Dr Bizimana yagaragaje imvano y’ibiganiro bipfobya Jenoside yakorewe Abatutsi bitambuka ku maradiyo mpuzamahanga

Yanditswe na Prudence Kwizera
Kuya 28 Mata 2019 saa 08:39
Yasuwe :
0 0

Umunyamabanga Nshingwabikorwa wa Komisiyo y’Igihugu yo kurwanya Jenoside (CNLG), Dr Bizimana Jean Damascène, yavuze ko bamwe mu bagize uruhare mu gutegura no gushyira mu bikorwa Jenoside yakorewe Abatutsi ari bo bari inyuma y’ibiganiro bisebya u Rwanda bihita kuri amwe mu maradiyo mpuzamahanga.

Yabigarutseho kuri uyu wa Gatandatu mu kiganiro yatanze ubwo yari yitabiriye igikorwa cyo kwibuka ku nshuro ya 25 Jenoside yakorewe Abatutsi mu Karere ka Huye i Rubona ahakoreraga ISAR.

Yasobanuye byinshi ku itegurwa n’ishyirwa mu bikorwa rya Jenoside yakorewe Abatutsi avuga ko ikimara guhagarikwa n’Ingabo zari iza FPR Inkotanyi, bamwe mu bayikoze batangiye umugambi wo kuyihakana no kuyipfobya babinyujije no kuri amwe mu maradiyo mpuzamahanga.

Yagize ati “Icyo bakurikijeho bamaze gutsindwa ni amayeri yo gupfobya no guhakana Jenoside yakorewe Abatutsi. Ku buryo ibibazo by’ingengabitekerezo ya Jenoside duhura na byo bishingiye ku ipfobya n’ihakana babiteguye, babitangiye bagitsindwa, Jenoside ikimara guhagarikwa.”

Yavuze ko bageze mu Bubiligi uwitwa François Nzabahimana uvuka muri Komini yitwaga Mbazi wabaye Minisitiri w’Ubucuruzi kuri Leta ya Habyarimana, ahuza abantu ashiga ishyaka ryitwa IDC bashyiraho n’itsinda rigamije gushakisha uburyo bwose bwo guhakana no gupfobya Jenoside yakorewe Abatutsi.

Dr Bizimana yagarutse by’umwihariko ku mugambi iryo tsinda ryakoresheje wo guhakana no gupfobya Jenoside yakorewe Abatutsi ryifashishije amaradiyo mpuzamahanga.

Ati “Ubundi buryo bakoreshe kandi n’ubu bukaba bugikora ni ukureba uko bakoresha amaradiyo mpuzamahanga mu nyungu za bo noneho bakareba abanyamakuru b’abanyarwanda bakorera izo radiyo bakabegera bakabumvisha umugambi wa bo kugira ngo bajye bakora ibiganiro bihakana Jenoside binayipfobya.”

Yavuze ko ibyo bikubiye mu nyandiko bise ‘gukoresha ubukangurambaga bw’itangazamakuru’ banditse tariki 3 Ukwakira 1996; agaragaza ingero z’ayo maradiyo n’abanyamakuru bavuzwe bagomba kwifashishwa.

Ati “Bavugaga ko hari abanyamakuru bagomba kwegera, bakavuga Augustin Karekezi, Augustin Hatari, Phocas Fashaho na Thomas Kamirindi bakorera Ijwi rya Amerika ko bagomba kujya kubashyikiriza uwo mugambi wa bo kugira ngo bajye babibafashamo.”

“Nimuzakurikira ibiganiro Karekezi atanga na Kamirindi wigira nyoni nyinshi, avuka hirya aha i Save nabwo muzasanga abo bantu atari bazima na buke. Noneho bakavuga ko kuri BBC bagombaga kwegera Henri Yusufu Mugenzi na Venuste Nshimiyimana (nawe ni umunya-Butare, ni umunya-Gishamvu.”

Yakomeje agira ati “Mwumva ibiganiro BBC Gahuzamiryango yagiye ikora iha urubuga aba bajenosideri; byari byaravuye kuri uyu mugambi bateguye. Noneho bakavuga n’abandi banyamakuru barimo Gerard Gatare ukorera Canal Afrique yo muri Afurika y’Epfo na Barthazar Nduwayezu wakoreraga Agence yitwaga hirondelle iba Arusha.”

Dr Bizimana yavuze ko ibiganiro byose by’ikinyarwanda binyura kuri ayo maradiyo mpuzamahanga n’uburyo abogama cyane biri muri gahunda y’abajenosideri yo guhakana no gupfobya Jenoside yakorewe Abatutsi.

Yasoje ikiganiro avuga ko abitwaga abahanga n’impuguke mu gihe cya Jenoside bakoze ibintu bibi bacura umugambi wo kwica abatutsi banawushyira mu bikorwa bityo ab’ubu bafite inshingano ikomeye yo kubihindura.

Ati “Ibyo birerekana uruhare runini injijuke z’ubu, abize b’ubu n’abana bari kwiga muri iki gihe tugomba kugira rwo guhindura ibingibi. U Rwanda rumaze kugera heza kubera Politike nziza ya Perezida wa Repubulika Paul Kagame n’abo bafatanyije, igihugu tumaze kucyubaka kirakomeye.”

Dr Bizimana yasabye ubufatanye bwa buri wese mu kurwanya no guhindura abantu bakirangwa n’ingengabitekerezo ya Jenoside avuga ko n’iyo haba hasigaye umwe agomba kubuzwa gukomeza kuroga.

Yasabye ko hakomeza inzira nziza yo kubaka igihugu cyiza ku buryo abana bahari n’abazavuka bizabarinda kugwa mu mutego wo gukora ikibi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza