Dosiye ya Diane Rwigara n’abo mu muryango we yamaze kugezwa mu Bushinjacyaha

Yanditswe na IGIHE
Kuya 2 Ukwakira 2017 saa 01:28
Yasuwe :
1 2

Ubushinjacyaha bw’u Rwanda bwatangaje ko bwashyikirijwe na Polisi y’Igihugu dosiye ikubiyemo ibiregwa Diane Rwigara n’abo mu muryango we, ko buri kuyisesengura mbere yo gufata umwanzuro wo kuyiregera mu nkiko.

Diane Rwigara, murumuna we Anne n’umubyeyi wabo Adeline batawe muri yombi na Polisi y’Igihugu ku mugoroba wo ku wa Gatandatu tariki ya 23 Nzeri 2017 bafungirwa kuri Sitasiyo ya Remera.

Mu kiganiro na IGIHE, Umuvuguzi w’Ubushinjacyaha, Nkusi Faustin, yatangaje ko ku wa Gatanu w’icyumweru gishize ari bwo Polisi yatanze dosiye y’ibyaha bashinjwa.

Ati “Twayakiriye ku wa Gatanu. Dufite iminsi itanu yo gusesengura dosiye kugira ngo turebe ibyemezo dufata bijyanye no kuyiregera; ubwo nituyiregera muzabimenya ariko twarayakiriye, tuzareba ibikubiyemo hanyuma dufate umwanzuro. Turacyakora akazi kacu kajyanye no gusesengura.”

Nkusi yasobanuye ko iyi minsi itanu ubushinjacyaha buhabwa n’itegeko ibarwa guhera umunsi bwashyikiririjwe dosiye kandi inakubiyemo iminsi y’impera z’icyumweru [Weekend].

Ubwo batabwaga muri yombi, Umuvugizi wa Polisi ACP Theos Badege, yari yatangaje ko ibyaha Diane Rwigara n’abo mu muryango we bakurikiranyweho birimo ibijyanye no gukoresha impapuro mpimbano no kunyereza imisoro ariko ko hiyongereho icyo gushaka guhungabanya umutekano w’igihugu.

Ati “Bagaragaweho ibimenyetso by’ibikorwa barimo byo gushaka guhungabanya umutekano w’igihugu ariko igikomeye cyane nyuma yo gukomeza gukurikiranwa badafunze, ni uko banze kujya bakorana neza n’ubugenzacyaha ku bwende bwabo. Ibyo byasabaga kubazana, mwumvise ko mu minsi ishize [Diane] uko abajijwe avuga ibyo yabajijwe byose. Ibyo byose rero bari banatangiye no gutambamira iperereza niyo mpamvu ubugenzacyaha bwafashe icyemezo cyo kubakurikirana bafunze.”

Diane Rwigara yari asanzwe akurikiranyweho icyaha cyo gukoresha impapuro mpimbano mu gihe yashakaga kandidatire ku mwanya wa Perezida wa Repubulika.

NEC yatangaje ko Diane Rwigara afatanyije n’umukorerabushake wayo mu Karere ka Rulindo, biganye imikono y’abantu bagasinyira abagera kuri 26 imyirondoro yabo ikuwe ku makarita y’itora uwo mukorerabushake yari afite.

Ikindi kandi ni uko kuri lisiti y’abari bashyigikiye kandidatire y’uyu mukobwa w’imyaka 35, hanagaragayeho abantu bapfuye aribo Rudahara Augustin; Maniraguha Innocent na Byiringiro Desire.

Abandi bo mu muryango we bo bakurikiranyweho ibijyanye no kunyerereza imisoro binyuze mu ikompanyi yanditse ku muryango wabo.

Ikigo cy’Igihugu gishinzwe imisoro cyatangaje ko uruganda rutunganya itabi rw’uyu muryango rumaze imyaka irenga itanu rutishyura imisoro. Amakuru avuga ko habarurwa asaga miliyari eshanu z’amafaranga y’u Rwanda iki kigo cyari gikwiye kuba cyarishyuye kuva mu 2012.

Hashize iminsi mike hatangiye kujya hanze amajwi yumvikanisha umugambi wo guhirika ubutegetsi w’abo muri uyu muryango nk’aho umubyeyi wa Diane Rwigara yumvikanye avuga imikoranire iri hagati ya Diane n’abarwanya ubutegetsi bw’u Rwanda barimo Kayumba Nyamwasa uba mu buhungiro muri Afurika y’Epfo.

Inkuru bifitanye isano:

- Diane Rwigara n’abo mu muryango we bafunzwe

- Ihishurwa ry’umugambi w’umuryango wa Rwigara mu guhirika ubutegetsi (Amajwi)

- Andi majwi y’abo kwa Rwigara yumvikanisha umugambi wo guhirika ubutegetsi

Uhereye ibumoso: Diane Rwigara; Anne Rwigara n’umubyeyi wabo Adeline Rwigara

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza