ibihugu akagera kuri miliyari ibihumbi 900$ mu 2020.

Venessa yavuze ko ubwo bucuruzi hagati y’ibihugu bukura ku kigero cya 25% ku mwaka ndetse ko mu 2018 abantu barenga miliyari 1,6 bahahiye kuri internet.

Ati “Ni uburyo bwo kubyaza umusaruro amahirwe ari ahandi, ni amahirwe yo kugeza ibicuruzwa byo muri Afurika hirya no hino ku Isi, ni amahirwe yo gufasha abaturage bakagira uruhare mu bikorwa by’ubukungu ariko bakarugira no mu iterambere ryabwo binyuze mu guhererekanya ibicuruzwa n’amahanga.”

Umuyobozi wa DHL Express Rwanda Ltd, Julie Mutoni, yavuze ko aho Isi igeze abantu bagomba kubyaza umusaruro internet.

Mutoni yagaragaje ko raporo ya Unctad ya 2017 igaragaza ko agaciro k’ibicururizwa kuri internet ku Isi kavuye kuri miliyari ibihumbi 16$ mu 2013 kakagera kuri miliyari ibihumbi 25$ mu 2015.

Yavuze kandi ko inyigo yakorewe mu bigo bya Leta n’ibyigenga n’ikigo McKinsey cy’abanyamerika yerekanye ko agaciro k’ibicururizwa kuri internet muri Afurika kazava kuri miliyari 16$ mu 2017 kakagera kuri miliyari 75$ mu 2025.

Ati “Nta bintu byo kuvuga ngo dufite internet ariko ntabwo turi kuyibyaza umusaruro kandi urebye ku Isi ubucuruzi bwo kuri internet burimo kuzamuka cyane, tukaba dushishikariza abanyarwanda kubwitabira.”

Umukozi ushinzwe ubucuruzi mu kigo Mall for Africa, gifasha abantu kugura ibikoresho muri Amerika no mu Bwongereza, Ntabana Emmanuel, yavuze ko ‘Gukorana na DHL Express byaratworohereje, ibintu byacu birabanguka, bimara hagati y’iminsi 3-5 y’akazi’.

Mugenzi we Nduwamungu Joshua yakomeje agira ati “Muri aya mahugurwa nungukiyemo byinshi birimo kumenya icyo abakiliya banjye bakenera no kugirana ubufatanye n’ibindi bigo n’ubu buryo bwo gucururiza kuri internet kuko bufasha kugeza ibicuruzwa ku bakiliya bari kure.”

Umuyobozi mukuru ushinzwe ubucuruzi muri Minisiteri y’Ubucuruzi n’Inganda, Opirah Robert, yavuze ko ‘Amahugurwa DHL yayatanze mu gihe Guverinoma irimo gukora ibishoboka byose ngo iteze imbere ubucuruzi bwo kuri internet’.

Ati “Turashaka ko abacuruzi bajya mu bikorwa byo gucuruza bakoresheje internet kuko ni igikorwa kirimo gutera imbere cyane, ibihugu byadutanze iterambere byadutanze kukibyaza umusaruro, ubu natwe niho turimo gushaka ko twagana.”

Guverinoma yashyizeho gahunda zitandukanye zo guteza imbere ubu bucuruzi zirimo guhugura abacuruzi, gushyiraho urubuga ruhurizwaho ibicuruzwa, gushyiraho amategeko, uburyo bwo kwishyura n’ibindi.

DHL Express Ltd yashinzwe mu 1969 muri Leta ya San Francisco muri Amerika, n’abagabo batatu Adrian Dalsey, Larry Hillblom na Robert Lynn ari naho ikomora izina DHL. Batangiye batwara ubutumwa babuvana muri Leta imwe babujyana mu yindi, nyuma iza kugurwa n’ikigo cyigenga cy’abadage Deutsche Post DHL Group.

Ubu DHL Express ikorera mu bihugu 220; itwara ubutumwa n’ imizigo y’amoko yose, imito n’iremereye, hakoreshejwe imodoka, indege n’ubwato.

Yatangiye ibikorwa mu Rwanda mu 1985, ariko itangira gukora nk’ikigo mpuzamahanga cyigenga, DHL Express Rwanda LTD, muri Kamena 2015.

Umuyobozi wa DHL Express Rwanda Ltd, Julie Mutoni, yavuze ko aho Isi igeze abantu bagomba kubyaza umusaruro internet
Umuyobozi Mukuru muri Minisiteri y'Ubucuruzi n'Inganda, Robert Opirah, atanga ikiganiro
Umuyobozi w’ishami rya DHL rishinzwe ubucuruzi bwifashisha ikoranabuhanga n’abakiliya muri Afurika yo munsi y’Ubutayu bwa Sahara, Venessa Dewing, yababwiye ko icyo kigo gifite intego yo kongera no kunoza ubucuruzi bw’abantu ku giti cyabo n’ubw’igihugu
Umuhuzabikorwa wa ITC Rwanda, Leonard Mungarurire
Zachariah Mbanda ushinzwe ubucuruzi muri DHL Express Rwanda yagaragaje amahirwe ari mu bucuruzi bwo kuri internet
Umuyobozi Uhagarariye Ikoranabuhanga mu Rugaga rw'Abikorera mu Rwanda, PSF, Alex Ntale, atanga ikiganiro
Abakiliya beretswe ibikorwa bya DHL hifashishijwe ikoranabuhanga
Abashoramari 80 beretswe inyungu iri mu bucuruzi bwo kuri internet
Abacuruzi beretswe uburyo internet yarushaho kwagura ibikorwa byabo
DHL Express Rwanda ifasha abantu gutwara ubutumwa n’imizigo yaba imito cyangwa iminini

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza