YouthConnekt: Didier Drogba yacyeje iterambere n’ubwiyunge mu Rwanda

Yanditswe na Cyprien Niyomwungeri
Kuya 10 Ukwakira 2019 saa 03:15
Yasuwe :
0 0

Umunya-Côte d’Ivoire Didier Yves Drogba Tébily wamamaye mu mupira w’amaguru, yacyeje intambwe u Rwanda rumaze gutera mu rugendo rwo kongera kwiyubaka nyuma ya Jenoside yakorewe Abatutsi yarusize iheruheru.

Yabikomojeho mu kiganiro ku gukora ibyo ukunda kandi ukabibyaza inyungu, yatangiye mu nama Nyafurika y’Urubyiruko izwi nka ‘YouthConnekt Africa Summit’ 2019, irimo kubera i Kigali kuva kuri uyu wa 9 kugeza kuwa 11 Ukwakira 2019.

Drogba yitabiriye iyi nama mu nshingano arimo nka ambasaderi w’Ishami ry’Umuryango w’Abibumbye ryita ku iterambere, UNDP, mu bikorwa bitandukanye.

Drogba agarutse mu Rwanda aho yahaherukaga mu 2009, ubwo we na Samuel Eto’o, umunya Cameroun wigeze gukinira ikipe ya FC Barcelona, bakusanyaga imisanzu yo gutera inkunga gahunda ya ‘One Dollar Campaign’ yo gushakira icumbi abana barokotse Jenoside yakorewe Abatutsi batagira aho baba.

Yatangariye imbaraga zakoreshejwe mu kongera kubaka igihugu cyari cyashegeshwe na Jenoside yakorewe Abatutsi n’uko abantu bongeye kwicarana bakaganira bagahuza imbaraga zubaka igihugu, yemeza ko ari aha mbere Afurika byabaye.

Ati “Muri urugero, mu bunararibonye bwanjye buke, ubwo muri Côte d’Ivoire hari intambara ya gisivili, nabifashishaga nk’urugero”.

Uyu mugabo yagize uruhare mu kugarura amahoro mu gihugu cye aho mu 2006, yasabye abarwanaga mu gihugu guhagarika intambara byanaje kugerwaho. Drogba yavuze ko icyo gihe u Rwanda rwamubereye icyitegererezo, akaba yararurebeyeho mu gukora iki gikorwa cy’indashyikirwa.

Ati “Birumvikana Mandela yambereye icyitegererezo cyane, papa nk’uko mwita yambereye urugero, ariko namwe mwambereye icyitegererezo. Nagarutse hano imyaka 10 nyuma yaho mbona iterambere iki gihugu kigezeho, uko murimo gutegura YouthConnekt, mbona ko muri urugero rw’umugabane wose”.

Yasangije kandi urubyiruko urugendo yanyuzemo kuva ku mezi atandatu ubwo yasigaga nyina muri Côte d’Ivoire, akajya gukina umupira w’amaguru mu Bufaransa, aho yakinnye akavayo ajya mu Bwongereza mu ikipe ya Chelsea yagiriyemo ibihe byiza byatumye aba igihangange.

Drogba avuga ko mu buzima bwe bw’umupira yagiye ahura n’inzitizi zirimo imvune n’ibindi ariko akagumana k’umutima intego yo ‘kuba ku isonga’. Aha niho yahereye abwira urubyiruko ko rugomba kugira indoto, kwigirira icyizere, ishyaka, gukora ibyo rukunda byose bigaherekezwa no gukora cyane.

Ati “Tugomba kugira inzozi, ishyaka no gukora cyane kuko kugera ku byiza bisaba gukora cyane. Nagiye muri Chelsea kuko bari bamfitiye icyizere, hari benshi beza bari kugura ariko nabonye ayo mahirwe nyabyaza umusaruro”.

Yashishikarije urubyiruko kujya hanze rugiye kwiga, gushaka ubumenyi, hanyuma rukagaruka rugashora imari mu bihugu byarwo, ku mugabane warwo rukawuzamura.

Drogba w’imyaka 41 yabaye kapiteni wa Côte d’Ivoire ndetse yayitsindiye ibitego byinshi kurusha abandi bakinnyi, by’umwihariko aba umunyabigwi mu ikipe ya Chelsea mu Bwongereza kubera ibyo yayifashije kugeraho mu myaka icyenda yayikiniye.

Drogba kandi yabaye umukinnyi w’umwaka muri Afurika inshuro ebyiri zitandukanye, hagati ya 2006 na 2009.

Umunyarwandakazi ufite ubwenegihugu bwa Suède, Ngarambe Yolanda, uherutse kubona ibihe bimwemerera kuzitabira Shampiyona y’Isi y’Imikino ngororamubiri mu gusiganwa ku maguru, yagiriye inama urubyiruko yo kudacika intege.

Ati “Fata igihe kandi niba ukurikira ibyo wiyumvamo hari abazabona ko utabishobora ariko komeza inzira. Nubona imbogamizi zitambitse ku mahirwe yawe wizitaho ahubwo rangamira ayo mahirwe ukore cyane”.

Inama yitabiriwe n’abiganjemo urubyiruko basaga ibihumbi 10 baturutse mu bihugu 91 byo muri Afurika no hanze yayo.

Uretse uru rubyiruko, iyi nama yitabiriwe na ba baminisitiri barenga 20 b’urubyiruko bo mu bihugu bitandukanye bya Afurika, ba rwiyemezamirimo, abahagarariye imiryango mpuzamahanga n’abandi, bose baje kuganira ku iterambere ry’urubyiruko mu bijyanye n’inganda.

Urubyiruko n'abandi bitabiriye YouthConnekt bakurikiye ikiganiro ku kubyaza inyungu ibyo ukunda
Umunsi wa kabiri wa YouthConnekt wabereye muri Kigali Convention Centre
Urubyiruko rwitabiriye YouthConnekt rwaturutse mu bihugu 91 byiganjemo ibya Afurika
Umuhuzabikorwa wa One UN mu Rwanda, Fodé Ndiaye yitabiriye iyi nama
Didier Drogba akurikira ikiganiro cyatangwaga
Yolande Ngarambe, Umunyarwandakazi ukina umukino wo gusiganwa ku maguru
Drogba yavuze ko intambwe u Rwanda rumaze gutera ari ndende
Umuyobozi wa Basketball Africa League, Amadou Gallo Fall yabwiye urubyiruko ko rukwiye kubyaza umusaruro impano zarwo
Yacine Fylla umukinnyi wa Basketball
Carole Karemera washinze Ishyo Arts
Umunyarwandakazi ufite ubwenegihugu bwa Suède, Ngarambe Yolanda, uherutse kubona ibihe bimwemerera kuzitabira Shampiyona y’Isi y’Imikino ngororamubiri mu gusiganwa ku maguru

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza