Gicumbi: Abanyeshuri barenga 6000 barimo n’abatwaye inda, bataye ishuri

Yanditswe na Evariste Nsengimana
Kuya 17 Ukwakira 2017 saa 02:36
Yasuwe :
0 0

Ubuyobozi bw’Akarere ka Gicumbi butangaza ko abanyeshuri 6160 batagaragaye ku ishuri mu gihembwe cya gatatu cy’umwaka w’amashuri wa 2017, barimo abakobwa 656 bariteshejwe no gutwara inda zitifuzwa.

Umuyobozi w’Akarere ka Gicumbi wungirije ushinzwe imibereho myiza y’abaturage, Charlotte Benihirwe, yabwiye IGIHE ko kafashe ingamba zo gukumira iki kibazo, kuko mbere abari bararitaye barengaga ibihumbi birindwi(7000) none ubu bakaba baragabanutse.

Yagize ati “Abo iyo tubabara, tuba tubara abavuye mu ishuri ariko tubara na bamwe baba biga nabi ku buryo ubona n’ubundi imyigire yabo ntaho yabageza. Umwaka urabona aho ugeze, ntiwaba ukivuga imibare watangiranye. Nubwo bimeze gutyo, abantu ntibicara ngo barekere aho, duhangana n’abata ishuri kenshi kugira tubagarure.”

Zimwe mu mpamvu ziza ku isonga mu gutuma abata ishuri biyongera harimo kuba bamwe bigira muri Uganda, abakoraga mu birombe by’amabuye y’agaciro no mu mu mirima y’icyayi. Gusa igihangayikishije cyane ni ikibazo cy’abarivamo kubera batewe inda zitateguwe, aho habaruwe abakobwa 656.

Yagize ati “Ni ikibazo, hari dosiye ziba zarakiriwe abana iyo bamaze guterwa inda bashyikirizwa Isange One Stop Center bakabafasha[…]. dufatanya n’abafatanyabikorwa bagashakirwa uko basubira mu buzima busanzwe harimo no kubasubiza mu ishuri, akenshi biga ibintu by’imyuga ariko hari n’abiga bakarangiza.”

Yavuze ko iki kibazo kizakemurwa no kwigisha ababyeyi, ariyo mpamvu Akarere katangije ubukangurambaga bugamije kubikumira binyuze mu kwigisha ababyeyi n’abana ndetse no guhana cyane abafata abana ku ngufu mu gihe bagaragaye, gusa ngo imbogamizi ni uko ababyeyi n’abana bahishira ababateye inda.

Ku kibazo cy’abana baterwa inda zitateguwe, atangiza ubukangurambaga ku miyoborere n’imibereho myiza mu muryango mu karere ka Kirehe kuwa 11 Ukwakira 2017, Madame Jeannette Kagame, yibukije ababyeyi gusigasira uburere bw’abana no kwirinda ikintu cyose gishobora kubahutaza.

Yavuze ko inzego zose zifite inshingano zo kwita ku burere bw’umwana hirindwa icyahutaza uburenganzira bwe, ati “Nk’ababyeyi, abarezi n’abayobozi dukwiye gukomeza kwita ku mwana wese nk’uwacu tumurinda icyahungabanya uburenganzira bwe n’imikurire ye muri rusange. Ababyeyi turasabwa kugira umwanya uhagije wo kuganira ku burere bw’abana bacu, tukabaha ibikenewe byose ngo babashe gukura no kwiga neza, tukibuka ko uburere bwabo ari twe bureba mbere y’abarezi cyangwa Leta.”

Umwanzuro wa 22, w’umwiherero w’abayobozi wabaye ku nshuro ya 14, ugaruka ku kurwanya ihohoterwa rishingiye ku gitsina rikorerwa abana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza