Gasabo:Umusore yemeye ko yahaye ikiraka cy’amafaranga ibihumbi 50 abishe se

Yanditswe na Kanamugire Emmanuel
Kuya 23 Ugushyingo 2016 saa 08:52
Yasuwe :
0 0

Tuyishimire Fabien w’imyaka 24 y’amavuko yemereye Urukiko Rwisumbuye rwa Gasabo ko yagize uruhare mu rupfu rwa Se, Mbyariyehe François wiciwe mu Karere ka Bugesera, aho yemereye abagabo batatu ibihumbi 50 by’amanyarwanda ngo bamwice.

Hari mu rubanza ruregwamo abantu batanu barimo Tuyishimire Fabien na nyina, rwabaye ku wa Gatatu tariki ya 23 Ugushyingo 2016, aho Tuyishime yemeye uruhare mu rupfu rwa se nk’uko RBA yabitangaje.

Yemeye icyaha cyo kugambanira se ngo yicwe abitewe n’amakimbirane bari bafitanye yatumye se amufungisha inshuro zirenze eshanu, anasaba imbabazi.

Ashinja kandi abagabo batatu bafunganye ko yabahaye ikiraka cyo kwica se, bagafatanya no kujya kujugunya umurambo we mu Kagera aho waje kubonwa nyuma y’iminsi itatu, nubwo abo bagabo babihakana.

Izabiriza Alphonsine wabyaranye na Mbyariyehe(wishwe) abana batandatu, ariko bakaba batari bakibana, yahakanye kugira uruhare mu rupfu rw’umugabo we.

Ubushinjacyaha bumuhamya kugira uruhare mu rupfu rwa Mbyariyehe bari bamaraze igihe bafitanye amakimbirane, byatumye baburana mu rukiko rw’ibanze rwa Nyamata, aho uyu mugore yari yarakatiwe igifungo cy’amezi atanu ahamijwe icyaha cyo guhoza umugabo we ku nkeke.

Ubushinjacyaha bwasabiye ababuranyi igifungo cya burundu, ariko umugore asabirwa n’umwunganizi we ko hazasesengurwa ubuhamya bw’umuhungu we uniyemerera icyaha akavuga n’abo bagikoranye, dore ko ngo atavugamo nyina.

Abaregwa barasabye kurekurwa uretse Tuyishime, usaba kugabanyirizwa igihano ngo kuko yafashije ubutabera yemera icyaha.

Urukiko rwisumbuye rwa Gasabo rwanzuye kuzasomera urwo rubanza ahabereye icyaha mu Kagari ka Kibungo I, mu Murenge wa Ntarama ho mu Karere ka Bugesera tariki ya 22 Ukuboza 2016.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244