EGAM yasabye Perezida Macron kwitandukanya n’ahahise h’u Bufaransa mu Rwanda

Yanditswe na IGIHE
Kuya 29 Werurwe 2019 saa 09:51
Yasuwe :
0 0

Umuryango w’u Burayi urwanya irondakoko, EGAM (European Grassroots Antiracist Movement) wandikiye Perezida w’u Bufaransa, Emmanuel Macron, uwusaba kwitandukanya n’ahahise h’igihugu cye mu mateka y’u Rwanda ku bw’ineza y’abaturage b’ibihugu byombi.

Uyu mwaka ubaye uwa 25 Jenoside yakorewe Abatutsi ibaye igahitana abasaga miliyoni. Jenoside yateguwe ishyirwa mu bikorwa na Leta yari ku butegetsi, ku bufasha bukomeye yahabwaga n’igihugu cy’u Bufaransa muri icyo gihe.

Nubwo imyaka ibaye myinshi, u Bufaransa ntiburajya ku mugaragaro ngo bwemere ko ubufasha bwahaye Leta yakoze Jenoside bwagize ingaruka zikomeye ku muryango nyarwanda n’ubu zikiwugaruka.

Abagize EGAM bandikiye ibaruwa ifunguye Perezida Macron bamusaba gukora itandukaniro n’abamubanjirije akemera uruhare rw’igihugu cye mu byabaye mu Rwanda.

Bagize bati “Kuva mutowe, mwagaragaje ibimenyetso bitanga icyizere ko igihe kigeze ngo u Bufaransa buve ku ruhande rwaranzwe no guceceka no guhakana kuva Jenoside ibaye. Nyuma y’imyaka 25, ni umwanya wo gutera intambwe hakavugishwa ukuri kandi ubutabera bugatangwa.”

U Bufaransa bwamaze kwemeza ko buzahagararirwa i Kigali mu muhango wo kwibuka ku nshuro ya 25 Jenoside yakorewe Abatutsi.

EGAM isanga ari umwanya mwiza ukwiye kubyazwa umusaruro hubakwa umubano mushya w’ibihugu byombi no gukura icyasha k’u Bufaransa nyuma yo kwanga kwitabira ku munota wa nyuma mu 2014 umuhango wo kwibuka ku nshuro 20 Jenoside yakorewe Abatutsi.

Mu ibaruwa yasinyweho n’abantu batandukanye barimo Bernard Kouchner wahoze ari Minisitiri w’Ububanyi n’Amahanga w’u Bufaransa, igaragaza ko icyo abaturage b’u Rwanda n’u Bufaransa bifuza ari uko ukuri kuvugwa.

Perezida Macron yasabwe kwitandukanya n’abamubanjirije agasobanura neza uruhare rw’igihugu cye mu mateka y’u Rwanda.

Mu 2010 uwari Perezida w’u Bufaransa, Nicolas Sarkozy, yaje mu Rwanda, yemera ko “Hari amakosa yakozwe (n’u Bufaransa) akabyara ingaruka zikomeye.”

Ibaruwa ya EGAM igira iti “Niba wifuza gutangiza ejo heza hataremerewe n’amafuti yakozwe mu gihe cyashize, iki ni igihe cyo kuvuga kuri ayo ‘makosa’. Inzira ya kimuntu izaharurwa no kuvuga ukuri nubwo kugoye ariko kurakenewe.”

Jenoside yakorewe Abatutsi mu Rwanda yabaye u Bufaransa buyobowe na Perezida François Mitterrand. Ubutegetsi bwe nibwo bwateraga inkunga ikomeye ubwa Habyarimana Juvénal ndetse ibimenyetso bitandukanye byagiye byerekana ko iyo Leta yagiye imenyeshwa ibiri gutegurwa mu Rwanda ntibyiteho.

EGAM yagiriye inama Macron iti “Ntabwo Leta yakomeza kuryozwa ‘amakosa’ yakozwe ku butegetsi bwa Mitterrand. Ibi bigomba kumenyekana. Ugomba gushyira imbere ubutabera ugamije ejo hazaza.”

Basabye kandi ko u Bufaransa bwihutisha kugeza mu butabera abakekwaho uruhare muri Jenoside yakorewe Abatutsi bihisheyo dore ko abantu batatu ari bo bamaze kuburanishwa kuva mu 1994.

Macron yanasabwe gushyira hanze inyandiko u Bufaransa bubitse zivuga ku mikoranire yabwo n’u Rwanda mbere no mu gihe cya Jenoside nkuko byari byaremewe na Perezida François Hollande mu 2015.

EGAM yasabye kandi Macron gufasha urubyiruko rw’u Rwanda n’u Bufaransa rugahura rukaganira rugategura ejo heza.

Bati “Amagambo yanyu agomba kunoza umubano w’u Rwanda n’u Bufaransa. Bizaba bibi gutuma urubyiruko rukomeza kwikorera uyu murage mubi.”

Bavuga ko “u Bufaransa bufitanye urubanza n’amateka. Kuvugisha ukuri, gufasha ubutabera no gufasha urubyiruko rw’ibihugu byombi rugahura, niyo nzira ikwiriye kunyurwamo ngo ahahise harangire, inzirakarengane zihabwe icyubahiro, ububabare bw’abarokotse bugabanyuke kandi bifashe abaturage b’u Bufaransa n’u Rwanda gukorera hamwe bagamije ejo heza.”

U Bufaransa bwagiye butanga ubufasha cyane cyane mu bya gisirikare kuri Leta yakoze Jenoside ndetse runashinjwa gutoza Interahamwe zifashishijwe by’umwihariko mu mugambi wo kurimbura abatutsi.

Icyo gihugu kandi cyaharaniye ishyirwaho rya Zone Turquoise mu ishusho yo gutabariramo abari mu bibazo, nyamara abasirikare bamwe bayibayemo bavuze ko umugambi wari uwo gukomeza guha ubufasha Leta yakoraga Jenoside.

Umuyobozi wa EGAM, Benjamin Abtan, ubwo yaganiraga n'itangazamakuru ari mu Rwanda ku wa 8 Mata 2015

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza