Gasabo: Abanyarwanda baba mu Bushinwa bishyuriye mituweli abaturage batishoboye 400

Yanditswe na Thamimu Hakizimana
Kuya 16 Gashyantare 2017 saa 11:40
Yasuwe :
0 0

Abanyarwanda baba mu Mujyi wa Guangzhou mu Bushinwa bakusanyije inkunga bishyurira mituweli abaturage 400 batishoboye bo mu Murenge wa Rutunga , Akarere ka Gasabo.

Iyi nkunga ingana n’amafaranga y’u Rwanda miliyoni 1.2 yashyikirijwe abaturage kuwa 15 Gashyantare 2017, bihurirana na gahunda yo gutangiza ubukangurambaga bwo kwishyura imisanzu ya mituweli muri Gasabo y’umwaka wa 2017/2018.

Ukuriye Abanyarwanda baba mu Bushinwa, Ntwari Aime Alexandre, yabwiye IGIHE ko bishyuriye ubwisungane mu kwivuza abo baturage nyuma yo kumenya ko ko ariho aho batuye hari ikibazo mu gushobora kwiyishurira.

Yagize ati “Twabafashije kugira ngo igihe bazahura n’ibibazo by’uburwayi bazahite bajya kwa muganga aho kurembera mu rugo, gusa ubuyobozi ni bwo bwatubwiye ko twazarihira abaturage bo muri uyu murenge wa Rutunga kuko ari ho hagaragara ikibazo cy’abadafite mituweli.”

Uretse gutanga mitiweli, Ntwari yavuze ko Abanyarwanda baba mu Bushinwa n’abahakorera bafite izindi gahunda zirimo izo kuzubakira abatishoboye, kuremera abarokotse Jenosideyakorewe Abatutsi.

Umubyeyi w’abana barindwi witwa Mukajero Rosalie yashimiye ubufahsa ahawe bwo kutazatuma arembera mu rugo, ati “Ndishimye cyane kuko nahoraga nibaza aho nzakura amafarangaya mituweli y’uyu mwaka nkabiburira igisubizo ku buryo nari naramaze kwiheba ariko kuba aba bagiraneza bamfashije Imana izarusheho kubongerera.”

Umuyobozi w’Akarere ka Gasabo wungirije ushinzwe ubukungu, Raymond Mberabahizi, nawe we yagaragaje ko gufasha abatishobye ari igikorwa cyiza kigaragaza ko Abanyarwanda bashobora kwishakamo ibisubizo bahura nabyo.

Yagize ati “Ni igikorwa kandi cy’urukundo kirimo n’umuco wo gutoza Abanyarwanda kwishakamo ibisubizo, ikindi kandi tukibonamo isomo ritugaragariza ko aho turi hose ntacyatunanira mu kwishakamo ibisubizo byugarije Isi yose.”

Yasobanuye ko hatangijwe ubukangurambaga mu kwishyura imisanzu y’ubwisungane mu kwivuza hakiri kare kugira ngo hatazagira ukererwa kubona mituweli y’umwaka utaha, cyane cyane ko byagiye bigaragara ko hari abajya kuzisaba banashaka guhita bazivurizaho ako kanya.

Abaturage bashyikirijwe amakarita ya mitiweli bishyuriwe
Bamwe mu Banyarwanda baba mu Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza