Gatsibo:Umuturage yatawe muri yombi agerageza guha ruswa umupolisi

Yanditswe na IGIHE
Kuya 22 Ukwakira 2017 saa 03:35
Yasuwe :
0 0

Kuri iki Cyumweru, tariki ya 22 Ukwakira 2017, Polisi y’Igihugu ikorera mu Karere ka Gatsibo yataye muri yombi umugabo wageragezaga guha ruswa umupolisi kugira ngo arekure moto ye yari imaze iminsi yarafashwe.

Ahagana saa tanu nibwo umugabo w’imyaka 50, utuye mu Murenge wa Rugarama, yaguwe gitumo agerageza guha ruswa ngo amuhe moto ye yafashwe yikoreye ibiyobwabwenge byo mu bwoko bwa zebra.

Umuvugizi wa Polisi mu Ntara y’Iburasirazuba, IP Jean de Dieu Kayihura, yabwiye IGIHE ko uyu mugabo yafashwe agerageza gutanga amafaranga ibihumbi 100, ashaka ko asubizwa moto ye yafashwe ku wa 20 Ukwakira 2017.

Yagize ati “Uyu munsi ahagana saa tanu umugabo yashatse guha Komanda wa sitasiyo ya Polisi ya Rugarama ruswa y’ibihumbi ijana ngo amurekurire moto ye yafashwe yikoreye ibiyobyabwenge byo mu bwoko bwa Zebra.”

Nyir’ukugerageza gutanga ruswa ngo afungiye kuri Sitasiyo ya Polisi ya Rugarama mu gihe iperereza rigikomeje.

Aramutse ahamwe n’icyaha yahanishwa igifungo kuva ku myaka ibiri kugeza kuri itanu n’ihazabu ikubye inshuro kuva kuri ebyiri kugeza ku 10 z’indonke yatanze nk’uko biteganywa mu ngingo ya 640 y’igitabo cy’amategeko ahana ibyaha mu Rwanda.

Ubucuruzi bw’ibiyobyabwenge mu Ntara y’Iburasirazuba bumaze gufata indi ntera kuko ku ya 18 Ukwakira 2017, Polisi y’u Rwanda ikorera mu Karere ka Nyagatare yishe irashe Udahemuka Jean de Dieu, ukomoka mu Murenge wa Rwimiyaga nyuma yo kumufata ahetse ibiyobyabwenge kuri moto, yasabwa guhagarara akabyanga ahubwo agashaka kugonga umupolisi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza