Gen Muganga yasabye abasirikare 120 basoje amahugurwa gukomeza kuzamura izina rya RDF

Yanditswe na Habimana James
Kuya 1 Kamena 2019 saa 04:49
Yasuwe :
0 0

Abasirikare 120 bagizwe naba Sergeant, Caporal na Private, basoje amasomo ya gisirikare bari bamazemo amezi atatu mu kigo cya gisirikare cya Kami.

Aba basirikare ni abo muri diviziyo ya mbere y’Ingabo z’u Rwanda zirwanira ku butaka, bakaba barimo ab’igitsina gore 14.

Ubwo yasozaga aha masomo, Umuyobozi w’Ingabo mu Mujyi wa Kigali no mu Ntara y’Iburasirazuba, Gen Maj Mubarak Muganga, yabashimiye kuba basoje neza aya mahugurwa yari amaze ibyumweru 12, avuga ko baranzwe n’ikinyabupfura no gukorana imbaraga.

Yagize ati “Nk’umuyobozi wa diviziyo ya mbere navuga ko ubumenyi muvanye hano buzabafasha kuba abayobozi beza no kuba intangarugero kuri bagenzi banyu.”

Yakomeje agira ati “Iyo abayobozi b’amashami yacu yo hasi ari beza, bisobanuye ko n’inshingano z’abo ku rwego rwo hejuru zikorwa kandi zigasozwa neza.”

Gen Maj Muganga yabasabye kandi gukoresha no gusangiza ubumenyi bahavanye abandi bakorana.

Yabwiye aba basirikare ko izina RDF ryubatswe n’abayobozi babo, bityo ko ari inshingano yabo yo gukomeza kugumishaho iryo zina ariko no kurizamura ku buryo rigera ku rundi rwego.

Yagize ati “Izina ry’ingabo zacu rizwi ku ruhando mpuzamahanga, gusa ntabwo tugomba kwicara ahubwo tugomba gukomeza kugera ku rwego rwa kinyamwuga no gukora neza bikagerwaho.”

Iyi myitozo iba gatatu mu mwaka, intego iba ari uguhabwa ubumenyi mu kurwana, ubumenyi mu miyoborere, kurasa n’ibindi.

Mu myitozo bakoze muri ibi byumweru 12 harimo no kumenya kurwana
Bahawe kandi amasomo arimo ayo kurasa
Abasore n'inkumi 120 nibo basoje aya mahugurwa y'amezi atatu
Aba basirikare bari bamaze amezi atatu mu kigo cya Kami bahabwa amahugurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza