Gatsibo: Umubyeyi n’abana bane bibera mu nzu yasenyutse (Video)

Yanditswe na Thamimu Hakizimana
Kuya 22 Nzeri 2017 saa 11:59
Yasuwe :
0 0

Nubwo hatakibaho inzu za nyakatsi zitaheshaga ishema Umunyarwanda, Muhawenimana Beatrice w’imyaka 36 n’abana be bane bo bibera mu irutwa na nyakatsi mu Kagari ka Rumuri, Umurenge wa Muhura mu Karere ka Gatsibo.

Uyu mubyeyi w’abana bane bose batarengeje imyaka 12 barimo n’umuto w’amezi ane atunzwe no guca inshuro, yibera mu nzu yasenyutse.

Muhawenimana yabwiye IGIHE ko ahangayikishijwe n’ubuzima bw’abana be bitewe n’ubuzima babayemo, afite impungenge ko bakwicwa n’umusonga kuko imbeho ibasanga mu nzu.

Uretse kutagira aho abatuye, uyu mubyeyi avuga ko we n’abana be barya rimwe ku munsi ndetse hari n’igihe baburara bitewe n’uko nta bushobozi bwo kubatunga, dore ko nta mugabo agira.

Yagize ati “Nari mfite umugao tubyarana abana babiri aranta noneho nshugurika undi tubyarana abandi babiri nzi ko byibuze azamfasha no kurera n’abandi nyuma nawe aza kwigendera ndamubura ku buryo ubu mbayeho nabi kuko ninjye ujya guca inshuro mpingira nk’abantu kugira ngo mbashakire ikibatunga.”

Avuga ko ku munsi iyo yaciye inshuro atahana amafaranga 600 akaba ariyo akuramo ibimutunga we n’urubyaro rwe.

Muhawenimana akomeza avuga ko afite impungenge z’uko inzu abamo we n’abana be izabagwira bitewe n’ukoyasenyutse akabura ubushobozi bwo kuyubaka ndetse ubuyobozi bukaba bwaramubwiye ko ariwe ukwiye kuyiyubakira.

Yagize ati “Mbayeho nabi kandi nawe urabibona kuko ndyama mfite ubwoba ko iyi nzu iri butugwire cyane cyane nko muri ibi bihe by’imvura kubera ko nawe urabona ko idakinze.”

Byongeye, Muhawenimana avuga ko atishimira kuba akennye ariko akaba ari mu cyiciro cya kabiri cy’Ubudehe.

Ati “Banshyize mu cya kabiri kandi nibo bampaye ikibanza n’amabati yo kubaka iyi nzu ariko mbabazwa n’uburyo yasenyutse bakanga kumfasha kugira ngo nyisane none abana banjye bagiye kuzicwa n’umusonga kubera imbeho.”

Muhawenimana avuga ko akennye ku buryo atabasha no kubona ibikoresho by’ishuri by’abana be babiri biga mu mashuri abanza.

Yemeza ko ikibazo cyo kuba inzu yaramuguyeho akaba atabasha kuyisana yakigejeje ku Kagari no ku Murenge, bakaba bakizi nubwo ntacyo barabikoraho.

Umunyamabanga Nshingwabikorwa w’Umurenge wa Muhura, Mushumba John, we yavuze ko ikibazo cy’uyu mubyeyi atari akizi ariko avuga ko bagiye kugikurikirana kugira ngo barebe uko bamufasha.

Yagize ati “Icyo kibazo ntitukizi kuko tutamwakiriye wenda ariko tugiye kugikurikirana kugira ngo tumufashe kuko abantu nkabo hari n’igihe tubaha ubufasha bwo kububakira mu muganda rusange, naho ku bijyanye na Girinka nawe urumva ko umuntu nk’uwo utamuha inka kandi nta bwatsi bwo kuyiha afite.”

Muhawenimana w’abana bane utunzwe no guca inshuro, yibera mu nzu yasenyutse
Mu rugo kwa Muhawenimana, inzu ye ayikingisha imigozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza