Gasabo: Imibiri isaga 150 y’abazize Jenoside iheruka gutahurwa, yashyinguwe mu cyubahiro

Yanditswe na Evariste Nsengimana
Kuya 16 Mata 2018 saa 07:55
Yasuwe :
0 0

Imibiri y’abatutsi 157 biciwe mu Murenge wa Rusororo, Akarere ka Gasabo, yashyinguwe mu cyubahiro mu Rwibutso rwa Ruhanga kuri uyu wa 15 Mata 2018, umunsi hibukirwaho abatutsi barenga ibihumbi 15 biciwe urw’agashinyaguro mu rusengero rw’Abangilikani rwari ruherereye kuri uwo musozi.

Mu Cyumweru cya Kabiri cy’uku kwezi nibwo muri uwo murenge, hatahuwe icyobo cyajugunywemo imibiri y’Abatutsi bishwe muri Jenoside, batigeze baboneka mu myaka 24 ishize.

Mu muhango wo kuyishyingura mu cyubahiro no kwibuka abatutsi barenga ibihumbi 15 bahiciwe ku wa 15 Mata 1994, umwe mu bahagarariye imiryango y’ababuze ababo bari muri iyo yashyinguwe, Mudaheranwa Gérald, yavuze kuba ishyinguwe mu cyubahiro ari igikorwa kibubaka kikanabongerera imbaraga.

Visi Perezida wa Ibuka, Egide Nkuranga, yashimiye abantu bagize ubutwari bwo guhisha abahigwagwa, aboneraho n’umwanya wo kwihanganisha imiryango yarokokeye kuri uwo musozi n’abahaburiye ababo.

Si iyo mibiri gusa yatahuwe, Akarere kavuga ko hari n’indi 52 iheruka gutahurwa irimo 40 yatahuwe mu Murenge wa Gatsata na 12 yatahuwe mu wa Bumbogo.

Umuyobozi wungirije w’Akarere ka Gasabo ushinzwe iterambere ry’ubukungu, Mberabahizi Raymond, yavuze ko kuba hari abantu bagifite imitima yinangiye, ntibatange amakuru ngo ishyingurwe mu cyubahiro ari ikibazo, asaba ko abafite ayo makuru bayatanga.

Yagize ati “Ikibabaje kurusha, abo bantu bari bajugunywe mu rugo rw’umuntu, uwo muntu arahari, ntiyahigwaga, kugira ngo tuyibone, ntabwo mu myaka 24 ishize yigeze agira ubutwari na buke bwo kuvuga ati aha hantu hashyinguye imibiri, reka tugende tuyerekane. Amakuru yatanzwe n’umupangayi.”

“Ukibaza, nyuma y’imyaka 24, dufite Leta igira imbabazi, ikazigirira n’abicanyi ikababarira, ikazigirira ingabo zarasanaga, zikaza zigasangirira ku meza […] ukibaza, ni iki kibuza umuntu kuvaga ati aha hantu hari imibiri y’abantu bahajugunywe nimuyishyingure. Nicyo cyonyine umuntu ashobora kuba yakorera uwacitse ku icumu.”

Minisitiri muri Primature ushinzwe Imirimo y’Inama y’Abaminisitiri, Kayisire Marie Solange, yihanganishije abarokokeye mu Murenge wa Rusororo n’abahaburiye ababo muri Jenoside yakorewe abatutsi anashimira abagiye batanga amakuru ku hajugunywe imibiri, ikabasha gukurwayo igashyingurwa mu cyubahiro.

Yakomeje asaba abanyarwanda gutoza abana indangagaciro zo kwanga umugayo.

Yagize ati “Abashaka kudusubiza inyuma tubahakanire, ntitubemerere. Dusabe ababyeyi by’umwihariko gutoza abana guhora barangwa n’indangagaciro zo kwanga umugayo [...] Mureke duharanire kubigisha kwanga ikibi kugira ngo n’ibihe bibaye bibi bazakomeze inyingisho bahawe n’ababyeyi.”

Urwibutso rwa Jenoside rwa Ruhanga rwahoze ari Urusengero rw’Abangilikani, rwiciwemo abantu basaga ibihumbi 15 ku wa 15 Mata 1994. Rusanzwe rushyinguyemo imibiri y’inzirakarengane za Jenoside yakorewe abatutsi 36.549, yiyongeraho 157 yashyinguwemo kuri iki Cyumweru.

Mu buhamya butangwa na bake mu baharokokeye barimo Uwizeyimana Claudine, bavuga ko muri Jenoside babanje kwirwanaho bagahangana n’Interahamwe zabateraga ziturutse mu duce tubakikije turimo Rwamashyongoshyo, Muyumbu, Gikomero n’ahandi ariko bikananirana.

Ngo Interahamwe zabonye binaniranye zitabaza abasirikare, nibwo hoherejwe abarindaga Perezida, babirohamo barabarasa, babatera gerenade hanyuma babatwikisha lisansi muri urwo rusengero ndetse ko hanakoreshejwe indege ngo batsembe abarimo.

Abiciwe i Ruhanga bashyinguwe bwa mbere ku wa 11 Gicurasi 1995 nyuma yo gukurwa mu cyobo, imashini (caterpillar) yari yabatabyemo bamaze kwicwa urw’agashinyaguro.

Abantu batandukanye bari bitabiriye umuhango wo gushyingura iyo mibiri
Abayobozi batandukanye bari mu rwibutso aho yashyinguwe mu cyubahiro
Imibiri y'abatutsi 157 biciwe mu Murenge wa Rusororo, Akarere ka Gasabo, yashyinguwe mu cyubahiro mu Rwibutso rwa Ruhanga kuri uyu wa 15 Mata 2018
Minisitiri muri Primature ushinzwe Imirimo y’Inama y’Abaminisitiri, Kayisire Marie Solange, yihanganishije abarokokeye mu Murenge wa Rusororo n’ababuriye ababo muri Jenoside yakorewe abatutsi
Senateri Tito Rutaremara yari yitabiriye uyu muhango, anatanga ikiganiro ku budasa bw'u Rwanda
Umuyobozi wungirije w’Akarere ka Gasabo ushinzwe iterambere ry’ubukungu, Mberabahizi Raymond, ageza ijambo ku bitabiriye iki gikorwa
Umwe mu bahagarariye imiryango y'ababuze ababo bari muri iyo yashyinguwe, Mudaheranwa Gérald, yavuze kuba ishyinguwe mu cyubahiro ari igikorwa kibubaka kikanabongerera imbaraga
Umwe mu baharokokeye, Uwizeyimana Claudine watanze ubuhamya
Urwibutso rwa Ruhanga rwahoze ari Urusengero rw'Abangilkani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza