Dosiye 21 z’abayobozi batunzwe agatoki n’Umugenzuzi Mukuru w’Imari ya Leta zageze mu Bugenzacyaha

Yanditswe na Rabbi Malo Umucunguzi
Kuya 6 Kamena 2019 saa 05:26
Yasuwe :
0 0

Umushinjacyaha Mukuru, Jean Boco Mutangana, yatangaje ko nyuma ya Raporo y’Umugenzuzi Mukuru w’Imari ya Leta yasohotse muri Mata, hari amadosiye agera kuri 21 Ubushinjacyaha bwoherereje Urwego rw’Ubugenzacyaha, RIB, ngo akorweho iperereza ry’ibanze.

Ku wa 29 Mata 2019 nibwo Umugenzuzi Mukuru w’Imari ya Leta, Obadiah Biraro, yagejeje ku Nteko Ishinga Amategeko raporo y’ubugenzuzi y’umwaka warangiye ku wa 30 Kamena 2018.

Iyo raporo yerekanaga ko amafaranga yakoreshejwe nta nyandiko ziyasobanura, ayasohotse inyandiko zidahagije, ayasesaguwe, ayasohotse nta burenganzira n’ayanyerejwe cyangwa yasohotse mu buriganya yose hamwe ari 5 681 814 498 Frw.

Kuri uyu wa Kane Umushinjacyaha Mukuru yabwiye itangazamakuru ko ibyaha bimunga ubukungu bw’igihugu babihagurukiye, aho bashyizeho ishami rikurikirana bene ibi byaha, risuzuma raporo y’Umugenzuzi Mukuru w’Imari ya leta isohoka buri mwaka.

Yagize ati “Ubu aho mvungira aha raporo ya 2015/2016 yarasojwe, ku ya 2016/2017 tumaze kwakira amadosiye agera kuri 52 yavuye muri RIB mu iperereza ry’ibanze, ndetse uyu munsi dufite raporo y’Umugenzuzi w’imari ya leta yasohotse muri Mata, ya 2017/2018, tumaze kohereza muri RIB amadosiye agera kuri 21, ni ukuvuga ngo turimo turihutisha iperereza ku rwego rw’ibanze.”

Yavuze ko mu gukurikirana ibi byaha nta muyobozi n’umwe batinya ku mwanya yaba ariho wose, kuko uwatinyutse gukora mu mufuka wa leta akavanamo 500 Frw n’uvanyemo miliyoni, “bose aba ari abajura”.

Yakomeje ati “Nongere mbisubiremo ko nta fi nini ibaho, nta n’iyo dutinya, waba Minisitiri, waba umucamanza, waba umushinjacyaha, waba Umuyobozi Mukuru, uzakora icyaha wese azakurikiranwa, tuzamufunga, tumushyikirize urukiko ndetse tumusabire ibihano biremereye kuko Ubushinjacyaha burigenga, bubereyeho gukora iperereza ryigenga, bukaregera inkiko nta we ubushyizeho igitutu.”

Yavuze ko nyuma yo gukurikirana ibibazo byagarutsweho muri raporo y’Umugenzuzi Mukuru w’Imari ya Leta ya 2016/2017, Ubushinjacyaha bumaze kugaruza miliyoni zirenga 500 Frw. Muri uwo mwaka raporo yerekanye ko hari 7, 997, 479, 706 Frw yakoreshejwe nabi.

Umushinjacyaha Mukuru, Jean Boco Mutangana, yatangaje ko abanyereza umutungo wa leta badashobora kwihanganirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza