Gasabo: COPEDU yakoranye n’abaturage umuganda inarihira mituweli imiryango icyenda itishoboye.

Yanditswe na IGIHE
Kuya 3 Ukwakira 2017 saa 07:03
Yasuwe :
0 0

Abakozi ba COPEDU Ltd bifatanyije n’abaturage bo mu Kagari ka Ngara mu Murenge wa Bumbogo mu Karere ka Gasabo mu gikorwa cy’umuganda rusange banarihira ubwisungane mu kwivuza imiryango icyenda itishoboye igizwe n’abantu 33 kugira ngo na yo irusheho kugira ubuzima bwiza.

Nyuma y’umuganda rusange wo kuwa Gatandatu tariki ya 30 Nzeli 2017, abo bakozi ba COPEDU Ltd baganiriye n’abaturage babasobanurira imikorere yabo na serivisi zitandukanye batanga.

Ukuriye ishami ry’ubucuruzi muri COPEDU Ltd, Uwamariya Caritas yabwiye IGIHE, ko bahisemo gukorera umuganda muri aka gace, kugira ngo begere abakiriya babo bahatuye cyane ko iki kigo cy’imari kihafite abakiliya basaga 400 kandi bagenda biyongera.

Yagize ati “ Gukorana umuganda n’abaturage ni umuco wa COPEDU Ltd. Muri uyu muganda usoza ukwezi kwa Nzeli rero, twahisemo aka kagali ka Ngara gasa naho kitaruye umujyi kugirango tubagaragarize ko twiteguye kubegereza servisi zacu kuko tuhafite abakiliya basaga 400 kandi bagenda biyongera. Ibyo rero bikaba byaraduteye imbaraga zo kurushaho kubegera kuko nabo batweretse ko badukunda kandi badukeneye.”

Yakomeje avuga ko bifuza gufungura ishami muri aka gace mu minsi iri mbere kubera ko abahatuye basa naho bari mu bwigunge kubera ko nta kigo cy’imari na kimwe cyibegereye.
Umukecuru w’imyaka irenga 80witwa Mukamutabura Laurencia, we yavuze ko yishimiye uburyo COPEDU yahisemo kumurihira mituweli.

Yagize ati “Sinababeshya ubu nibwo menye iki kigo cy’imari ariko ni ukuri nshimishijwe cyane no kuba banyishyuriye mituweli kuko si nari nzi aho nzayikura kuko ubusanzwe narihiragwa n’abakirisitu b’abagaturika kandi bari batarayinyishyurira.”

Kansange Marie Goretti w’abana icyenda we yagize ati “Mu buzima byari bigoye kuko nari mfite ikibazo cya mituweli kubera ko kubona iy’abantu 11 b’umuryango nanjye ndimo n’umugabo byari biruhije ariko ndashima COPEDU Ltd k’ubwitange yagize bwo kuza gufasha abantu bababaye.”

Yakomeje avuga ko yashimye serivisi zitandukanye za COPEDU Ltd ndetse yavuze ko nabona ubushobozi ari yo azahita akorana na yo kugira ngo arusheho kwiteza imbere mu buryo bwihuse kuko yumvise yorohereza abagore.

Muri uyu muganda abatangabuhamya batandukanye bakorana na COPEDU Ltd bagaragaje ibyiza byayo birimo uburyo ibabikira amafaranga yabo neza ikanabaha inguzanyo mu buryo bwihuse kandi bunoze. Bivugiye ko muri iki kigo hatarangwa ruswa. Ibi byatumye abaturage 29 bafata umwanzuro wo gufungura konti zabo abandi nabo batari biteguye bariyandikishije kugira ngo bagaragaze ko bifuza kuba abakiliya ba COPEDU Ltd.

COPEDU LTD ikorera mu mpande zose z’umujyi wa Kigali aho ifite amashami icyenda, ikaba yasezeranije abaturage kuzana ishami muri aka gace. Inakorera mu Ntara y’Iburasizaba aho ifite ishami i Rwamagana kandi iranateganya kwegereza abanyarwanda n’abaturwanda serivisi zayo ifungura amashami mu bindi bice by’igihugu ndetse inatangiza serivisi y’aba ‘Agent’.

Abakozi ba Copedu Ltd mu muganda rusange hamwe n'abaturage
Abaturage bari mu muganda basobanuriwe ibikorwa bya Copedu
Imiryango icyenda itishoboye yaragobotswe ihabwa ubwisungane mu kwivuza
Ibyishimo byari byose ku bahawe ubwisungane mu kwivuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza