Gatsibo:Ku munsi w’umukobwa, ababyeyi batunzwe agatoki ko bateshuka ku nshingano

Yanditswe na Kanamugire Emmanuel
Kuya 12 Ukwakira 2016 saa 09:29
Yasuwe :
0 0

Guhugira mu mirimo yabo ntibibuke kuganiriza abana babo ni bimwe mu byo ababyeyi bashinjwa n’abakobwa biganjemo ababyariye iwabo.

“Nabyariye iwacu mfite imyaka 17, nta makuru nari mfite ku buzima bw’imyororokere kubera ko ababyeyi banjye babyukaga bajya muri ‘shuguri’ ntibanganirize. Byangizeho ingaruka zikomeye mu buzima kubera ko inzozi zanjye zahise zirangirira aho.”

Ibi ni ibivugwa n’umwe mu bakobwa bo mu Murenge wa Kiziguro mu Karere ka Gatsibo, ushinja ababyeyi be kwirengagiza inshingano zabo.

Yagize ati “Nyuma yo kujya mu mihango bwa mbere umusore duturanye ufite butike yaranshutse antera inda. Iyo ababyeyi banjye baza kuba baranganirije ku bijyanye n’imyororokere simba naraguye mu mutego. Kwiga kwanjye byahise bihagarara, aho nyuze hose baravuga ngo dore wa mukobwa wabyariye iwabo.”

Tariki ya 11 Ukwakira 2016, ubwo hizihizwaga umunsi w’umukobwa, abakobwa bari hagati y’imyaka 15 na 21 bo mu Mirenge ya Kiziguro, Ndatemwa na Murambi babyariye iwabo, icyo bahurizaho ni uko batahawe impanuro n’ababyeyi babo hakiri kare.

Bamwe mu babyeyi bemera ko hari ababura umwanya wo guha impanuro abana babo, ariko kandi ngo hari n’abana bananira ababyeyi.

Nyirindekwe John, ni umwe mu babyeyi wagize ati “Ababyeyi tubyuka tujya mu murima no mu tundi turimo kugira ngo dushake icyatunga abana. Mu bana bacu rero cyane cyane abakobwa hari abatunanira bakigira ibirumbo.”

Umuyobozi w’Akarere ka Gatsibo, Gasana Richard, ntiyemeranya n’ababyeyi bavuga ko abana babananira.

Yagize ati “Ntabwo wavuga ngo umwana yarananiranye haba harananiranye ababyeyi batamuhaye uburere, ntabwo umwana aba yarananiranye ahubwo aba atarahawe uburere buhagije. Umubyeyi akwiye gukora ibishoboka agashaka ibitunga abana be. Nta mubyeyi ukwiye kuvuga ngo ndi umukene sinzarera abana banjye, cira abana incuro ariko ubahe ibyo bagenewe, ubarinde kwifuza.”

Marie Gladys Archange, Umuyobozi w’ishami ry’u Rwanda rya Plan International, yavuze ko umwana w’umukobwa ari imbaraga z’umuryango z’ejo hazaza, bityo ko akwiye kwitabwaho agahabwa uburere n’uburezi bukwiye.

Yagize ati “Gufasha umwana w’umukobwa kubaka ubushobozi ni ukubaka igihugu. Ntituzahwema guteza imbere uburere bw’umwana w’umukobwa mu Rwanda.”

Plan International Rwanda, ikaba yarafashije abakobwa 15 bo mu Karere ka Gatsibo babyariye iwabo, ibishyurira amafaranga yo kwiga kudoda, inabagurira imashini n’ibikoresho by’isuku bifite agaciro ka 5.300.000 z’amafaranga y’u Rwanda.

Abakobwa babyariye iwabo bahawe imashini n'ibikoresho by'isuku
Urugendo rwitabiriwe n'abantu batandukanye
Ibirori byo kwizihiza umunsi w'umukobwa byabimburiwe n'urugendo
Marie Gladys Archange uyobora Plan International, ishami ry'u Rwanda
Abanyeshuri biga mu mashuri yisumbuye bitabiriye ibirori byo kwizihiza umunsi w'umukobwa
Mu bitabiriye urugendo harimo n'Umuyobozi wa Plan International Rwanda, Marie Gladys Archange (imbere wambaye ijipo)
Abayobozi batandukanye bari bitabiriye uyu muhango

emma@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza