Gen Kabarebe yabwiye abaturage ko nta wagira umutekano ashonje

Yanditswe na Mukwaya olivier
Kuya 20 Mata 2018 saa 11:07
Yasuwe :
0 0

Minisitiri w’Ingabo, Gen James Kabarebe, yabwiye abaturage b’Akarere ka Nyabihu ko umutekano wose bagira batabashije kwihaza mu biribwa ngo biteze imbere ntacyo wabamarira, kuko umutekano urenze gukumira umwanzi gusa.

Ubu butumwa yabutanze kuri uyu wa Gatanu, ubwo hatangizwaga igikorwa cy’ ‘Ingabo z’Igihugu cyo guteza imbere abaturage’; cyibanze ku gutera ibirayi mu mirima y’abaturage ku buso bungana na hegitari umunani z’ubutaka bwahujwe, bukozweho amaterasi y’indinganire, hanaterwa ibirayi kuri hegitari 20 zateganyijwe gutuburirwaho imbuto mu Murenge wa Muringa muri Nyabihu.

Umuyobozi wa Koperative Coibamu ari nabo bagenerwabikorwa kuko imirimo yose izakorerwa mu mirima yabo, yavuze ko ari ibyishimo kubera ubufatanye bw’abasirikare, aho biteguye inyungu ya miliyoni 150 izaboneka ku bufatanye n’ingabo.

Yagize ati "Dufite ibyishimo byinshi kuba leta itaratwibagiwe ihora idutekereza ku mushinga w’amaterasi y’indinganire ubutaka bukaba bubungabunzwe neza, umusaruro ukaba wariyongereye ku buryo bushimishije.”

“Uyu munsi dushimishijwe n’uko agace kari gasigaye mu Murenge wa Muringa, abaturage bagize amahirwe adasanzwe uyu munsi tukaba duhawe imbuto y’ibirayi. Turashimira abasirikare baje kudufasha, turateganya kubona toni 500 zihwanye n’amafaranga angana na miliyoni 150.’’

Aha niho Minisitiri w’Ingabo z’Igihugu, Gen James Kabarebe, yashimangiye ko Ingabo ndetse n’igihugu muri rusange zishishikajwe n’imibereho myiza n’iterambere ry’abaturage hagamijwe kwihaza mu biribwa.

Yagize ati “Ingabo z’u Rwanda mu byo zishinzwe harimo iterambere ry’abaturage no guteza igihugu imbere, zikaba zinashinzwe umutekano w’abaturage. Umuturage ushonje nta mutekano aba afite, umuturage utabasha kwishyura mituweli nta mutekano aba afite, umuturage utabasha kwivuza nta mutekano aba afite, umuturage udafite ifaranga nta mutekano aba afite, umutekano urenze gukumira umwanzi.”

Yakomeje agira ati “Niyo mpamvu twaje gufatanya n’abaturage na Minisiteri y’Ubuhinzi, twaje kubafasha ngo iyo koperative ibone ibiryo basagurire amasoko, barihire abanyeshuri babo, bivuze ngo bakore n’ibindi bibateza imbere. Uwo ni wo mutekano mwiza, niwo mutekano usesuye, ni nayo mahoro mu gihugu, ni nabyo Ingabo z’Igihugu zishaka kugira ngo abaturage babashe kwiteza imbere.”

Umunyamabanga wa Leta muri Minisiteri y’Ubuhinzi n’Ubworozi, Nsengiyumva Fulgence, yavuze ko muri iki gihe cy’amezi atatu hari ibikorwa bitandukanye bizakorwa birimo gutera imbuto y’ubwatsi bw’amatungo, kubaka ibikumba by’inka no gukomeza ibikorwa by’ihinga aho yasabye abaturage kubigira ibyabo baharanira kwikura mu bukene.

Igikorwa cyakorewe mu Karere ka Nyabihu kiri mu mujyo w’ibitegurwa na RDF bigamije guteza imbere abenegihugu, kuri iyi nshuro byiswe ‘Ingabo z’u Rwanda mu Iterambere ry’abaturage’, bizasozwa ku wa 30 Nyakanga 2018.

Muri uyu mwaka biteganyijwe ko abaturage ibihumbi 113 bo hirya no hino mu gihugu bazavurwa indwara zitandukanye zirimo iz’ubuhumekero, amenyo n’iz’amagufa. Hazubakwa inzu 1 961 z’abatishoboye, ibyumba by’amashuri 121 n’ubwiherero 108 bw’ayo mashuri. Hazanahingwa kandi hegitari 4,511.

Inkuru bifitanye isano: RDF igiye kuvura abaturage ibihumbi 113, inubakire abatishoboye

Minisitiri w’Ingabo z’Igihugu, Gen James Kabarebe, yashimangiye ko Ingabo zishishikajwe n’imibereho myiza n’iterambere ry'abaturage hagamijwe kwihaza mu biribwa
Ingabo z'u Rwanda zafatanyije n'abaturage b'i Nyabihu gutera ibirayi mu mirima iri ku buso bungana na hegitari umunani z’ubutaka bwahujwe, bukozweho amaterasi y’indinganire, hanaterwa ibirayi kuri hegitari 20 zateganyijwe gutuburirwaho imbuto mu Murenge wa Muringa muri Nyabihu
Gen James Kabarebe yifatanyije n'abaturage b'i Nyabihu gutera ibirayi
Minisitiri w’Ingabo, Gen James Kabarebe, yabwiye abaturage b’i Nyabihu ko umutekano wose bagira batihagije mu biribwa ngo biteze imbere ntacyo wabamarira
Nyuma y'igikorwa cyo guter ibirayi, Minisitiri w'Ingabo, Gen Kabarebe James n'abandi bayobozi bafatanyije n'abaturage gucinya akadiho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza