Fireman yahuriye na Safi na Jay C mu ndirimbo igaragaramo ubuzima bw’i Iwawa

Yanditswe na Uwiduhaye Theos
Kuya 28 Gicurasi 2019 saa 09:19
Yasuwe :
0 0

Fireman yahurije hamwe imbaraga na Jay C na Safi Madiba mu ndirimbo bise ‘Ntarirarenga’ yumvikanisha ukuntu yahindutse ikanagaramo ubuzima abayemo i Iwawa.

Iyi ndirimbo yagiye hanze ku mugoroba wo kuri uyu wa Mbere, amashusho yayo yafatiwe i Iwawa aho Fireman ari kugororerwa guhera muri Nzeri umwaka ushize. Amajwi yayo yakozwe na Trackslayer amashusho afatwa na Bob Chris Raheem.

Mu gitero cya Fireman ari nacyo gitangira, aza ibibi byo kunywa ibiyobyabwenge, n’ingaruka mbi zabyo.

Ati “Iby’ubuzima iyi si itunyuzamo, urebye usanga biva mu myanzuro twahisemo, njye nziko nta wakwiyaturiraho umuvumo gusa amahitamo yawe niyo agena uko ubaho, nibyo urubyiruko rushukika vuba ni n’uko biza wowe uba wumva urya ubuzima ubona basumba ukajyaho ugatumagura kakubayeho ubwo bakubwira ukinangira.”

Yungamo ati “Umva kuko nziko ubikora utabikunze, wabuze uko ugira byagushyize mu bwigunge […] subiza amaso inyuma wiyibutse, icyizere watakaje, byinshi uzi wahombye, wari ushoboye ariko ntiwari ushobotse gusa nta rirarenga wanagakosora. Banza mbere wowe wibohore uzibukire icyo gisebo cyangwa ucyiyambure, ejo hawe heza hari mu biganza byawe hera none ugire ubuzima bufite intego.”

Mu nyikirizo iririmbwa na Safi Madiba avuga ko izuba ritararenga, akishyira mu mwanya w’umuntu wanywaga ibiyobyabwenge yemeza ko igihe amaze amaze agororwa cyamubereye ishuri.

Muri Nzeri umwaka ushize, Uwimana Francis [Fireman] yagiye kugororerwa mu kigo ngororamuco kizwi nka Iwawa, nyuma y’iminsi afatiwe mu kunywa ibiyobyabwenge.

Icyo gihe, Umuyobozi Mukuru w’Ikigo cy’Igihugu gishinzwe Igororamuco,NRS, Bosenibamwe Aimé yabwiye IGIHE ko uyu musore yagiye kugororwa kubera gukoresha ikiyobyabwenge kizwi nka Heroine cyangwa Mugo.

IGIHE ifite amakuru ko ashobora kuzava i Iwawa mu cyiciro kizasoza amasomo muri Kamena, kuko ari mu bitwara neza muri iki kigo akagaragaza kuba yarahindutse mu buryo bukomeye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza