Dukwiye kwita ku mbogamizi zikigaragara mu rugamba rwo kurwanya Sida- Madamu Jeannette Kagame

Yanditswe na Rabbi Malo Umucunguzi
Kuya 2 Ukuboza 2019 saa 09:49
Yasuwe :
0 0

Madamu Jeannette Kagame yasabye ibihugu kongera imbaraga mu kurwanya icyorezo cya Sida, hakarebwa impamvu zituma imbaraga zishyirwa mu kukirwanya hari aho zidatanga umusaruro.

Yabigarutseho kuri uyu wa Mbere mu Nama y’Umuryango uhuza abadamu b’abakuru b’ibihugu bya Afurika ugamije Iterambere, OAFLAD. Yabereye i Kigali mu Nama Mpuzamahanga ya 20 kuri Sida n’izindi ndwara zandurira mu mibonano mpuzabitsina, ICASA.

Yitabiriwe n’abarimo Madamu Antoinette Sassou Nguesso wa Congo Brazzaville, Madamu Hinda Déby Itno wa Tchad, Madamu Aïssata Issoufo Mahamadou wa Niger, Madamu Rebecca Akufo-Addo wa Ghana na Madamu Neo Jane Masisi wa Botswana; haganirwa ku miyoborere y’abadamu b’abakuru b’ibihugu bya Afurika mu ­kurwanya virusi ya HIV n’indwara ya Sida.

Madamu Jeannette Kagame yavuze ko OAFLAD yashinzwe mu myaka 17 ishize hagamijwe kunganira abafite Virusi itera Sida by’umwihariko ababa bugarijwe cyane, ni ukuvuga abagore n’abana.

Muri icyo gihe ngo byasabaga ko buri gihugu giha ubwihutirwe imishinga n’ibikorwa bijyanye n’ikibazo gihari, ku buryo uyu munsi hari intambwe zo kwishimira.

Yagize ati “Twese tubona impinduka ibikorwa nk’ubukangurambaga bwa ‘Free to Shine’ byagize muri buri kimwe mu bihugu byacu, mu kudukangurira kongera imbaraga mu kurandura ubwandu bwa Sida mu bana no gusigasira ubuzima bw’ababyeyi.”

Yavuze uburyo Umuryango Imbuto Foundation yashinze, washyizeho gahunda n’imishinga bijyanye n’icyerekezo cy’igihugu nka gahunda igamije kwihutisha iterambere, icyerekezo 2063 cy’Umuryango wa Afurika yunze Ubumwe n’Intego zigamije Iterambere Rirambye (SGDs).

Yakomeje agira ati “Imishinga nka Family Package watangijwe ugamije gufasha ababyeyi banduye kubyara abana bazima mu myaka 18 ishize, uha serivisi nyinshi imiryango ibana na virusi ya Sida n’abakobwa babyaye bakiri bato.

Binyuze muri uyu mushinga, imiryango ibana na Virusi itera Sida ihuzwa n’ibigo nderabuzima ndetse igakurikiranwa mu gufata imiti binyuze ku bajyanama b’ubuzima n’abafashamyumvire.”

“Binyuze mu mbaraga zashyizweho n’igihugu bitandukanye, uburyo bwo gufasha umubyeyi kutanduza umwana bumaze kugera kuri 96%. Imishinga yacu ifasha urubyiruko kubona amakuru ajyanye n’ubuzima bw’imyororokere, ubuvuzi n’izindi serivisi, mu kugabanya ubwandu bushya bwa HIV mu rubyiruko mu mujyi no mu byaro kuva mu 2010, nayo igira uruhare mu kurwanya Sida n’indwara zandurira mu mibonano mpuzabitsina, mu gihugu no ku mugabane wose.”

Madamu Jeannette Kagame yavuze ko imbaraga zashyizwe hamwe hagati y’inzego za leta n’imiryango yigenga zatanze umusaruro mu kurwanya Sida, aho by’umwihariko mu Rwanda, kugeza mu 2018 ubwandu bushya bwa virusi itera Sida bwagabanutse kuri 83% naho impfu ziterwa na Sida zigabanukaho 82% mu myaka 20 ishize.

Yakomeje ati “Kwishimira intambwe tumaze gutera bikwiye no kuduha umwanya wo gusesengura byimbitse urugendo tumaze gukora, bikaba umwanya wo kuganira birambuye ku mbogamizi zirimo n’izishingiye ku cyuho mu buringanire, zikomeje gutuma nubwo dushyiramo imbaraga, umugabane wacu usigara inyuma mu kurwanya no gukumira Sida mu baturage bacu.”

Yavuze ko iyi nama ikwiye no kuba umwanya wo guhanahana ibitekerezo ku bisubizo byatuma hazibwa icyuho mu baturage, harebwa aho ibintu byagenze neza n’aho ibyemezo byafashwe bitatanze umusaruro.

Umuyobozi wa OAFLAD, Madamu Antoinette Sassou Nguesso, yavuze ko intego ibihugu byihaye yo kugira abaturage, 90% bazi uko bahagaze kuri virusi ya Sida, 90% banduye bakaba bafata imiti naho 90% bakaba bafite virusi itagitembera mu maraso, kimwe n’Isi itarangwamo Sida yifuzwa mu 2030, bitazagerwaho igihe ibihugu bidahuje imbaraga.

Ubwandu bushya buragabanuka nubwo hari imbogamizi

Umuyobozi w’Ishami ry’Umuryango w’Abibumbye Rishinzwe kurwanya Sida, Winnie Byanyima, we yagaragaje ko mu 2018 abantu miliyoni 38 bari bafite HIV ku Isi hose, muri bo miliyoni 24.5 bafataga imiti, umubare yise ko ari munini.

Kugeza ubu kandi abantu bane muri batanu bafite HIV ku Isi bazi uko bahagaze, nibura bibiri bya gatatu bahabwa imiti igabanya ubukana kandi hejuru ya kimwe cya kabiri cyabo bafite virusi itagitembera mu maraso, bivuze ko badashobora kwanduza.

Yongeye ho ko “Nubwo ibyo byagezweho, igipimo cyo kugabanuka k’ubwandu ku Isi kimwe n’impfu ziterwa na Sida, bigenda bijya hasi uko imyaka ishira. Kandi iki cyorezo kirimo no guhinduka.“

Ikindi ngo ni uko urebye nko mu 2018, hejuru ya kimwe cya kabiri cy’abantu banduye VIH bari mu byiciro bidakunze gutindwaho, ni ukuvuga abakora uburaya, abakoresha ibiyobyabwenge, abaryamana bahuje ibitsina, abihinduza imiterere y’umubiri/igitsina abafite ibitsina batishimiye (transgenders) n’abagororwa n’abo bashakanye.

Ati “Aba bantu ntabwo bipimisha, ntibafata imiti kubera ko uburenganzira bwabo bukomeje kubangamirwa. Ntabwo byanihanganirwa kuba uyu munsi, abangavu 6200 bandura HIV buri cyumweru. Turi kubatererana, ntabwo dukwiye gutuma biba.“

Uretse ibyo kandi, nibura kimwe cya kabiri cy’abana bavukana HIV ntabwo bahabwa imiti uko bikwiye, ibintu ngo bibashyira mu byago byo gupfa mbere y’uko buzuza imyaka ibiri.

Muri iki gihe ngo abangavu bakomeje kwiyongera mu mubare w’abandura HIV, ahanini kubera ihohoterwa, ndetse ngo bari imbere mu badafite ubumenyi buhagije ku kwirinda no gufata ibyemezo ku buzima bwabo, bashingiye ku makuru afatika.

Madamu Neo Jane Masisi, umugore wa Perezida wa Botswana, yavuze ko usanga hakiri imyumvire ituma umugore yumva ko umugabo ari we ufite uburenganzira bwa nyuma ku kintu cyose, bigatuma umugore atagira uburenganzira bwo gutanga ibitekerezo ku buryo bwo kwirinda mu gihe cy’imibonano mpuzabitsina, bigatiza umurindi ubwandu bushya.

Hinda Déby Itno we yashimangiye ko mu bikomeje gutiza umurindi ubwandu bushya bwa HIV harimo ibikorwa byo gushyingira abana, nubwo bizwi ko ibihugu byinshi byaciye uyu mugenzo.

Yakomeje ati “Gushyingira abana ntabwo ari uguhungabanya uburenganzira bw’abana gusa, ahubwo bibashyira no mu byago byo kwandura VIH kubera imyaka yabo iba ikiri mike n’imbaraga nke z’umubiri."

Sida ntikwiye kurwanywa yonyine

Madamu Aïssata Issoufo Mahamadou, umugore wa Perezida wa Niger, we yavuze ko nubwo hashyirwa imbaraga nyinshi mu kurwanya Sida, hari n’izindi ndwara zandurira mu mibonano mpuzabitsina na Mburugu (syphilis) na Hepatite B, nazo zikeneye gushakirwa umuti nubwo usanga imbaraga zishyirwa mu kuzirwanya zikiri hasi.

Yakomeje ati "Ni n’indwara kandi uko ari eshatu zishobora kwanduzwa, umubyeyi akazanduza umwanya we, ku buryo kuzirwanya bikwiye kugendera hamwe."

Yavuze ko gutwarira hamwe izi ndwara ari uburyo bwiza bwo kuzihashya, kuko kugeza uyu munsi Umugabane wa Afurika udafite ubushobozi buhagije bwo kurwanya buri ndwara ukwayo.

Umuyobozi w’Inama y’Ubutegetsi ya Global Fund, Donald Kaberuka, yagarutse ku buryo uyu muryango uheruka gukusanya miliyari 14.02 z’amadolari ya Amerika zizifashishwa mu bikorwa byo kurwanya Sida, Igituntu na Malaria mu myaka itatu uhereye mu 2020. Ni igikorwa Guverinoma y’u Rwanda yemeye gutangamo miliyoni $ 2.5 (asaga miliyari 2.3 Frw)

Dr Kaberuka yashimiye abadamu b’abakuru b’ibihugu, kuko ibyagezweho bitari gushoboka iyo batabigiramo uruhare. Yakomeje ati “Bizadufasha kwagura ibikorwa byacu bisanzwe no gufasha ibihugu kubaka imikorere yabyo."

Yavuze ko uyu munsi hakomeje kwishimirwa intambwe yatewe mu kurwanya Sida, yashobotse bitewe n’ubukangurambaga mpuzamahanga bwakozwe kuva mu 2000, ariko ngo aho bigeze birashoboka ko inkunga zijya muri uru rugamba zakomeza kugabanuka.

Ati "Ni ngombwa ko mbivuga kuko ibyo twakoze ntabwo bikwiye gusubira inyuma, kandi bizakunda ari uko ibihugu byacu byongereye inkunga muri izi gahunda. Nitutabikora, tuzasubira inyuma."

Yavuze ko mu myaka 18 ushize ibihugu byinshi byateye intambwe, ariko iryo zamuka ridahura n’amafaranga ashorwa mu bikorwa by’ubuzima.

Yasabye abadamu b’abakuru b’ibihugu gukora ubuvugizi, cyane ko hemejwe mu nama ya Abuja ko mu ngengo y’imari, 15% yayo izajya ikoreshwa mu bikorwa by’ubuzima, ariko mu bihugu byinshi ntibikorwa, yemwe no ku babifitiye ubushobozi.

Dr Kaberuka, ibyo yabihuje n’ibibazo bigaragara mu bihugu bimwe, aho mu gihe byishyura amadeni usanga ingengo y’imari igabanywa bwa mbere ari iy’ubuzima n’uburezi, bagafata ingengo y’imari y’ibikorwa remezo nk’idakorwaho, ibintu avuga ko bishyira mu kaga ibihugu n’abaturage.

Mu buhamya bwe Umunyarwandakazi Muneza Sylvie w’imyaka 47, yasangije abandi ko ingamba zafashwe mu kurwanya Sida no kwita ku bamaze kwandura virusi yayo, zikomeje gutanga umusaruro.

Yavuze ko mu 1998 ari bwo yamenye ko yanduye virusi itera Sida, nyuma y’iminsi yari amaze afite inkorora idakira, agiye kwa muganga bamubwira ko arwaye igituntu.

Ati “Nashatse kwiyahura ku buryo nifuzaga ko imodoka zangoga ngo nipfire, ariko ntabwo napfuye, hari impamvu Imana yabikoze. Abaturanyi banshyize mu kato kenshi cyane, kunyegera cyari ikibazo, bumvaga ko nabo nshobora kubanduza.“

Madamu Muneza yakomeje avuga ko yaje kwegeranya imfubyi za Sida bashinga umuryango bawita Igihozo. Ngo baje gusaba Leta ubufasha kubera ikibazo cy’umuti ugabanya ubukana wari uhenze cyane, nayo ibemerera kubafasha bawubona ku buntu.

Yakomeje agira ati "Ikindi kwivuza indwara z’ibyuririzi zari nyinshi, byari bigoye. Mu magambo ye yashimiye ubufasha babonye bwo kwivuza agira ati: Turashimira Madamu Jeannette Kagame na Imbuto Foundation, kiriya gikorwa mwadufashishe cya mituweri y’imyaka itanu cyaradufashije cyane.“

Yanashimye gahunda zashyizweho zituma nk’uyu munsi umugore wanduye ashobora kubyara umwana muzima, nka bumwe mu buryo butuma ubwandu bwa Sida bukomeje kugabanuka mu gihugu.

Madamu Jeannette Kagame yavuze ko bikwiye ko hashyirwa imbaraga mu kwita ku mbogamizi zikigaragara mu rugamba rwo kurwanya Sida
Umuyobozi w’Ishami ry’Umuryango w’Abibumbye Rishinzwe kurwanya Sida, Winnie Byanyima, we yagaragaje ko mu 2018 abantu miliyoni 38 bari bafite HIV ku Isi hose, muri bo miliyoni 24.5 bafataga imiti, umubare yise ko ari munini
Madamu Jeannette Kagame yavuze ko bikwiye ko hashyirwa imbaraga mu kwita ku mbogamizi zikigaragara mu rugamba rwo kurwanya Sida
Madamu Aïssata Issoufo Mahamadou yasabye ko kurwanya Sida bijyana n'izindi ndwara zandurira mu mibonano mpuzabitsina
Madamu Jeannette Kagame yandika bimwe mu bitekerezo byatangwaga
Madamu Hinda Déby Itno yasabye ko ibibazo byo gushyingira abana bihagurukirwa
Muneza Sylvie w’imyaka 47 yagaragaje ko nyuma yo kwandura Sida ubuzima bukomeza
Madamu Antoinette Sassou Nguesso wa Congo Brazzaville ni we uyoboye OAFLAD
Abadamu b'abakuru b'ibihugu bahuriye mu Muryango uhuza abadamu b’abakuru b’ibihugu bya Afurika ugamije Iterambere, OAFLAD, bafashe ifoto y'urwibutso nyuma y'ibiganiro byabereye mu Nama Mpuzamahanga ya 20 kuri Sida n’izindi ndwara zandurira mu mibonano mpuzabitsina, ICASA yafunguwe ku wa 2 Ukuboza 2019

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza