Dr Saber agiye gutakamba ngo hatagabanywa inkunga y’impunzi ziri mu Rwanda

Yanditswe na Mukaneza M.Ange
Kuya 21 Mata 2017 saa 06:30
Yasuwe :
0 0

Intambara, iterabwoba, ihindagurika ry’ibihe, ni bimwe mu bibazo byugarije isi bikomeje gutuma umubare w’impunzi n’abibasiwe no kubura ibiribwa wiyongera.

Ishami ry’Umuryango w’Abibumbye ryita ku Mpunzi (UNHCR) ritangaza ko abagera kuri miliyoni 20 bo mu bihugu birimo Nigeria, Somalia, Sudani y’Epfo na Yemen bugarijwe n’ikibazo cy’inzara.

Si aha honyine hari abaturage bugarijwe n’inzara kuko no muri Syria, Iraq n’ahandi hagiye hari ibibazo by’imvururu zituma abaturage batabasha gukora ngo babone ibibatunga; hakaniyongeraho n’impunzi ziri mu bihugu bitandukanye birimo n’u Rwanda rucumbikiye abasaga ibihumbi 164.

Mu gihe umubare w’abakeneye ubutabazi bwihuse ukomeza kwiyongera, inkunga ikenewe ngo bagezweho ibiribwa n’ubundi bufasha ikomeje kuba nke, aho muri miliyari 4.4 z’amadolari zikenewe bitarenze Nyakanga 2017, hamaze kuboneka miliyoni 984 z’amadolari gusa.

Mu rwego rwo gusarangaranya inkunga nke ihari, hafashwe umwanzuro wo kugenda bagabanya iyari isanzwe itangwa aho mu bihugu birimo n’u Rwanda izagabanuka kugera kuri 50%.

Ku ruhande rw’u Rwanda, UNHCR igaragaza ko mu ngengo y’imari ingana na miliyoni 102.4 z’amadolari ikenewe kugira ingo impunzi zibashe kwitabwaho kugeza ku itariki 4 Mata 2017 hari hamaze kuboneka miliyoni 13.5 gusa.

Aha umuntu yakwibaza uburyo impunzi zigiye kubaho, dore ko n’ubundi 6 300Frw bahabwa buri kwezi badahwema kugaragaza ko adahagije.

Mu kiganiro na IGIHE, Umuyobozi wa UNHCR mu Rwanda, Azam Saber, yavuze ko koko ikibazo cy’inkunga kibateye inkeke, ariko uko byagenda kose hagomba kuboneka igisubizo.

Yagize ati ”Dufite ikibazo cy’inkunga idahagije ariko na none turi gukora cyane. Tuzakora cyane twereke abaterankunga ko mu Rwanda inkunga batanga ikoreshwa neza, bityo ko badakwiye kuyihagarika.”

Ku bijyanye n’ibirirwa bihabwa impunzi mu Rwanda, Saber yavuze ko ari ikibazo gikomeye aho bike bihari bagerageza kubicunga neza umunsi ku munsi, kandi uko byagenda kose ibiribwa bikaba bidashobora kugabanywa.

Yagize ati ”Mutujyanire ubu butumwa ko ibiryo ari umutekano kandi ko ari kimwe mu byibanze mu buzima. Impunzi ziramutse zidafite ibyo kurya, hazaba ikibazo gikomeye mu kubarinda, hazaba ikibazo gikomeye mu buzima, haba ikibazo ku kubacungira umutekano kuko bazatangira kwibana ibiryo hagati yabo, kandi ibi ntabwo tubyifuza.”

UNHCR ivuga ko hari icyizere ko nubwo ibintu bitameze neza mu baterankunga kubera ibikorwa bitandukanye birimo n’amatora, inkunga izaboneka vuba kubera ko iteka ryose ikibazo kirebana n’impunzi kiba kigomba gushakirwa umuti mu maguru mashya.

Imibare igaragaza ko ku butaka bw’u Rwanda habarurwa impunzi 164 561, baturuka mu bihugu 11 birimo u Burundi, Repubulika iharanira Demokarasi ya Congo, Afghanistan, Angola, Rebulika ya Centrafrique, Chad, Eritrea, Haiti, Kenya, Somalia na Uganda.

Umuyobozi wa UNHCR mu Rwanda, Azam Saber

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza