Dr Biruta yasobanuye impamvu hari ibikorwa bikiri mu bishanga nyuma ya nyirantarengwa byashyiriweho

Yanditswe na Habimana James
Kuya 22 Gicurasi 2019 saa 04:25
Yasuwe :
0 0

Minisitiri w’Ibidukikije, Dr. Biruta Vincent, yavuze ko ibikorwa byose byagiye mu bishanga mu buryo butubahirije amategeko byavanwemo, ibikirimo byatewe n’uko bifite umwihariko watumye bihabwa igihe cyo kuhavanwa.

Nubwo hatagaragazwa umwihariko w’ibyo bigo, Dr Biruta yavuze ko gahunda yo kuvana ibikorwa byangiza ibidukikije mu bishanga itigeze ihagarara.

Tariki ya 24 Kamena 2017 ubwo Perezida Paul Kagame yakoranaga umuganda n’abaturage b’Umurenge wa Ndera mu karere ka Gasabo n’abo mu gace ka Kicukiro, gakora ku Gishanga cya Nyandungu, yibukije abantu bigabije ibishanga kwibwiriza bakabivamo.

Perezida Kagame yavuze ko ibishanga bigomba kubungwabungwa, ntibikomeze kuvogerwa ndetse ababikoze bakwiye kwibwiriza bakabivamo.

Yatangaje ko abafite ibikorwa mu bishanga kandi atari ho bigomba kuba biri bagomba kubyimura badatinze.

Yagize ati “Ndibutsa ko mu minsi mike iri imbere bigomba gukosorwa, ubwo ndaburira abazi ko bari aho hantu aho ariho hose, waba ufitemo ishuri, ufitemo inzu wubatsemo ubamo, waba ufitemo ifamu y’inka, biraza gushakirwa ubundi buryo, ibyo bijye aho bikwiriye kujya bive aho bidakwiriye.”

Kuri uyu wa Gatatu, tariki ya 22 Gicurasi 2019, Minisitiri Dr Biruta Vincent ari kumwe n’Umuyobozi Mukuru w’Ikigo cy’Igihugu gishinzwe kubungabunga Ibidukikije (REMA), Eng. Coletha Ruhamya bagiranye ikiganiro n’abanyamakuru, kuri gahunda ziteganyijwe mu cyumweru cyahariwe kwita ku bidukikije.

Ubwo yabazwaga kuri gahunda yo kuvana ibikorwa mu bishanga, Dr Biruta yavuze ko hari ibyakozwe birimo kuvanamo ibintu byose bihari binyuranye n’amategeko.

Yagize ati “Ibikorwa byose byagiyemo mu buryo butubahirije amategeko byavuyemo ariko hari n’ibindi byagiye bishingiye ku mategeko yari ariho icyo gihe. Ibyo twavuga ni nka ziriya nganda z’i Gikondo kuko zo zashyizwemo na leta kandi amategeko y’icyo gihe yarabyemeraga. Muri icyo gihe hari kandi n’abandi bantu bagiye bubakamo ibikorwa ugasanga babifitiye ibyangombwa, abo na bo twabahaye gahunda yo kuzagenda tubimura buhoro buhoro.”

Yakomeje agira ati “Ku bijyanye n’ibyagiye bijyamo mu buryo butubahirije amategeko, byo byarangiyemo ibindi bishobora kuba bikirimo birimo kubera ko bifite umwihariko watumye ba nyirabyo bahabwa igihe ngo bitegure ariko gahunda ntabwo yahagaze izakomeza. Ikindi navuga ni uko kwimura bizagenda bigira ibyiciro bitandukanye bitewe n’uko amikoro azagenda aboneka ariko tuzageza aho tubimaremo.”

Nyirantarengwa ku kuvana ibikorwa bibarizwa mu bishanga yagiye yegezwa inyuma inshuro nyinshi. Mu ntangiriro z’umwaka, ubuyobozi bw’Umujyi wa Kigali bwari bwatangaje ko tariki ya 27 Mutarama 2019, nta gikorwa kigomba kuba kikirangwa mu bishanga.

Icyo gihe Umuyobozi w’Umujyi wa Kigali, Rwakazina Marie Chantal , yabwiye RBA ko utazakuraho ibyo bikorwa mu gihe cyateganyijwe, ubuyobozi buzabyivaniraho kandi ikiguzi cyo kubikuraho cyishyurwe na nyirabyo, anabihanirwe.

Minisitiri w’Ibidukikije, Dr. Biruta Vincent, yavuze ko ibikorwa byose byagiye mu bishanga mu buryo butubahirije amategeko byavanwemo, hasigaramo ibifite umwihariko
Minisitiri w'Ibidukikije, Dr Biruta Vincent n’Umuyobozi Mukuru w’Ikigo cy’Igihugu gishinzwe kubungabunga Ibidukikije (REMA), Eng. Coletha Ruhamya bagiranye ikiganiro n’abanyamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza