Dr. Iyamuremye yatunguwe n’amagambo ya Simbikangwa mu rubanza rwe mu Bufaransa

Yanditswe na Philbert Girinema
Kuya 30 Ukwakira 2016 saa 09:08
Yasuwe : XX
0

Dr Augustin Iyamuremye yagaragaje ko hakiri inzitizi nyinshi mu rugendo rugana ku bumwe n’ubwiyunge, asaba ko urubyiruko rukora ibishoboka mu kubaka u Rwanda binyuze mu komorana ibikomere bishingiye ku mateka u Rwanda rwanyuzemo.

Dr Iyamuremye afite ubunararibonye muri politiki y’u Rwanda, aho uretse kwigisha muri Kaminuza yabaye Minisitiri w’Ubuhinzi n’Ubworozi, aza no kuba uw’Ububanyi n’Amahanga, Umusenateri, ubu akayobora inama ngishwanama y’inzego za leta.

Mu kiganiro kuri gahunda ya “Ndi Umunyarwanda” kuri uyu wa Gatandatu yagejeje ku rubyiruko rw’ishyaka PSD rwahuriye mu mahugurwa i Rwamagana mu Ntara y’Uburasirazuba, yavuze ingaruka za Jenoside yakorewe Abatutsi mu 1994 zirenga abayikorewe zikagera no ku bayikoze.

Yatanze urugero ku magambo aheruka kubwirwa na Pascal Simbikangwa wari umusirikare ufite ipeti rya Kapiteni mu ngabo zarindaga Perezida Juvenal Habyarimana, wakatiwe n’urukiko rwo mu Bufaransa gufungwa imyaka 25, ariko akaba ari kuburana mu bujurire.

Dr Iyamuremye yagize ati “Njye nagiye mu rubanza rwe n’ubu nzasubirayo kuko yarajuriye. Yaravuze ngo igihe cyose Jenoside yabaye, kandi yari atuye hano muri Kiyovu aranahava ajya ku Gisenyi. Yaravuze ngo ntiyigeze abona umurambo n’umwe. Mutekereze! N’abazungu barebaga baravuga bati icyo cyonyine cyatuma tugukatira n’ubuzima bwawe bwose.’’

“Nanjye natanze ubuhamya kuko nari muzi, njye mvuga ibintu nahagazeho n’ingero zifatika. Baramubaza bati ariko se uyu mugabo, ibyo yavuze, wowe wavuga iki? Uzi ukuntu yasubije? Ngo uriya mugabo [ari njye atunga urutoki] njyewe aho ndi aha, natanga ibyo mfite byose kugira ngo mpagume aho kuba mu mwanya we!’’

Yavuze ko hari abakoze Jenoside bagize ingaruka zibababaza bakanicuza, ariko hari n’ababikoze “babaye abasazi”.

Ati “Nk’uwo muntu ibyo yavuze ni uburwayi, bimwe umuntu aba ari mu yindi Isi ntabone ibiri imbere ye. Ibyo rero mugomba kubimenya, kuko igihugu gihanganye nabyo.’’

Mu rugendo rw’u Rwanda rugana ku bumwe n’ubwiyunge kandi ngo harimo n’Abanyamahanga babangamiye inzira yo kongera kubaka ubumwe n’ubwiyunge kubera uruhare bagize mu mateka mabi yarwo.

Yanagaragaje ko hakiri ikibazo cy’imyumvire ishingira ku bibazo by’ubukungu byugarije u Rwanda n’ibindi bihugu, ariko hakaba ababibonera mu ndorerwamo y’amateka y’u Rwanda, atanga urugero rwa bamwe bashobora guhuza nk’ikibazo cy’ubushomeri mu Rwanda n’amoko cyangwa uturere, aho kugisesengura mu rwego rwacyo.

Dr Iyamuremye yavuze ko ikindi kibazo gikomeye u Rwanda rwagize ari abanyapolitiki bamwe bashyira inyungu za politiki imbere z’izindi zose kandi bigoye ko kizarangira, nubwo ngo mu bihe byashize PSD yitwaye neza ariko ntibure ababikora.

Ati “Nanemeza ko nk’uwari muri iki gihugu, ko ubukana bwa Jenoside yakorewe Abatutsi, iyo amashyaka twitaga aya opozisiyo atabugiramo uruhare, ndetse n’aba PSD bamwe na bamwe, ntabwo biba byarafashe intera, hari kurokoka abantu benshi kurushaho cyangwa se abijanditse muri jenoside bakaba bake. Ariko kubera inyungu za politiki zumvikanaga nabi, hari n’abanyapolitiki babigiyemo.’’

Dr Augustin Iyamuremye yagaragaje ko hakiri inzitizi nyinshi mu rugendo rugana ku bumwe n’ubwiyunge

Ibyo byose yabishingiyeho avuga ko gahunda ya ‘Ndi Umunyarwanda’ igomba kuba ‘isubyo’ ririnda Abanyarwanda gusubira mu bihe nk’ibyo banyuzemo, “abantu bagashyira imbere inyungu z’Ubunyarwanda kurusha inyungu za politiki.’’

Yavuze ko mu gushaka kubaka umuryango Nyarwanda cyangwa ishyaka, bitagomba gukorwa ngo jenoside yibagirane, kuko u Rwanda rugizwe n’imiryango yahemukiranye.

Ati “Nagira ngo rubyiruko twe kuba imbata y’ibikomere, twe kuba imbata y’uburakari, ariko na none tumenye kwicisha bugufi, tuvuga tuti dore amateka, nubwo tutayagizemo uruhare, ayo mateka tubabajwe n’uko yabaye.’’

“Muri Ndi Umunyarwanda tugomba komorana ibikomere, tugaha agaciro gusaba no gutanga imbabazi. Ndi umunyarwanda ni icyomoro, ni urukingo ruturinda kongera gukomereka.’’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza