Gakenke: Midimar yasabye abaturage gukura isomo ku biza byabagwiririye muri Gicurasi

Yanditswe na Kanamugire Emmanuel
Kuya 22 Ugushyingo 2016 saa 10:01
Yasuwe : XX
0

Mu ijoro ryo ku wa 7 rishyira uwa 8 Gicurasi 2016, humvikanye mu gihugu inkuru y’incamugongo yavugaga ko abaturage bagera kuri 34 bo mu karere ka Gakenke bahitanwe n’inkangu yatewe n’imvura yaguye ijoro ryose.

Ibi byatumye Leta ibabazwa n’ibyari bibaye ariko inafata mu mugongo abari basigaye ihera ko itumaho n’imiryango ishingiye ku Muryango w’Abibumbye bakora ibyashobokaga byose kugira ngo basubize agahenge abari basigaye.

Ibiraro byari byasenyutse byarubatswe, abaturage bari basenyewe n’ibiza barubakirwa ndetse bahabwa amazu akomeye, abari batuye mu manegeka barahakurwa bahabwa ubufasha, abari basizwe iheruheru n’imvura babuze ikibatunga bahabwa ibyo kurya, ndetse ibikorwa byo gusana biracyakomeza.

Minisitiri ufite mu nshingano gukumira Ibiza Seraphine Mukantabana yashimiye abaturage uburyo bitwaye muri ibyo bibazo, ariko abasaba ko byababera isomo bakarushaho gukora ibyo basabwa kugira ngo bakumire ibiza hakiri kare.

Yagize ati “ Icyo nashishikariza abaturage ni uko bashishikariza bagenzi babo bagituye hejuru y’imisozi ko bahava , ntabwo byaba byiza tugarutse hano tugaruwe n’uko hari undi muntu wapfuye, abantu 34 bahasize ubuzima bagakwiriye kubera buri wese inyigisho, buri wese akwiye kubizirikana, ibyabaye ku bandi nawe byakubaho, abari mu manegeka nabasaba kujya mu midugugu kugira ngo bahabwe ibikorwa by’iterambere Leta igenera abandi.”

Kuri uyu wa 22 Ugushyingo 2016, Minisiteri ishinzwe gukumira ibiza no gucyura impunzi mu Rwanda (MIDIMAR), ifatanyije n’imiryango ishingiye ku Muryango w’Abibumbye irimo Umuryango Mpuzamahanga wita ku bikorwa by’abaturage UNFPA, Ishami ry’Umuryango w’Abibumbye ryita ku buhinzi n’ibiribwa, FAO, Iryita ku mpunzi UNHCR, Iryita ku biribwa PAM, n’indi bazindukiye mu karere ka Gakenke basura aho ibikorwa by’ubutabazi bigeze.

Umuyobozi ushinzwe guhuza ibikorwa bya Loni mu Rwanda, Lamin Mamadou Manneh, yashimiye abaturage ba Gakenke uburyo bakoresheje imfashanyo bahawe nyuma y’ibiza byari bimaze kubamaraho utwabo avuga ko biteguye gukomeza gufasha abaturage mu guhangana n’ibiza.

Ati “ Umuryango w’Abibumbye witeguye gukomeza gufatanya na Leta y’u Rwanda guha ubufasha abaturage bahuye n’ibiza, ndetse tuzakomeza gukora ibishoboka kugira ngo dusoze imirimo yatangiye.

Imvura yahitanye ubuzima bw’abaturage ba Gakenke, yanibasiye uturere twa Muhanga na Ngororero ihitana ubuzima bw’abantu 54, abagera kuri 38 barakomereka, hegitari 3500 z’ubutaka bwariho ibikorwa by’ubuhinzi zirangirika inzu 2,317 zirasenyuka zisiga abantu 13500 batagira aho baba.

Nyuma y’ibyo biza amashami ashingiye ku Muryango w’Abibumbye yakusanyije asaga 4.7 z’Amadolari yari agamije kubaka ibiraro 18 byasenyutse, inzu zisaga 300, gutanga imbuto y’ibihingwa, gusana imihanda n’ibindi.

Abayobozi b'Imiryango ishamikiye kuri Loni basobanuriwe aho ibikorwa byo kubakira abagizweho ingaruka n'ibiza bigeze
Minisitiri Mukantabana ari kumwe na Guverineri w'Intara y'Amajyaruguru
Minisitiri Mukantabana yasabye Abanyagakenke gukura isomo ku biza bahuye na byo
Umuyobozi uhagarariye ibikorwa bya Loni mu Rwanda, Lamin Manneh, aganira n'abaturage
Ikiraro cyubatswe kuri ubu kirakoreshwa
Kubaka ibiraro byasenyutse birakomeje
Zimwe mu nzu ziri kubakirwa abahuye n'ibiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza