Exim Bank yahaye u Rwanda miliyari 68 Frw mu gutera inkunga ubumenyingiro

Yanditswe na Bukuru JC
Kuya 24 Gicurasi 2017 saa 08:45
Yasuwe :
0 0

Leta y’u Rwanda na ‘Exim Bank’ yo mu Buhinde byasinyanye amasezerano y’inkunga y’amadolari miliyoni 81 (abarirwa hafi muri miliyari 68 Frw) yo gutera inkunga kwigisha ubumenyingiro.

Iyi nkunga yasinyiwe mu Buhinde mu nama ngarukamawaka ya Banki Nyafurika itsura Amajyambere (BAD), yitezweho gufasha gahunda za Guverinoma mu kuzamura ireme ry’uburezi mu mashuri y’ubumenyingiro, agasohora abakenewe ku isoko ry’umurimo.

Nk’uko Minisiteri y’Imari n’Igenamigambi yabitangaje iyo nkunga izifashishwa mu kuba ibigo bigezweho bitanga amahugurwa y’ubumenyingiro; Hazanatangwa ibikoresho mu bigo by’ubumenyingiro bishya 10 n’ibigo bine bitanga ubufasha mu guhanga imirimo.

Minisitiri w’Imari n’Igenamigambi, Claver Gatete, yagaragaje ko ubumenyingiro bufite uruhare runini mu gutanga umusaruro mu bukungu, bikagabanya ubushomeri n’ubukene.

Ariko Gatete agaragaza ko mu Rwanda hakiri ikibazo, ati “Urwego rw’iganda ruratera imbere ariko ntibijyanye n’abafite ubumenyi bukenewe. Ni ngombwa gukuraho icyo cyuho kugira ngo ubukungu bukomeze kuzamuka neza.”

Ubugenzuzi buheruka gukorwa bwagaragaje ko hakiri icyuho cy’ubumenyingiro ku bukenewe ku isoko ry’umurimo. Kubw’ibyo Leta y’u Rwanda yihaye intego yo kwita ku mashuri y’ubumenyingiro mu cyerecyezo 2020 no muri EDPRS2. Byongeye kandi leta yihaye intego yo guhanga imirimo 200,000 ku mwaka itari iy’ubuhinzi.

Uko inganda zitera imbere mu Rwanda zihura n'imbogamizi zo kutabona abafite ubumenyi zikeneye

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza