Gicumbi: Abakobwa babiri batawe muri yombi bakekwaho kwihekura

Yanditswe na Ferdinand Maniraguha
Kuya 19 Ugushyingo 2017 saa 04:38
Yasuwe :
0 0

Abakobwa babiri babaga mu Murenge wa Shangasha, Akarere ka Gicumbi, batawe muri yombi bakekwaho kwihekura.

Abo bakobwa, umwe w’imyaka 20 n’undi w’imyaka 23, batawe muri yombi na Polisi kuri uyu wa Gatandatu nyuma yo gukekwaho kwica abo bari batwite.

Umunyamabanga Nshingwabikorwa w’Umurenge wa Shangasha, Rusizana Joseph, yabwiye IGIHE ko uwo mukobwa w’imyaka 20 yafashwe nyuma y’amakuru yatanzwe n’abana bari bagiye kwahira ubwatsi bw’amatungo.

Yagize ati “Ni uwo mu murenge wacu wa Shangasha niho avuka ni naho n’ababyeyi be bari, ubwo we tukimara kubona umurambo w’umwana wapfuye nyine abantu bahise batangira gushakisha, biza kugaragara ko uwo mukobwa koko yari atwite ariko ubu akaba nta nda yari agifite. Ni abana babonye umwana ahantu bagiye kwahira ubwatsi bw’amatungo noneho bamusanga mu ishyamba yapfuye.”

Visi Meya w’Akarere ka Gicumbi ushinzwe imibereho myiza y’abaturage, Benihirwe Charlotte, yabwiye IGIHE ko uwo mwana yabonetse ibisimba byatangiye kumurya.

Uwo mukobwa amaze gutabwa muri yombi yabajijwe niba koko umwana yaramujugunye, ngo arabyemera.

Undi mukobwa w’imyaka 23, Gitifu Rusizana avuga ko yari amaze igihe gito akora mu kabari mu murenge wa Shangasha, ariko akaba akomoka mu Murenge wa Byumba, Akarere ka Gicumbi. Nawe yari amaze iminsi atwite ariko inda iza kubura.

Yagize ati “Nanjye ndamuzi ariko ku giti cyanjye namubonaga afite inda koko. Muri iki cyumweru nibwo natangiye kubona ntawe ukiri aho yakoreraga, hanyuma rero ejo nibwo yaje kugaruka, umuntu arambwira ati ’nimukurikirane murebe wa mukobwa yagarutse kandi nta nda agifite’.Twamujyanye kwa muganga kugira ngo bamusuzume ariko na we arabyiyemerera akavuga ko ngo hari umuntu wamufashije kuyikuramo i Byumba iwabo.”

Rusizana yakomeje agira inama abakobwa batewe inda batateganyije, kutazikuramo cyangwa ngo biyicire abo babyaye.

Yagize ati “Gutwita ni ibintu bisanzwe, yo yamaze gutwita abantu bakwihangana bakazarera uwo mwana. Iyo wamaze gutwita nta kindi umuntu aba agikoze, uba ugomba kumubyara ukamurera. Nta mpamvu yo kujya kwihekura ngo wiyicire uwo wabyaye.”

Abo bakobwa bombi bafungiwe kuri Sitasiyo ya Polisi ya Kaniga mu gihe iperereza rigikomeje.

Ingingo ya 143 mu gitabo cy’amategeko ahana ibyaha mu Rwanda ivuga ko uwihekuye uwo yabyaye cyangwa uwo abereye umubyeyi ahanishwa igifunho cya burundu.

Ingingo ya 162 ivuga ko umuntu wese wikuyemo inda ahanishwa igifungo kuva ku mwaka umwe kugeza ku myaka itatu n’ihazabu y’amafaranga y’u Rwanda kuva ku bihumbi mirongo itanu kugeza ku bihumbi magana abiri.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza